Ang Pagtamod sang Biblia

Dapat Bala nga Mangin Ministro ang mga Babayi?

“NATINGALA gid ako kag naugot kay wala gihapon sing nagbag-o sa mga babayi kon posisyon sa simbahan ang hambalan,” sulat sang isa ka Katoliko nga babayi sa pamantalaan nga USA Today. Madamo ang nagaugyon sa iya. Kay man, sa iban nga relihion may mga babayi nga ministro, pari, obispo, kag mga rabbi.

Ang mga relihion nga nagadumili sa mga babayi nga mangin ministro kag ang mga relihion nga nagatugot sa mga babayi nga magwali sa pulpito, nagasiling nga ang ila ginahimo nabase sa Biblia. Pero, pareho ini nga wala ginasuportahan sang Biblia. Ngaa? Para masabat ini, binagbinagon anay naton kon paano ginagamit sang Biblia ang tinaga nga “ministro.”

Mga Ministro sang Una

Ano ang imo pag-intiende sa tinaga nga “ministro”? Madamo ang magasiling dayon nga nagapatuhoy ini sa lider sang relihion, lalaki man ukon babayi, nga nagadumala sa pagsimba sang isa ka grupo sang relihion. Pero sa Biblia, may iban pa ini nga buot silingon. Halimbawa, ang Cristianong babayi nga si Febe ginpakilala ni apostol Pablo subong “aton utod nga babayi, nga isa ka ministro sa kongregasyon sa Cencrea.”—Roma 16:1.

Buot bala silingon nga si Febe nagatindog sa atubang sang kongregasyon sang Cencrea kag nagadumala sang relihioso nga serbisyo? Ano gid bala nga sahi sang ministeryo ang ginhimo ni Febe? Sa sulat ni Pablo sa mga taga-Filipos, nagsiling sia nga ang pila ka babayi “kaupod ko . . . nga nagpangabudlay sing maayo sa pagpalapnag sang Maayong Balita.”—Italiko amon; Filipos 4:2, 3, APD.

Ang panguna nga paagi sang mga Cristiano sang una sa pagpalapnag sang maayong balita amo ang pagwali sing “dayag kag sa mga balay.” (Binuhatan 20:20) Ang mga nagahimo sini mga ministro. Nalakip sa ila ang mga babayi pareho ni Priscila. Upod sa iya bana, ‘ginpaathag nila sing sibu pa ang dalanon sang Dios’ sa isa ka mahinadlukon sa Dios nga tawo nga wala pa mabawtismuhan subong Cristiano. (Binuhatan 18:25, 26) Pareho ni Febe kag sang iban pa nga babayi, maayo man nga ministro si Priscila.

Isa ka Dungganon nga Papel

Indi gid bala tanto ka importante ang pagwali kay ginapahimo ini sa mga babayi, samtang ang importante nga hilikuton nga pagdumala sa kongregasyon para lamang sa mga lalaki? Indi, kag may duha ini ka rason. Una, ginapakita sang Biblia nga ang tanan nga Cristiano—lakip ang mga lalaki nga may daku nga responsibilidad sa kongregasyon—dapat magwali. (Lucas 9:1, 2) Ikaduha, halin sang una asta subong, ang pagwali amo gihapon ang panguna nga paagi sang mga Cristiano, lalaki man ukon babayi, sa pagtuman sang sugo ni Jesus  nga “maghimo sang mga disipulo sa mga tawo sang tanan nga pungsod, . . . nga nagapanudlo sa ila.”—Mateo 28:19, 20.

May isa pa ka importante nga papel ang pila ka babayi sa kongregasyon. Si Pablo nagsulat: “Ang tigulang nga mga babayi maggawi subong . . . mga manunudlo sang maayo; agod mapasag-uli nila ang kaligdong sang lamharon nga mga babayi nga higugmaon ang ila bana, nga higugmaon ang ila mga anak.” (Tito 2:3, 4) Gani, ang eksperiensiado nga Cristianong mga babayi may pribilehiyo nga buligan ang lamharon nga mga babayi nga mangin hamtong. Isa man ini ka dungganon kag importante nga papel.

Pagpanudlo sa Kongregasyon

Wala sing may mabasa sa Biblia nga ang mga babayi ginsugo nga magpanudlo sa kongregasyon. Sa baylo, ginsugo sila ni apostol Pablo nga “maghipos sa mga kongregasyon.” Ngaa? Ang isa ka rason siling niya amo nga para mahimo ang mga butang sing “disente kag suno sa kahimusan.” (1 Corinto 14:34, 40) Para mangin mahim-ong ang kongregasyon, ginhatag sang Dios ang pagpanudlo sa isa lang ka grupo. Pero talupangda nga ang pribilehiyo sa pagdumala sa kongregasyon wala ginahatag sa isa ka tawo tungod lamang lalaki sia. Kundi, ginahatag ini sa kalipikado nga mga lalaki. *—1 Timoteo 3:1-7; Tito 1:5-9.

Pagpakanubo bala sa mga babayi ang papel nga ginhatag sa ila sang Dios? Indi. Dumduma nga ginhatagan sila ni Jehova nga Dios sing importante nga hilikuton—ang pagwali parte sa iya. (Salmo 68:11) Sa mga Saksi ni Jehova subong, ang mga ministro nga lalaki kag babayi nakabulig sa minilyon nga maghinulsol kag makatigayon sing kaluwasan. (Binuhatan 2:21; 2 Pedro 3:9) Isa gid ini ka importante nga hilikuton!

Ini nga kahimusan nagadala sing paghidait kag nagapadungog sa mga lalaki kag mga babayi. Halimbawa: Ang aton mata kag dulunggan nagabuligay para makatabok kita sa kalye. Sing kaanggid, kon ginatuman sang mga lalaki kag babayi ang kabubut-on sang Dios paagi sa paghimo sang mga katungdanan nga ginhatag sa ila, may paghidait kag pagpakamaayo sang Dios ang kongregasyon.—1 Corinto 14:33; Filipos 4:9. *

[Mga Nota]

NAMANGKOT KA BALA?

● Paano nagapanudlo ang Cristianong mga babayi sa kongregasyon sang una?—Binuhatan 18:26.

● Sin-o ang ginhatagan sang papel nga magdumala sa kongregasyon?—1 Timoteo 3:1, 2.

● Ano ang pagtamod sang Dios sa pagministeryo sang Cristianong mga babayi subong?—Salmo 68:11.

[Blurb sa pahina 29]

“Ang Ginoo nagahatag sang polong; ang mga babayi nga nagabantala sang mga balita daku nga kadam-an.”—SALMO 68:11