Ang Pagtamod sang Biblia

Mangin Paraiso Pa Bala ang Duta?

SUNO sa mga leyenda sang mga Egiptohanon, Mexicano, Peruvianhon, kag mga Tibetano, may yara kuno panahon sang kalinong sang una nga ang tawo wala sing sala, may maayo nga kaangtanan sa Dios, kag hilway sa balatian kag kamatayon. Ginapakita man sa sini nga mga leyenda kon paano nangin makasasala ang tawo.

Bisan pa ginpatiko kag gindugang-dugangan na, may madamo nga pagkaanggid ini nga mga leyenda kag indi masiling nga natabuan lamang. Gani, madamo ang nakahinakop nga ang mga sugilanon naggikan sa matuod nga mga hitabo. Sa pagkamatuod, may talalupangdon ini nga pagkaanggid sa nagabukas nga mga kapitulo sa tulun-an sang Biblia nga Genesis. Ang Biblia wala nagaunod sang indi mapatihan nga paglaragway subong sa mga leyenda, kundi nagaunod ini sing espesipiko nga mga detalye nga sibu sa maragtas.​—2 Timoteo 3:16.

Isa ka Maayo Gid nga Panugod

Ginasugiran kita sang tulun-an sang Genesis nga sang gintuga sang Dios ang una nga mga tawo nga sanday Adan kag Eva, ginpapuyo niya sila sa isa ka matahom nga duog nga gintawag Hardin sang Eden. May perpekto sila nga panglawas kag may paglaum nga kabuhi nga walay katapusan. Apang kon magpakasala sila, silutan sila sing kamatayon. (Genesis 2:8-17; Roma 5:12) Si Adan kag si Eva ginsugo nga ‘magpanganak kag magdamo kag pun-on ang duta kag dumalahan ini.’ (Genesis 1:28, NW) Magaresulta ini sa bug-os duta nga paraiso nga puno sing perpekto nga tawo nga malipayon nga nagapasakop sa Dios, subong ila gumalahom.

Sing makapasubo, nagrebelde sanday Adan kag Eva sa Dios, gani nadula nila ang kahigayunan nga matuman ang katuyuan sang ila Manunuga kag ang ila paglaum nga mabuhi sing walay katapusan. Walay sapayan sina, tumanon gihapon ni Jehova nga Dios ang iya katuyuan para sa duta. “Manginsubong sini ang akon polong nga nagagowa sa akon baba; indi magbalik ini sa akon sa wala sing pulus,” siling niya, kundi “magauswag ini.” (Isaias 55:11) Sa pagkamatuod, ang katuyuan ni Jehova nga mangin paraiso ang duta kag puy-an sang mga katawhan nga nagapakita sang iya mga kinaiya amo ang panguna nga tema sang Biblia.​—Roma 8:19-21.

“Mangin Kaupod Ko Ikaw sa Paraiso”

Sa gilayon pagkatapos magpakasala sanday Adan kag Eva, nagsaad ang Dios nga magapatubas sia sang “binhi,” ukon kaliwat, nga magalaglag sa “orihinal nga man-ug,” si Satanas nga Yawa, kag magadula sa iya malaut nga mga binuhatan.  (Genesis 3:15; Bugna 12:9; 1 Juan 3:8) Ang panguna nga bahin sinang “binhi” amo si Jesucristo. (Galacia 3:16) Dugang pa, gintangdo sia sang Dios nga Hari sa langitnon nga Ginharian, ukon panguluhan, nga magagahom sa duta.​—Daniel 7:13, 14; Bugna 11:15.

Himuon ni Jesus sing bug-os ang wala mahimo ni Adan. Ang matuod, ginatawag sang Biblia si Jesus nga “katapusan nga Adan.” (1 Corinto 15:45) Dugang pa, sa iya modelo nga pangamuyo, gin-angot ni Jesus ang palaabuton sang duta sa Ginharian sang Dios sang nagsiling sia: “Magkari ang imo ginharian. Matuman ang imo kabubut-on sa duta, subong sang sa langit.”​—Mateo 6:10.

Sang yari si Jesus sa duta, may kinamatarong sia subong palaabuton nga Hari nga magsiling sa mahinulsulon nga kriminal nga ginlansang sa tupad niya: “Mangin kaupod ko ikaw sa Paraiso.” (Lucas 23:43) Ang ginatumod diri ni Jesus amo ang Paraiso diri sa duta suno sa orihinal nga katuyuan sang Dios. Ining kamatuoran maathag nga ginasakdag sang Biblia. Binagbinaga ang masunod nga mga kasulatan.

“Ang mga matarung magapanubli sang duta, kag magapuyo dira sa gihapon.” (Salmo 37:29) “May bugana nga uyas sa duta; sa putokputokan sang kabukiran magahapayhapay ini.” (Salmo 72:16) “Ang matadlong magapuyo sa duta, kag ang himpit magapabilin sa sini.” (Hulubaton 2:21) “Indi sila [ang mga matarong] maghalit ukon maglaglag sa bug-os ko nga bukid nga balaan; kay ang duta matugub sang pagkilala sa GINOO subong nga ang mga tubig nagatabon sang dagat.”​—Isaias 11:9.

Nahisanto sa sina nga mga pahayag, sa iya bantog nga Sermon sa Bukid, si Jesus nagsiling: “Malipayon ang mga malulo, kay magapanubli sila sang duta.” (Mateo 5:5) Sang ulihi, nagsulat si apostol Juan: “Ang tolda sang Dios yara sa mga tawo . . . Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.” (Bugna 21:3, 4) Maathag nga ining mga teksto sa Biblia nagapatuhoy, indi sa langitnon nga “paraiso,” kundi sa pisikal nga paraiso diri sa duta.

Kon Ano ang Ginsiling sang mga Iskolar sa Biblia

Madamo nga mga iskolar sa Biblia ang nagapati nga sa idalom sang Ginharian ni Cristo, ang duta mangin paraiso. Nagsiling ang teologo nga si Joseph A. Seiss: ‘Ang mangin kahimtangan sa ulihi sang bug-os nga duta sa idalom sang Mesias mangin amo gid kuntani kon wala nagpakasala si Adan.’ Sa komentaryo nga The New Testament for English Readers, nagsulat si Henry Alford: “Inang ginharian sang Dios . . . magapanghikot tubtob magamhan sini nga ginharian ang bug-os nga duta, kag ang mga sakop sini magapanubli sang duta . . . , sa ginbag-o kag ginpakamaayo nga kahimtangan sing walay katapusan.”​—Iya ang italiko.

Nagsulat man ang bantog nga sientipiko kag maukod nga estudyante sang Biblia nga si Isaac Newton: “Padayon nga pagapuy-an ang duta sang [mga tawo] sa tapos sang adlaw sang paghukom kag indi lamang sing 1000 ka tuig kundi sing walay katapusan.”

Bangod ang duta mapaidalom sa direkta nga paggahom ni Jesucristo, indi na magaluntad liwat ang kalautan. (Isaias 11:1-5, 9) Huo, mangin paraiso ang bug-os nga duta. Takus gid dayawon ang Manunuga sini sing walay katapusan.

NAMANGKOT KA BALA?

▪ Ano ang orihinal nga katuyuan sang Dios sa katawhan kag sa duta?​—Genesis 1:28.

▪ Ano ang himuon sang Ginharian sang Dios?​—Mateo 6:10.

▪ Ngaa indi na liwat magaluntad ang kalautan?​—Isaias 11:1-5, 9.

[Blurb sa pahina 11]

“Malipayon ang mga malulo, kay magapanubli sila sang duta.”​—Mateo 5:5