Exodo 28:1-43
28 “Ket no maipapan kenka, iyasidegmo kenka ni Aaron a kabsatmo ken ti annakna a kaduana manipud iti tengnga ti annak ti Israel tapno makapagakem a kas padi kaniak,+ da Aaron,+ Nadab ken Abihu,+ Eleazar ken Itamar,+ ti annak ni Aaron.
2 Ket masapul nga iyaramidam iti nasantuan a kawkawes ni Aaron a kabsatmo, a maipaay a dayag ken kinapintas.+
3 Ket sika agsaoka kadagidiay amin a masirib nga addaan puso a pinunnok iti espiritu ti kinasirib,+ ket masapul nga aramidenda ti kawkawes ni Aaron a pangsantipikar kenkuana, tapno makapagakem a kas padi kaniak.+
4 “Ket dagitoy ti kawkawes nga aramidendanto: maysa a pektoral,+ ken maysa nga efod+ ken maysa nga awan manggasna a lambon+ ken maysa a nagayad a pagan-anay a nakellekelleng, maysa a turbante+ ken maysa a sintas;+ ket masapul nga aramidenda ti nasantuan a kawkawes a maipaay ken Aaron a kabsatmo ken iti annakna, tapno isu makapagakem a kas padi kaniak.
5 Ket isuda alaendanto ti balitok ken ti asul a sinulid ken ti delana a natinaan iti lumabaga a purpura ken ti cocus nga eskarlata a material ken ti napino a lienso.
6 “Ket masapul nga aramidenda ti efod a balitok, asul a sinulid ken delana a natinaan iti lumabaga a purpura, cocus nga eskarlata a material ken napino a lienso a tinabid, ti aramid ti maysa a bumuborda.+
7 Ket maaddaan dayta iti dua a pedaso a pangabaga a maisilpo iti dua nga ungtona, ket masapul a maisilpo.+
8 Ket ti barikes,+ nga adda iti dayta a pangigalut a siiirut, maitunos iti pannakaaramidna rebbeng a kadagiti materialna, a balitok, asul a sinulid ken delana a natinaan iti lumabaga a purpura ken cocus nga eskarlata a material ken napino a lienso a tinabid.
9 “Ket masapul a mangalaka iti dua a bato nga onix+ ket ikitikitmo+ iti rabawda dagiti nagan ti annak ti Israel,+
10 innem kadagiti naganda iti rabaw ti maysa a bato ket dagiti nagan ti innem a natedda iti rabaw ti sabali pay a bato sigun iti panagsasaganad dagiti pannakayanakda.+
11 Babaen ti aramid ti nasigo a tumatrabaho iti batbato, babaen kadagiti kitikit ti maysa a selio, ikitikitmo iti dua a bato dagiti nagan ti annak ti Israel.+ Maitampok kadagiti pagitampokan a balitok ti panangaramidmonto kadakuada.+
12 Ket masapul nga ikabilmo ti dua a bato iti rabaw dagiti pedaso a pangabaga ti efod kas pakalaglagipan a batbato maipaay iti annak ti Israel;+ ket masapul nga awiten ni Aaron ti nagnaganda iti sanguanan ni Jehova iti rabaw ti dua a pedaso a pangabagana kas maysa a pakalaglagipan.
13 Ket masapul a mangaramidka kadagiti pagitampokan a balitok,
14 ken dua a kawar a puro a balitok.+ Aramidemto ida a kas singsingdan, babaen ti pannakaaramid ti tali; ket masapul nga ikapetmo ti sinantali a kawkawar kadagiti pagitampokan.+
15 “Ket masapul nga aramidem ti pektoral ti panangukom+ a gapuanan ti maysa a bumuborda. Aramidemto kas iti pannakaaramid ti efod. Aramidemto a balitok, asul a sinulid ken delana a natinaan iti lumabaga a purpura ken cocus nga eskarlata a material ken napino a lienso a tinabid.+
16 Rebbeng a kuadrado no mapagkupin, a maysa a dangan ti kaatiddogna ken maysa a dangan ti kaakabana.+
17 Ket masapul a punnuem iti panelsel a batbato, nga adda uppat nga intar ti batbato.+ Maysa nga intar ti rubi,+ topasio+ ken esmeralda+ ti umuna nga intar.
18 Ket ti maikadua nga intar turkesa,+ safiro+ ken jaspe.+
19 Ket ti maikatlo nga intar bato a lesem, agata+ ken amatista.+
20 Ket ti maikapat nga intar krisolito+ ken onix+ ken jade. Dagiti susulbongan a balitok rebbeng nga adda kadagiti panelselda.+
21 Ket dagiti bato rebbeng a maitunos kadagiti nagan ti annak ti Israel, ti sangapulo ket dua maitunos iti nagnaganda.+ Rebbeng a kaslada kadagiti kitikit ti selio, tunggal maysa maitunos iti naganna, maipaay iti sangapulo ket dua a tribu.+
22 “Ket masapul a mangaramidka iti rabaw ti pektoral iti tiniritir a kawkawar, iti aramid a tinali, a puro a balitok.+
23 Ket masapul a mangaramidka iti rabaw ti pektoral iti dua a singsing a balitok,+ ket masapul nga ikabilmo ti dua a singsing iti rabaw ti dua nga ungto ti pektoral.
24 Ket masapul nga iyusokmo ti dua a tali a balitok iti dua a singsing kadagiti ungto ti pektoral.+
25 Ket ti dua a pungto ti dua a tali iyusokmonto iti dua a pagitampokan, ket masapul nga ikabilmo ida iti rabaw dagiti pedaso a pangabaga ti efod, iti sangona.+
26 Ket masapul a mangaramidka iti dua a singsing a balitok ket isaadmo ida iti dua nga ungto ti pektoral iti pingirna nga adda iti sikigan a sumango iti efod nga agpauneg.+
27 Ket masapul a mangaramidka iti dua a singsing a balitok ket ikabilmo ida iti rabaw ti dua a pedaso a pangabaga ti efod manipud baba, iti sangona, iti asideg ti pagsilpuanna, iti ngatuen ti barikes ti efod.+
28 Ket igalutdanto ti pektoral kadagiti singsingna kadagiti singsing ti efod babaen ti asul a singdan, tapno makapagtalinaed iti ngatuen ti barikes ti efod ket ti pektoral saan koma a maikkat iti rabaw ti efod.+
29 “Ket masapul nga awiten ni Aaron dagiti nagan ti annak ti Israel iti pektoral ti panangukom iti rabaw ti pusona no isu sumrek iti Nasantuan kas maysa a pakalaglagipan iti sanguanan ni Jehova a patinayon.
30 Ket masapul nga ikabilmo ti Urim+ ken ti Tummim iti pektoral ti panangukom, ket addadanto iti rabaw ti puso ni Aaron no isu sumrek iti sanguanan ni Jehova; ket masapul nga awiten ni Aaron dagiti panangukom+ ti annak ti Israel iti rabaw ti pusona iti sanguanan ni Jehova a patinayon.
31 “Ket masapul nga aramidem ti awan manggasna a lambon ti efod a bin-ig nga asul a sinulid.+
32 Ket masapul nga adda paglukatan iti ngatona iti tengnga dayta. Ti paglukatanna rebbeng nga addaan iti bilid iti aglawlaw, ti aramid ti maysa a trabahador iti pagabelan. Dayta ket rebbeng a kas iti paglukatan ti nagsasaip a kabal, tapno saan a mapigis.+
33 Ket iti rabaw ti gayadanna masapul a mangaramidka kadagiti granada nga asul a sinulid ken delana a natinaan iti lumabaga a purpura ken cocus nga eskarlata a material, iti rabaw ti gayadanna iti aglawlaw, ken kamkampanilia+ a balitok iti nagbaetanda iti aglawlaw;
34 maysa a kampanilia a balitok ken maysa a granada, maysa a kampanilia a balitok ken maysa a granada iti rabaw ti gayadan ti awan manggasna a lambon iti aglawlaw.+
35 Ket masapul a maikapet ken Aaron tapno isu makapagserbi, ket ti uni manipud kenkuana masapul a mangngeg no isu sumrek iti santuario iti sanguanan ni Jehova ken no isu rummuar, tapno saan a matay.+
36 “Ket masapul a mangaramidka iti sumilsilnag a plata a puro a balitok ket ikitikitmo iti rabawna babaen kadagiti kitikit ti maysa a selio, ‘Ti kinasanto kukua ni Jehova.’+
37 Ket masapul nga ikapetmo babaen ti maysa nga asul a singdan, ket masapul nga adda iti rabaw ti turbante.+ Rebbeng nga adda iti sango ti turbante.
38 Ket masapul nga adda iti rabaw ti muging ni Aaron, ket masapul a manungsungbat ni Aaron iti biddut a naaramid maikaniwas iti nasantuan a bambanag,+ a santipikarento ti annak ti Israel, kayatna a sawen, amin dagiti nasantuan a sagutda; ket masapul nga agtalinaed dayta iti rabaw ti mugingna a patinayon, tapno magun-odanna ti anamong maipaay kadakuada+ iti sanguanan ni Jehova.
39 “Ket masapul nga abelem a nakellekelleng ti nagayad a pagan-anay a napino a lienso ket mangaramidka iti maysa a turbante a napino a lienso,+ ket mangaramidkanto iti sintas,+ ti aramid ti mangngabel.
40 “Ket maipaay iti annak ni Aaron mangaramidkanto kadagiti nagayad a pagan-anay,+ ket masapul nga iyaramidam ida kadagiti sintas, ket iyaramidamto ida kadagiti uklop+ a maipaay a dayag ken kinapintas.+
41 Ket babaen kadagita masapul a kawesam ni Aaron a kabsatmo ken ti annakna a kaduana, ket masapul a pulotam ida+ ken punnuem ti imada iti pannakabalin+ ken santipikarem ida, ket masapul nga agakemda a kas papadi kaniak.
42 Ket iyaramidam ida kadagiti sapin a lienso a mangabbong iti lamolamo a lasag.+ Manipud kadagiti padingpading dumanonda agingga kadagiti luppo.
43 Ket masapul a maikapetda ken Aaron ken iti annakna no sumrekda iti tolda ti gimong wenno no umasidegda iti altar tapno agserbida iti nasantuan a disso, tapno saanda a makaaramid iti biddut ket sigurado a matayda. Maysa dayta a paglintegan agingga iti tiempo a di nakedngan maipaay kenkuana ken kadagiti putotna a sumaruno kenkuana.+
