Juan 15:1-27
15 “Siak ti pudno a puon ti ubas,+ ket ni Amak ti agtaltalon.+
2 Tunggal sanga nga adda kaniak a saan a mangpatpataud iti bunga ikkatenna,+ ket tunggal maysa a mangpatpataud iti bunga dalusanna,+ tapno mangpataud iti ad-adu pay a bunga.+
3 Nadaluskayon gapu iti sao a sinaok kadakayo.+
4 Agtalinaedkayo a naikaykaysa kaniak, ken siak a naikaykaysa kadakayo.+ Kas iti sanga saan a makapataud a bukbukodna iti bunga malaksid no agtalinaed iti puon ti ubas, iti kasta met laeng a pamay-an uray dakayo saanyo a mabalin, malaksid no agtalinaedkayo a naikaykaysa kaniak.+
5 Siak ti puon ti ubas, dakayo dagiti sanga. Ti agtalinaed a naikaykaysa kaniak, ket siak a naikaykaysa kenkuana, mangpataud daytoy iti adu a bunga;+ agsipud ta no naisinakayo kaniak awan a pulos ti maaramidanyo.
6 No ti asinoman saan nga agtalinaed a naikaykaysa kaniak, isu maibelleng a kas maysa a sanga ket magango; ket urnongen dagiti tattao dagidiay a sanga ket ipuruakda ida iti apuy ket mapuoranda.+
7 No agtalinaedkayo a naikaykaysa kaniak ket agtalinaed kadakayo ti sasaok, dawatenyo ti aniaman a kayatyo ket maaramidto dayta a maipaay kadakayo.+
8 Ni Amak maipadayag iti daytoy, nga agtultuloykayo a mangpataud iti adu a bunga ken paneknekanyo ti bagbagiyo nga ad-adalak.+
9 Kas iti panagayat kaniak ti Ama+ ken panagayatko kadakayo, agtalinaedkayo iti ayatko.
10 No tungpalenyo dagiti bilinko,+ agtalinaedkayto iti ayatko, kas iti panangtungpalko kadagiti bilin ti Ama+ ken panagtalinaedko iti ayatna.
11 “Sinaok kadakayo dagitoy a banag, tapno ti rag-ok adda koma kadakayo ken ti rag-oyo maan-anay koma.+
12 Daytoy ti bilinko, nga ayatenyo ti maysa ken maysa kas iti panagayatko kadakayo.+
13 Awan asinoman nga addaan dakdakkel nga ayat ngem iti daytoy, a ti maysa isukona ti kararuana maigapu kadagiti gagayyemna.+
14 Dakayo ti gagayyemko no aramidenyo ti ibilbilinko kadakayo.+
15 Saankay nga awaganen iti ad-adipen, agsipud ta saan nga ammo ti adipen no ania ti aramiden ti apona. Ngem inawagankay iti gagayyem,+ agsipud ta amin a bambanag a nangngegko iti Amak impakaammok kadakayo.+
16 Saandak a pinili, no di ket pinilikayo, ket dinutokankayo a mapan ken agtultuloy a mangpataud iti bunga+ ken tapno mataginayon koma ti bungayo; tapno uray no ania ti dawatenyo iti Ama iti naganko itedna koma dayta kadakayo.+
17 “Dagitoy a banag ibilinko kadakayo, nga ayatenyo ti maysa ken maysa.+
18 No guraennakayo ti lubong, ammoyo a ginuranak dayta sakbay a ginuranakayo.+
19 No pasetnakayo koma ti lubong, ti lubong maayatan iti kukuana.+ Ita agsipud ta saankayo a paset ti lubong,+ no di ket pinilikayo manipud iti lubong, gapu iti daytoy guraennakayo ti lubong.+
20 Laglagipenyo ti sao a kinunak kadakayo, Ti adipen saan a dakdakkel ngem iti apona. No indadanesdak, idadanesdakayto met;+ no tinungpalda ti saok, tungpalendanto met ti saoyo.
21 Ngem aramidendanto amin dagitoy a banag maibusor kadakayo maigapu iti naganko, agsipud ta saanda nga am-ammo daydiay nangibaon kaniak.+
22 No saanak nga immay ken nagsao kadakuada, awan koma ti basolda;+ ngem ita awanen ti maipambarda iti basolda.+
23 Ti manggura kaniak guraenna met ni Amak.+
24 No saanko nga inaramid iti tengngada ti ar-aramid nga awanen ti sabali pay a nangaramid,+ awan koma ti basolda;+ ngem ita agpadpada a nakitada ken ginuradak kasta met ni Amak.+
25 Ngem dayta ket tapno matungpal koma ti sao a naisurat iti Lintegda, ‘Ginuradak nga awan gapgapuna.’+
26 Inton dumteng ti katulongan nga ibaonkonto kadakayo manipud iti Ama,+ ti espiritu ti kinapudno, nga aggapu iti Ama, saksian dayta ti maipapan kaniak;+
27 ket dakayo, kalpasanna, saksianyo,+ agsipud ta nakikadkaduakayon kaniak nanipud idi nangrugiak.
