Exodo 20:1-26
20 Ket ti Dios sinaona amin dagitoy a sasao, a kunkunana:+
2 “Siak ni Jehova a Diosmo,+ a nangiruar kenka manipud daga ti Egipto, manipud balay dagiti adipen.+
3 Dika maaddaan kadagiti aniaman a sabali a didios+ maibusor iti rupak.
4 “Dika mangaramid maipaay kenka iti maysa a kinitikitan a ladawan wenno maysa a porma a kaasping ti aniaman a banag nga adda iti langlangit sadi ngato wenno adda iti daga iti baba wenno adda iti dandanum iti uneg ti daga.+
5 Dika agruknoy kadakuada wenno mauyotan nga agserbi kadakuada,+ agsipud ta siak ni Jehova a Diosmo maysaak a Dios a mangalkalikagum iti naipamaysa a debosion,+ a gapu iti biddut ti amma mangyeg iti pannusa iti annak, iti maikatlo a kaputotan ken iti maikapat a kaputotan, no kadagidiay manggura kaniak;+
6 ngem mangwatwatwat iti naayat a kinamanangngaasi maipaay iti maikasangaribu a kaputotan no kadagidiay agayat kaniak ken mangsalimetmet kadagiti bilinko.+
7 “Dika aramaten ti nagan ni Jehova a Diosmo iti awan patpategna a pamay-an,+ ta ni Jehova saannanto a bay-an a di nadusa ti maysa a mangaramat iti naganna iti awan patpategna a pamay-an.+
8 “Iti pananglaglagip iti aldaw ti sabbath tapno ibilang a sagrado,+
9 agserbika ket masapul nga aramidem ti isuamin a trabahom iti innem nga aldaw.+
10 Ngem ti maikapito nga aldaw ket maysa a sabbath ken Jehova a Diosmo.+ Dika aramiden ti aniaman a trabaho, sika wenno uray ti anakmo a lalaki wenno uray ti anakmo a babai, ti adipenmo a lalaki wenno uray ti adipenmo a babai wenno uray ti naamo nga animalmo wenno uray ti ganggannaet nga agnanaed kenka nga adda iti uneg dagiti ruanganmo.+
11 Ta iti innem nga aldaw inaramid ni Jehova ti langlangit ken ti daga, ti baybay ken ti isuamin nga adda kadakuada,+ ket naginana iti maikapito nga aldaw.+ Dayta ti makagapu a binendisionan ni Jehova ti aldaw ti sabbath ket pinagbalinna a sagrado.+
12 “Dayawem ni amam ken ni inam+ tapno agbayag dagiti aldawmo iti rabaw ti daga nga ited kenka ni Jehova a Diosmo.+
13 “Dika mamapatay.+
14 “Dika makikamalala.+
15 “Dika agtakaw.+
16 “Dika mangpaneknek a siuulbod kas maysa a saksi maibusor iti padam a tao.+
17 “Dika tarigagayan ti balay ti padam a tao. Dika tarigagayan ti asawa a babai ti padam a tao,+ wenno uray ti adipenna a lalaki wenno uray ti adipenna a babai wenno uray ti torona wenno uray ti asnona wenno uray aniaman a banag a kukua ti padam a tao.”+
18 Ita amin dagiti umili makitkitada idi dagiti gurruod ken dagiti gilap ti kimat ken ti uni ti tangguyob ken ti bantay nga umas-asuk. Idi makita dayta dagiti umili, ngarud nagtayegtegda ket nagtakderda iti adayo.+
19 Ket rinugianda a kunaen ken Moises: “Makisaoka kadakami, ket umimdengkami; ngem saan koma a makisao kadakami ti Dios ta amangan no mataykami.”+
20 Gapuna kinuna ni Moises kadagiti umili: “Dikay agbuteng, agsipud ta maipagapu iti panangsubok kadakayo immay ti pudno a Dios,+ ken tapno ti panagbuteng kenkuana agtultuloy koma iti sanguananyo tapno saankayo nga agbasol.”+
21 Ket dagiti umili nagtaktakderda iti adayo, ngem immasideg ni Moises iti nasipnget nga aripuno dagiti ulep nga ayan idi ti pudno a Dios.+
22 Ket ni Jehova kinunana ken Moises:+ “Daytoy ti sawem iti annak ti Israel, ‘Dakayo nakitayo a manipud langlangit nakisaoak kadakayo.+
23 Dikay mangaramid iti didios a pirak a pannakakaduak, ket dikay mangaramid iti didios a balitok maipaay kadakayo.+
24 Maysa nga altar a daga+ ti aramidem maipaay kaniak, ket masapul nga isakripisiom iti rabawna dagiti datonmo a mapuoran ken dagiti pakikaykaysa a sakripisiom, ti arbanmo ken ti pangenmo.+ Iti tunggal disso a sadiay ipalagipkonto ti naganko umayakto kenka ket sigurado a bendisionankanto.+
25 Ket no iyaramidannak iti altar a batbato, dika bangonen ida kas tinikapan a batbato. No mapasamak nga aramatem iti dayta ti paetmo, iti kasta tabbaawamto.+
26 Ket dika umuli iti altarko babaen kadagiti tukad, tapno ti pribado a paspasetmo saan a maiparang iti dayta.’
