Juan 7:53–8:59
* Dagiti manuskrito a Codex Sinaiticus, Codex Vaticanus, ken ti Sinaitic Syriac codex ikkatenda ti bersikulo 53 inggana ti kapitulo 8, bersikulo 11, a mabasa (agraman sumagmamano a panagduduma iti nadumaduma a teksto ken patarus iti Griego) kas iti sumaganad:
53 Gapuna napanda tunggal maysa iti pagtaenganna.
8 Ngem napan ni Jesus idiay Bantay dagiti Olibo.
2 Idi pumarbangon, nupay kasta, nagparang manen idiay templo, ket nangrugi nga immay kenkuana dagiti amin a tattao, ket isu nagtugaw ket inrugina nga isuro ida.
3 Ita nangyeg dagiti eskriba ken dagiti Fariseo iti maysa a babai a nasukalan iti pannakikamalala, ket, kalpasan a pinagtakderda iti tengngada,
4 kinunada kenkuana: “Mannursuro, daytoy a babai nasukalan bayat a makikamkamalala.
5 Iti Linteg imbilin kadakami ni Moises nga uborenmi dagiti kasta a kita ti babbai. Ania, a pudpudno, ti makunam?”
6 Siempre, kinunkunada daytoy tapno subokenda, tapno maaddaanda iti pangakusaran kenkuana. Ngem nagrukob ni Jesus ket nangrugi nga agsurat iti daga babaen ti ramayna.
7 Idi nagpilitda a nagimtuod kenkuana, naglinteg ket kinunana kadakuada: “Daydiay awanan basol kadakayo isu koma ti umuna a mangibakal iti bato kenkuana.”
8 Ket idi nagrukob manen intultuloyna ti nagsurat iti daga.
9 Ngem dagidiay nakangngeg iti daytoy rinugianda ti rimmuar, a saggaysa, mangrugi kadagiti lallakay, ket isu nabati nga agmaymaysa, ken ti babai nga adda idi iti tengngada.
10 Idi naglinteg, kinuna kenkuana ni Jesus: “Babai, sadino ti ayanda? Awan kadi ti nangkondenar kenka?”
11 Kinunana: “Awan, apo.” Kinuna ni Jesus: “Uray siak saanka a kondenaren. Mapankan; manipud ita saanmon nga iyugali ti panagbasol.”
12 Gapuna kinasao manen ida ni Jesus, a kunkunana: “Siak ti silaw+ ti lubong. Ti sumurot kaniak saanto a pulos magna iti sipnget,+ no di ket ikutannanto ti silaw ti biag.”
13 Gapuna kinuna kenkuana dagiti Fariseo: “Saksiam ti maipapan iti bagim; ti pangsaksim saan a pudno.”
14 Kas sungbat kinuna kadakuada ni Jesus: “Uray no saksiak ti maipapan iti bagik, ti pangsaksik+ pudno, agsipud ta ammok no sadino ti naggapuak ken no sadino ti papanak.+ Ngem saanyo nga ammo no sadino ti naggapuak ken no sadino ti papanak.
15 Mangukomkayo maitunos iti lasag;+ saanak a pulos mangukom iti asinoman a tao.+
16 Ket uray no mangukomak, ti panangukomko napudno, agsipud ta saanak nga agmaymaysa, no di ket ti Ama a nangibaon kaniak adda kaniak.+
17 Kasta met, iti bukodyo a Linteg adda a naisurat, ‘Ti pangsaksi ti dua a tao ket pudno.’+
18 Siak ti maysa a mangsaksi iti maipapan ti bagik, ket ti Ama a nangibaon kaniak saksianna ti maipapan kaniak.”+
19 Gapuna kinunada kenkuana: “Sadino ti ayan ti Amam?” Ni Jesus simmungbat: “Saandak nga am-ammo wenno uray ni Amak.+ No am-ammodak, am-ammoyo met koma ni Amak.”+
20 Dagitoy a sasao sinaona idiay pagidulinan iti gameng+ bayat a nangisursuro idiay templo. Ngem awan nangtiliw kenkuana,+ agsipud ta saan pay a dimteng ti orasna.+
21 Gapuna kinunana manen kadakuada: “Pumanawak, ket sapulendakto,+ ket kaskasdi mataykayto iti basolyo.+ No sadino ti papanak saanyo a mabalin ti umay.”
22 Gapuna rinugian a kunaen dagiti Judio: “Papatayennanto aya ti bagina? Gapu ta kunana, ‘No sadino ti papanak saanyo a mabalin ti umay.’”+
23 Gapuna kinunana kadakuada: “Naggapukayo kadagiti lugar iti baba; naggapuak kadagiti lugar sadi ngato.+ Naggapukayo iti daytoy a lubong;+ saanak a naggapu iti daytoy a lubong.+
24 Gapuna kinunak kadakayo, Mataykayto kadagiti basolyo.+ Ta no saankayo a mamati a siak daydiay, mataykayto kadagiti basolyo.”+
25 Gapuna rinugianda a kunaen kenkuana: “Siasinoka?” Kinuna kadakuada ni Jesus: “Apay a kasasaokay pay laeng?
26 Adu a banag ti sawek maipapan kadakayo ken tapno mangipatay iti panangukom. Kinapudnona, daydiay nangibaon kaniak ket pudno, ket ti mismo a bambanag a nangngegko manipud kenkuana sawek iti lubong.”+
27 Saanda a naawatan a kasasaona ida maipapan iti Ama.
28 Gapuna kinuna ni Jesus: “Inton maibayogyon+ ti Anak ti tao,+ iti kasta maammuanyonto a siak daydiay,+ ket awan ti aramidek iti bukodko a nakem;+ no di ket kas iti insuro kaniak ni Ama sawek dagitoy a banag.+
29 Ket daydiay nangibaon kaniak adda kaniak; saannak a binaybay-an nga agmaymaysa, agsipud ta kankanayon nga aramidek ti bambanag a makaay-ayo kenkuana.”+
30 Bayat a sasawenna idi dagitoy a banag, adu ti naaddaan iti pammati kenkuana.+
31 Ket ngarud kinuna ni Jesus kadagiti Judio a namati kenkuana: “No agtalinaedkayo iti saok,+ pudno a dakayo dagiti adalak,
32 ket maammuanyonto ti kinapudno,+ ket ti kinapudno wayawayaannakayto.”+
33 Simmungbatda kenkuana: “Kaputotannakami ni Abraham+ ket saankami a pulos nagbalin nga ad-adipen ti asinoman.+ Kasano a kunaem, ‘Mawayawayaankayto’?”
34 Simmungbat kadakuada ni Jesus: “Pudno unay kunak kadakayo, Tunggal managaramid iti basol ket adipen ti basol.+
35 Mainayon pay, ti adipen saan nga agtalinaed iti sangakabbalayan iti agnanayon; ti anak agtalinaed iti agnanayon.+
36 Gapuna no wayawayaannakayo ti Anak, pudpudno a siwayawayakayto.+
37 Ammok a kaputotannakayo ni Abraham; ngem ikagkagumaandak a papatayen,+ agsipud ta ti saok awan maaramidna a panagrang-ay kadakayo.+
38 Sawek+ no ania ti bambanag a nakitak iti Amak;+ ket dakayo, ngarud, aramidenyo ti bambanag a nangngegyo iti amayo.”
39 Kas sungbat kinunada kenkuana: “Ni Abraham ti amami.”+ Kinuna kadakuada ni Jesus: “No annaknakayo ni Abraham,+ aramidenyo dagiti aramid ni Abraham.
40 Ngem ita ikagkagumaandak a papatayen, maysa a tao a nangibaga kadakayo iti kinapudno a nangngegko iti Dios.+ Saan nga inaramid ni Abraham daytoy.+
41 Aramidenyo dagiti aramid ni amayo.” Kinunada kenkuana: “Saankami a nayanak manipud iti pannakiabig; adda maymaysa nga Amami,+ ti Dios.”
42 Kinuna kadakuada ni Jesus: “No ti Dios ti Amayo, ayatendak koma,+ ta naggapuak iti Dios ket addaak ditoy.+ Saanak met a pulos immay iti bukodko a nakem, no di ket imbaonnak Daydiay.+
43 Apay a saanyo nga ammo ti sasawek? Agsipud ta saanyo a mabalin ti umimdeng iti saok.+
44 Naggapukayo iti amayo a Diablo,+ ket kayatyo nga aramiden dagiti tarigagay ni amayo.+ Dayta ket mammapatay idi a nangrugi,+ ket saan a nagtakder a di maisin iti kinapudno, agsipud ta awan kenkuana ti kinapudno. No sawenna ti ulbod, agsao a maitunos iti bukodna a pagannayasan, agsipud ta isu maysa a managulbod ken ti ama ti kinaulbod.+
45 Iti sabali a bangir, agsipud ta ibagak ti kinapudno, saandak a patien.+
46 Siasino kadakayo ti mangipaneknek a nakabasolak?+ No sawek ti kinapudno, apay a saandak a patien?
47 Ti aggapu iti Dios imdenganna ti sasao ti Dios.+ Daytoy ti makagapu a saankayo nga agimdeng, agsipud ta saankayo a naggapu iti Dios.”+
48 Kas sungbat kinuna kenkuana dagiti Judio: “Saan aya a siuumiso a kunaenmi, Maysaka a Samaritano+ ken adda sairom?”+
49 Simmungbat ni Jesus: “Awan sairok, no di ket dayawek ni Amak,+ ket dakayo ibabaindak.
50 Ngem diak sapsapulen ti dayag maipaay iti bagik;+ adda Maysa a mangsapsapul ken manguk-ukom.+
51 Pudno unay kunak kadakayo, No ti asinoman tungpalenna ti saok, saannanto a pulos makita ni patay.”+
52 Kinuna kenkuana dagiti Judio: “Ita ammomi nga adda sairom.+ Ni Abraham natay,+ kasta met dagiti mammadto;+ ngem kunam, ‘No ti asinoman tungpalenna ti saok, saannanto a pulos maramanan+ ni patay.’
53 Dakdakkelka+ aya ngem ni amami nga Abraham, a natay? Kasta met, natay dagiti mammadto.+ Siasinoka iti panangipapanmo?”
54 Simmungbat ni Jesus: “No padayagek ti bagik, awan kapapay-an ti dayagko. Ni Amak ti mangpadayag kaniak,+ daydiay kunayo a Diosyo;
55 ket kaskasdi a saanyo a naam-ammo.+ Ngem am-ammok.+ Ket no kinunak a diak am-ammo agbalinak a kas kadakayo, managulbod. Ngem isu am-ammok ket tungtungpalek ti saona.+
56 Ni Abraham nga amayo nagrag-o unay iti inanama a pannakakita iti aldawko,+ ket nakitana dayta ken nagrag-o.”+
57 Gapuna kinuna kenkuana dagiti Judio: “Awan pay limapulo a tawenmo, ket kaskasdi a nakitamon ni Abraham?”
58 Kinuna kadakuada ni Jesus: “Pudno unay kunak kadakayo, Kasakbayan a napaadda ni Abraham, addaakon.”+
59 Gapuna pimmidutda iti batbato tapno iyuborda kenkuana;+ ngem naglemmeng ni Jesus ket rimmuar manipud templo.
