Gịnị Bụ Ọbịbịa Kraịst?
Ihe Baịbụl kwuru
Baịbụl kwuru ọtụtụ ugboro gbasara mgbe Kraịst ga-abịa n’ọdịnihu ikpe ndị mmadụ ikpe n’ụwa. a Dị ka ihe atụ, Matiu 25:31-33 kwuru, sị:
“Mgbe Nwa nke mmadụ [bụ́ Jizọs Kraịst] ga-abịa n’ebube ya, ya na ndị mmụọ ozi ya niile, mgbe ahụ ka ọ ga-anọkwasị n’ocheeze ya dị ebube. A ga-emekwa ka mba niile zukọta n’ihu ya, ọ ga-ekewapụkwa ndị mmadụ n’ebe ibe ha nọ, dị nnọọ ka onye ọzụzụ atụrụ si ekewapụ atụrụ n’ebe ewu nọ. Ọ ga-edebe atụrụ n’aka nri ya, ma debe ewu n’aka ekpe ya.”
Oge ikpe a ga-eso ‘n’oké mkpagbu’ nke a na-enwetụbeghị ụdị ya kemgbe ụwa. Oké mkpagbu ahụ ga-ebi mgbe a ga-alụ agha Amagedọn. (Matiu 24:21; Mkpughe 16:16) Ndị iro Kraịst a kpọrọ ewu n’ihe atụ a, “ga-anata ntaramahụhụ ikpe ọmụma nke bụ́ mbibi ebighị ebi.” (2 Ndị Tesalonaịka 1:9; Mkpughe 19:11, 15) Ma, ndị niile ji obi ha niile jeere ya ozi, ya bụ, ndị ahụ bụ́ atụrụ, ga-enwe olileanya inweta “ndụ ebighị ebi.”—Matiu 25:46.
Olee mgbe Kraịst ga-abịa?
Jizọs sịrị: “Ọ dịghị onye maara ụbọchị ahụ na oge awa ahụ.” (Matiu 24:36, 42; 25:13) Ma, o nyere “ihe ịrịba àmà” nke ga-eme ka a mata na oge ọ ga-abịa eruola.—Matiu 24:3, 7-14; Luk 21:10, 11.
Kraịst ọ̀ ga-abịa n’ahụ́ mmụọ ka ọ̀ bụ n’anụ ahụ́ nkịtị?
Ọ bụ ahụ́ mmụọ ka Jizọs nwere mgbe a kpọlitere ya n’ọnwụ. N’ihi ya, ọ ga-abụ mmụọ mgbe ọ ga-abịa, ọ gaghị ebu anụ ahụ́. (1 Ndị Kọrịnt 15:45; 1 Pita 3:18) Ọ bụ ya mere Jizọs ji gwa ndịozi ya n’ụbọchị bọtara ụbọchị ahụ ọ nwụrụ, sị: “N’oge na-adịghị anya, ụwa agaghịkwa ahụ m ọzọ.”—Jọn 14:19.
Ihe ndị na-abụghị eziokwu ndị mmadụ na-ekwu gbasara ọbịbịa Kraịst
Ụgha: Mgbe Baịbụl kwuru na ndị mmadụ ga-ahụ Jizọs “ka ọ na-abịa n’ígwé ojii,” ọ pụtara na Jizọs ga-abịa otú ndị mmadụ ga-ahụ ya.—Matiu 24:30.
Eziokwu: Ọtụtụ mgbe, Baịbụl kwuo banyere ígwé ojii, ihe ọ na-ekwu bụ ihe a na-anaghị ahụ anya. (Levitikọs 16:2; Ọnụ Ọgụgụ 11:25; Diuterọnọmi 33:26) Dị ka ihe atụ, Chineke gwara Mozis, sị: “M ga-abịakwute gị n’oké ígwé ojii.” (Ọpụpụ 19:9) Ma, Mozis ahụghị Chineke anya. N’ihi ya, Kraịst ‘ịbịa n’ígwé ojii’ pụtara na ndị mmadụ ga-ahụ ihe ndị ga-egosi na Jizọs abịala, ma ha agaghị eji anya nkịtị ahụ ya.
Ụgha: Mkpughe 1:7 kwuru na mgbe Jizọs ga-abịa, “anya niile ga-ahụ ya.” Ihe a gosiri na ndị mmadụ ga-eji anya ha ahụ ya.
Eziokwu: Mgbe ụfọdụ, okwu Grik e si sụgharịta “anya” na “ịhụ ụzọ” na Baịbụl nwere ike ịpụta ịghọta ihe ma ọ bụ ịmata ihe, ọ bụghị iji anya nkịtị ahụ ihe. b (Matiu 13:15; Luk 19:42; Ndị Rom 15:21; Ndị Efesọs 1:18) Baịbụl kwuru na kemgbe a kpọlitere Jizọs n’ọnwụ, o bi “n’ìhè a na-apụghị iru nso, . . . ọ dịghịkwa mmadụ ọ bụla pụrụ ịhụ ya.” (1 Timoti 6:16) N’ihi ya, na Baịbụl sịrị na “anya niile ga-ahụ ya” pụtara na ndị mmadụ ga-amata na ọ bụ Jizọs ka Chineke ga-eji kpee ikpe.—Matiu 24:30.
Isiokwu A Nwekwara Ike Ịmasị Gị
ỤLỌ NCHE
Gịnị Mere Kraịst Ga-eji Abịa Ọzọ?
Gịnị mere Kraịst ga-eji abịa ọzọ? Ọ̀ ga-abụ mmadụ ka ọ̀ ga-abụ mmụọ mgbe ọ ga-abịa ọzọ, oleekwa ihe ọ ga-eme mgbe ahụ?
AJỤJỤ NDỊ BAỊBỤL ZARA
Gịnị Bụ Agha Amagedọn?
Amagedọn gbara naanị otu ugbo na Baịbụl. Ma, e kwuru gbasara agha a n’ebe niile na Baịbụl.
AJỤJỤ NDỊ BAỊBỤL ZARA
Gịnị Bụ Oké Mkpagbu Ahụ?
Oké mkpagbu ahụ ga-eme ka ihe siere ụmụ mmadụ ezigbo ike otú ọ na-esitụbeghị mbụ. Gịnị ga-eme mgbe ahụ?
IHE NDỊ DỊ EZIGBO MKPA BAỊBỤL NA-AKỤZI
Alaeze Chineke Malitere Ịchị n’Afọ 1914
Ihe karịrị puku afọ abụọ na narị isii, Chineke mere ka otu nnukwu eze rọọ nrọ nke na-emezu n’oge a.
ỤLỌ NCHE