“Ang Pinakamatahom Maglupad nga Pispis sa Kalibutan”

ANG albatross, nga amo ang pinakadaku nga pispis sa dagat, ginlaragway subong “ang pinakamatahom maglupad nga pispis sa kalibutan.” Ang pakpak sini nagalapad sing tatlo ka metros kon maghumlad kag makalupad ini sa kadasigon nga 115 kilometros kada oras. Mahimo nga daw malaw-ay ini tan-awon kon sa duta, pero matahom gid ini kag makawiwili kon nagalupad sa kalangitan.

Sa mga 20 ka nakilal-an nga espesyi sang albatross, mga 15 sini ang makita sa kadagatan sa palibot sang New Zealand. Ang lamang nga lugar sa Nabagatnan nga Hemisperio nga ginapangitlugan sini nga pispis amo ang Taiaroa Head, nga ara sa punta sang Otago Peninsula, sa South Island sang New Zealand.

Sa sini nga lugar, ang northern royal albatross nagapangitlog kon mag-anom asta napulo ka tuig na ini. Wala ini nagauntat sa pagpangitlog samtang buhi kag ang iban sa ila nagaedad sing sobra sa 50 ka tuig. Nagaitlog ini kada duha ka tuig, kag sa dagat nagatener sa panahon nga wala ini nagapangitlog. Kinaandan na nga isa lang ang ila pares sa bug-os nila nga kabuhi.

Ang sulog kag munga nga albatross nagabuligay sa paghimo sing pugad, nga nagaumpisa kon Septiembre. Pagka-Nobiembre, ang munga magapangitlog kag ang itlog nagabug-at sing mga 500 gramos. Nagabuligay sila sa paglumlom sini sa sulod sang mga 80 ka adlaw, asta nga magboto ini sa Pebrero. Dayon, nagabulosbulos sila sa pagbantay sa ila piso kag sa pagpakaon sini sing natunaw na nga isda kag lukos nga ila ginluad. Kon anom na ka bulan ang piso, nagabug-at ini sing mga 12 kilos—mas mabug-at pa sangsa daku na nga albatross!

Pagligad sang mga isa ka tuig, ang munga kag sulog magahalin sa Taiaroa Head kag magatener sa dagat sang mga isa naman ka tuig antes magbalik para mangitlog liwat. Sa sini nga tion, ang ila piso nga kompleto na ang bulbol kag nagniwang na nagatuon sa paghumlad sang iya mga pakpak para makalupad. Makadto ini sa dagat diin nagatener ang talin nga mga albatross sa masunod nga pila ka tuig. Dayon, mabalik ini sa Taiaroa Head. Samtang masako ang mas magulang nga mga albatross sa paghimo sing pugad kag pagpangitlog, ining mga talin masako man sa pagpatahom sang ila mga bulbol, paghampang, kag pagpadayawdayaw sang ila ikasarang sa paglupad.

 [Kahon sa pahina 25]

PAGBISITA SA BULUARAN SANG ROYAL ALBATROSS

Halin sang bata pa ako, nanamian gid ako sa mga istorya parte sa albatross, gani gusto ko gid nga makakadto sa buluaran sang mga royal albatross. Mabaskog ang hangin sadto nga adlaw, kag samtang nagapalapit kami sang akon kaupod, nagtangla kami kay basi pa lang may makita kami nga albatross nga nagalupad. Wala gid kami mapaslawi. Sang malapit na ang mga pispis, nakita namon kon daw ano sila katahom maglupad!

Pag-abot namon, nag-upod kami sa grupo sang iban pa nga mga bisita para sa isa ka oras nga tour. Paagi sa modelo nga mga pispis, displey, kag mga video, natun-an namon nga ang northern royal albatross makatener sa dagat sa bug-os sini nga kabuhi kag makatulog pa gani sa tubig! Nagalangoy man ukon nagalupad, dalayawon gid ining matahom nga pispis. Isa gid ini ka rason nga dayawon naton ang ‘nagtuga sang tanan nga butang,’ si Jehova nga Dios!—Bugna 4:11.

 [Retrato sa pahina 24]

Nagabuligay ang munga kag sulog sa pagbantay kag pagpakaon sa ila piso, nga nagabug-at sing mga 12 kilos kon anom na ini ka bulan

[Retrato sa pahina 24, 25]

Ang Taiaroa Head, nga buluaran sang northern royal albatross

[Retrato sa pahina 24]

Ang northern royal albatross makatener sa dagat sa bug-os sini nga kabuhi—makatulog pa gani ini sa tubig

[Picture Credit Lines sa pahina 23]

Top: © David Wall/Alamy; bottom: © Kim Westerskov/Alamy

[Picture Credit Lines sa pahina 25]

Background: © davidwallphoto.com; page 24, top: Tui De Roy/Roving Tortoise Photos; page 24, bottom: Courtesy Diarmuid Toman; page 25, albatross in flight: © Naturfoto-Online/Wolfgang Bittmann