Exodo 31:1-18
31 Ket intuloy ni Jehova ti agsao ken Moises, a kunkunana:
2 “Kitaem, awagak nga inaganan ni Bezalel+ nga anak ni Uri nga anak ni Hur iti tribu ti Juda.+
3 Ket isu punnuekto iti espiritu ti Dios iti kinasirib ken iti pannakaawat ken iti pannakaammo ken iti tunggal kita ti kinasigo iti panagtrabaho,+
4 maipaay iti panagdisenio kadagiti alikamen, maipaay iti panagtrabaho iti balitok ken pirak ken gambang,+
5 ken iti panagtrabaho iti batbato tapno itampok ida+ ken iti panagtrabaho iti kayo tapno mangaramid iti tunggal kita ti gapuanan.+
6 No maipapan kaniak, adtoy! isaadko a kaduana ni Oholiab nga anak ni Ahisamac iti tribu ti Dan,+ ket iti puso ti tunggal maysa a masirib ti pusona ikabilko ti kinasirib, tapno pudno a maaramidda ti isuamin nga imbilinko kenka:+
7 ti tolda ti gimong+ ken ti Lakasa+ maipaay iti pammaneknek ken ti kalub nga adda iti rabawna,+ ken amin dagiti aruaten ti tolda,
8 ken ti lamisaan ken ar-aruatenna,+ ken ti pagsaadan ti silaw a puro a balitok ken amin nga ar-aruatenna,+ ken ti altar ti insienso,+
9 ken ti altar ti daton a mapuoran ken amin nga ar-aruatenna,+ ken ti palanggana ken pagsaadanna,+
10 ken dagiti kawes a ginansilio ken ti nasantuan a kawkawes a maipaay ken Aaron a padi ken dagiti kawes ti annakna maipaay iti panagakem a kas papadi;+
11 ken ti pangpulot a lana ken ti napabanglo nga insienso maipaay iti santuario.+ Maitunos iti isuamin nga imbilinko kenka aramidendanto.”
12 Ket ni Jehova kinunana pay ken Moises:
13 “No maipapan kenka, agsaoka iti annak ti Israel, a kunaem, ‘Salimetmetanyo a nangnangruna dagiti sabbathko,+ ta maysa dayta a pagilasinan iti nagbaetantayo bayat ti kapkaputotanyo tapno maammuanyo a siak ni Jehova santipikarenkayo.+
14 Ket masapul a salimetmetanyo ti sabbath, ta nasantuan a banag dayta kadakayo.+ Ti mangtabbaaw iti dayta di bumurong a mapapatayto.+ No kas pagarigan adda asinoman nga agtrabaho iti dayta, ngarud dayta a kararua masapul a magessat iti tengnga dagiti kailianna.+
15 Innem nga aldaw a mabalin nga aramiden ti trabaho, ngem iti maikapito nga aldaw maysa a sabbath ti naan-anay a panaginana.+ Nasantuan a banag dayta ken Jehova. Asinoman nga agaramid iti trabaho iti aldaw ti sabbath di bumurong a mapapatayto.
16 Ket masapul a salimetmetan ti annak ti Israel ti sabbath, tapno itungpalda ti sabbath bayat ti kapkaputotanda. Tulag dayta agingga iti tiempo a di nakedngan.+
17 Iti nagbaetak ken ti annak ti Israel maysa dayta a pagilasinan agingga iti tiempo a di nakedngan,+ agsipud ta iti innem nga aldaw inaramid ni Jehova ti langlangit ken ti daga ket iti maikapito nga aldaw naginana ken pinabang-aranna ti bagina.’”+
18 Ita apaman a nalpasen a nakisao kenkuana idiay Bantay Sinai inikkanna ni Moises iti dua a tapi ti Pammaneknek,+ taptapi a bato a sinuratan ti ramay ti Dios.+
