Exodo 27:1-21
27 “Ket masapul nga aramidem ti altar a kayo ti akasia, lima a kasiko ti kaatiddogna ken lima a kasiko ti kaakabana. Ti altar+ rebbeng a kuadrado, ket ti kangatona tallo a kasiko.
2 Ket masapul nga aramidem dagiti sarana+ iti rabaw ti uppat a sulina. Dagiti sarana agtaudto iti dayta, ket masapul a kalupkopam iti gambang.+
3 Ket masapul nga aramidem dagiti latana a pangikkat iti nataba a dapdapona, ken dagiti supladna, ken dagiti malukongna, ken dagiti tinidorna, ken dagiti pagikkanna iti apuy; ket aramidemto amin dagiti aruatenna a gambang.+
4 Ket masapul nga iyaramidam iti rehas, maysa nga aramid nga iniket+ a gambang; ket masapul a mangaramidka iti uppat a singsing a gambang iti rabaw ti iket iti uppat nga ungtona.
5 Ket masapul nga ikabilmo iti baba ti ngarab ti altar nga agpababa iti uneg, ket ti iket masapul a kumamang iti tengnga ti altar.+
6 Ket masapul a mangaramidka kadagiti assiw a maipaay iti altar, a dagiti assiwna kayo ti akasia, ket masapul a kalupkopam ida iti gambang.+
7 Ket dagiti assiwna masapul a mayusok kadagiti singsing, ket dagiti assiw masapul nga adda iti dua a sikigan ti altar no awiten dayta.+
8 Aramidemto a maysa a nalukong a baul a tabtabla. Kas iti imparangna kenka idiay bantay, aramidendanto a kasta.+
9 “Ket masapul nga aramidem ti paraangan+ ti tabernakulo. Maipaay iti sikigan a sumango iti Negeb, iti agpaabagatan, ti paraangan addaan kadagiti balengbeng a napino a tinabid a lienso,+ a sangagasut a kasiko ti kaatiddog maipaay iti maysa a sikigan.
10 Ket ti duapulo nga adigina ken ti duapulo a sulluop a batayda naaramidda iti gambang. Dagiti pasok ti ad-adigi ken dagiti nagsuopanda naaramidda iti pirak.+
11 Kasta, met, ti maipaay iti sikigan iti amianan iti kaatiddogna, a dagiti balengbeng maipaay iti sangagasut a kasiko a kaatiddog, ket ti duapulo nga adigina ken ti duapulo a sulluop a batayda naaramidda iti gambang, a dagiti pasok ti ad-adigi ken dagiti nagsuopanda naaramidda iti pirak.+
12 No maipapan iti kaakaba ti paraangan, iti sikigan iti laud naaramid dagiti balengbeng a limapulo a kasiko, a dagiti adigida sangapulo ket ti sulluop a batbatayda sangapulo.+
13 Ket ti kaakaba ti paraangan iti sikigan iti daya nga agpaleleggakan ti init limapulo a kasiko.+
14 Ket adda sangapulo ket lima a kasiko a balbalengbeng iti maysa a sikigan, a dagiti adigida tallo ket ti sulluop a batbatayda tallo.+
15 Ket maipaay iti sabali pay a sikigan adda sangapulo ket lima a kasiko a balbalengbeng, a dagiti adigida tallo ket ti sulluop a batbatayda tallo.+
16 “Ket maipaay iti ruangan ti paraangan adda maysa a tabing a duapulo a kasiko ti kaatiddogna, nga asul a sinulid ken delana a natinaan iti lumabaga a purpura ken cocus nga eskarlata a material ken napino a lienso a tinabid, ti aramid ti mangngabel,+ a dagiti adigida uppat ket ti sulluop a batbatayda uppat.+
17 Amin dagiti adigi ti paraangan iti aglawlaw addaanda kadagiti putipot a pirak, ket dagiti pasokda naaramid iti pirak ngem ti sulluop a batbatayda naaramid iti gambang.+
18 Ti kaatiddog ti paraangan sangagasut a kasiko,+ ket ti kaakaba limapulo a kasiko, ket ti kangato lima a kasiko, a napino a lienso a tinabid, ket ti sulluop a batbatayda gambang.
19 Ket amin dagiti aruaten ti tabernakulo iti isuamin a panagserbi iti dayta, ken amin dagiti pasok ti toldana, ken amin dagiti pasok ti paraangan naaramidda iti gambang.+
20 “No maipapan kenka, bilinem ti annak ti Israel nga iyalaandaka iti puro, nadingpil a lana ti olibo a maipaay iti silaw, tapno gangtam a patinayon dagiti pagsilawan.+
21 Iti tolda ti gimong, iti ruar ti kortina+ nga adda iti sibay ti Pammaneknek, urnosento ni Aaron ken ti annakna manipud iti rabii agingga iti bigat iti sanguanan ni Jehova.+ Paglintegan dayta agingga iti tiempo a di nakedngan maipaay kadagiti kaputotanda,+ a tungpalen ti annak ti Israel.+
