1, 2. Ki kestyon nou pou egzaminen e akoz?

ESKI ou’n marye? Si wi, eski ou pe trouv lazwa dan ou maryaz oubyen ou pe fer fas avek bann problenm serye? Eski ou nepli santi ou pros avek ou konzwen? Eski ou pe zis andire dan ou lavi maryaz me selman ou pa santi okenn lazwa? Si wi, i tre probab ki ou sagren akoz sa bon relasyon ki ou ti annan dan ou maryaz in gate. Konman en Kretyen, sirman ou ti pou kontan ki ou maryaz i anmenn loner pour Zeova, sa Bondye ki ou kontan. Me aktyelman, ou sitiasyon i kapab pe fatig ou e sagrin ou. Me menm si sa i leka, silvouple pa bezwen mazinen ki tou in fini.

² I annan bann bon koup Kretyen ozordi ki avan sa zot ti pe zis andire dan zot lavi maryaz, me selman zot relasyon pa ti vreman solid. Pourtan, zot in kapab trouv en mwayen pour fer zot relasyon vin pli for. Ou osi ou kapab ganny plis lazwa dan ou maryaz. Konman?

3, 4. Akoz bann koup marye pou vin pli pros avek kanmarad si zot fer bokou zefor pour vin pli pros avek Bondye? Donn en legzanp.

³ Ou ansanm avek ou konzwen pou pli pros avek kanmarad si zot fer bokou zefor pour vin pli pros avek Bondye. Akoz? Annou pran en legzanp. Esey mazin en montanny ki pwent, anba kot i konmanse i larz e son bout latet anler i pli etrwat. Meton en zonm pe debout dan direksyon nor kot sa montanny i konmanse e en madanm pe debout dan  direksyon sid kot sa montanny i konmanse. Zot tou le de zot konmans grenpe. Kan zot ankor anba, i annan en gran zistans ant zot de. Me anmezir ki zot mont pli anler e pli o lo latet montanny, zot konmans vin pli pre avek kanmarad. Ou vwar ki leson nou kapab tire dan sa legzanp?

⁴ Nou kapab konpar sa zefor ki ou fer pour servi Zeova otan ki ou kapab, avek zefor ki ou fer pour grenp en montanny. Vi ki ou kontan Zeova, ou deza pe travay dir pour grenp sa montanny. Me si ou nepli pros avek ou konzwen, i kapab ki zot pe mont sa montanny lo de kote diferan. Me ki arive o firamezir ki ou grenpe? I vre ki o konmansman zot kapab vreman lwen avek kanmarad. Me pli ou fer zefor pour vin pli pros avek Bondye, konmsi ou pe mont pli o,  pli ou ek ou konzwen pou vin pli pros avek kanmarad, se konmsi zot pou zwenn anler lo latet montanny. Anfet, sa keksoz enportan ki ou bezwen fer pour vin pli pros avek ou konzwen, se ki ou bezwen vin pli pros avek Bondye. Me konman ou kapab fer sa?

5. (a) Nonm en fason ki bann koup marye i kapab vin pli pros avek Zeova e avek kanmarad? (b) Ki mannyer Zeova i vwar maryaz?

⁵ En keksoz enportan ki pou permet ou ek ou konzwen grenp sa montanny, se ki zot bezwen pran aker konsey ki Parol Bondye i donnen lo maryaz. (Psonm 25:4; Izai 48:17, 18) Alors, annou egzamin en pwen spesifik dan konsey ki zapot Pol ti donnen. I ti dir: “Ki maryaz i ganny onore par tou dimoun.” (Ebre 13:4) Ki savedir sa? Sa mo “onore” i ganny servi pour refer avek en keksoz ki presye, ki annan valer pour en dimoun. Koumsan menm ki Zeova i vwar maryaz, i presye e i annan valer pour li.

6. Dapre konteks ki nou aprann lo konsey zapot Pol lo maryaz e akoz i enportan pour gard sa antet?

⁶ Byensir, konman serviter Bondye, ou ansanm avek ou konzwen zot deza konnen ki maryaz i presye, menm sakre. Anfet, Zeova li menm ki ti entrodwir maryaz. (Matye 19:4-6) Me si ou pe rankontre difikilte dan ou maryaz, zis konnen ki maryaz i presye i kapab pa ase pour motiv ou ek ou konzwen pour montre lanmour ek respe anver kanmarad. Me kwa alor ki pou pous zot pour fer sa? Remark byen lafason ki Pol i abord sa size lo ki mannyer nou devret vwar maryaz. I pa ti zis dir ‘maryaz i ganny onore,’ me plito i ti dir ‘ki maryaz i ganny onore.’ I pa ti pe zis fer en remark, i ti pe donn en konsey serye. * Kan ou gard sa antet, sa i kapab  ed ou pour ganny plis motivasyon pour montre ankor enn fwa ki ou konzwen i annan valer pour ou. Akoz sa i kapab leka?

7. (a) Ki komannman dan Labib ki nou swiv e akoz? (b) Ki bon rezilta nou gannyen kan nou obeir?

⁷ Annou aprezan vwar konman ki ou konsider lezot komannman dan Labib, parey sa enn pour fer disip oubyen pour zwenn ansanm pour ador Zeova. (Matye 28:19; Ebre 10:24, 25) I vre parfwa i kapab difisil pour obeir sa bann komannman. Dimoun ki ou pres avek, zot kapab pa ekoute oubyen ou kapab sitan fatige pour asiste renyon apre en lazournen travay. Me kantmenm sa, ou kontinyen pres sa mesaz Rwayonm e ou pa aret asiste ou bann renyon. Personn pa kapab anpes ou, ni menm Satan! Akoz? Akoz ou lanmour senser pour Zeova i pous ou pour obeir son bann komannman. (1 Zan 5:3) Ki bon rezilta sa in anmennen? Kan ou partisip dan sa travay predikasyon e ou asiste renyon, sa i donn ou lape lespri e ofon ou leker ou santi sa lazwa akoz ou konnen ki ou pe fer lavolonte Bondye. E an retour sa bann santiman i donn ou lafors. (Neemya 8:10) Ki leson nou aprann atraver sa?

8, 9. (a) Kwa ki kapab pous nou pour obeir sa konsey pour onor maryaz e akoz? (b) Lekel sa de pwen ki nou pou egzaminen aprezan?

⁸ Sa gran lanmour ofon ou leker pour Bondye i pous ou pour obeir son komannman pour prese e pour zwenn ansanm menm si i pa fasil. Pareyman, ou lanmour pour Zeova i kapab motiv ou pour obeir sa konsey dan Labib pour “ki [ou] maryaz i ganny onore,” menm kan i paret difisil. (Ebre 13:4; Psonm 18:29; Eklezyast 5:4) Deplis, zis parey ou ganny bokou benediksyon sorti kot Bondye kan ou partisip dan predikasyon e asiste renyon, pareyman Zeova pou vwar e beni zefor ki ou fer pour onor maryaz.​—1 Tesalonisyen 1:3; Ebre 6:10.

⁹ Alors, ki mannyer ou kapab onor ou maryaz? Ou  bezwen evite fer okenn keksoz ki kapab kas ou maryaz. E an plis ki sa, ou bezwen fer keksoz ki pou fer sa linyon maryaz vin pli for ankor.

10, 11. (a) Ki kalite kondwit ki pa onor maryaz? (b) Ki kestyon nou devret demann nou konzwen?

¹⁰ En pe letan pase en ser Kretyen ki’n marye ti dir: “Mon priye pour demann Zeova lafors pour andire.” Ki i bezwen andire? I ti eksplike: “Mon msye i bles mwan avek parol. Petet lo mwan ou pa pou vwar bann mark kot i’n bles mwan, me sa ki i konstaman dir mwan i koupe. Tel parey ‘Ou en bourik!’ e ‘Ou en bon nanryen!’ Tou sa i konman en sikatris dan mon leker.” Sa ser in fer resorti en keksoz ki vreman grav, sa i bann parol blesant dan maryaz.

¹¹ Pa i fer lapenn kan bann koup Kretyen ki’n marye i servi bann parol ki vreman dir avek kanmarad, bann parol ki bles en lot emosyonnelman e ki pa fasil geri! I kler ki en lavi maryaz kot msye ek madanm i servi bann parol blesant, i pa onor maryaz. Ki mannyer ou maryaz i ete dan sa domenn? En fason pour konnen i kan avek limilite ou demann ou konzwen: “Ki lefe mon parol i annan lo ou?” Si ou konzwen i santi ki souvan ou parol in bles li emosyonnelman, ou devret pare pour fer sanzman pour ki keksoz i amelyore.​—Galat 5:15; Efezyen 4:31.

12. Ki mannyer Bondye i kapab vwar ki ladorasyon en dimoun pa vo nanryen devan li?

¹² Pa bliye ki parol ki ou dir avek ou konzwen i annan en lefe lo ou relasyon avek Zeova. Labib i dir: “En dimoun ki krwar i relizye, si i pa met en labrid avek son lalang, i pe anbet son lekor. Son [“ladorasyon,” NW] i pa vo nanryen.” (Zak 1:26) Ou parol i annan en lyen direk avek ou ladorasyon. Labib pa dakor avek sa pwennvi ki nenport kwa  ki arive kot lakour i pa telman enportan osi lontan ki en dimoun pe servi Bondye. Silvouple pa bezwen anbet ou lekor. Sa i en keksoz serye. (1 Pyer 3:7) I kapab ki ou annan abilite e ou byen devoue, me si par ekspre ou bles ou konzwen avek ou bann parol, ou pa pe onor maryaz e Bondye i kapab vwar ki ou ladorasyon pa vo nanryen.

13. Ki mannyer en dimoun ki’n marye i kapab bles santiman son konzwen?

¹³ Bann ki’n marye i bezwen veye ki zot pa endirekteman bles santiman zot konzwen. Annou egzamin de legzanp: Souvan en manman ki tousel i telefonn en frer dan kongregasyon ki’n marye pour demann li konsey e zot koze lo telefonn pour en bann letan. En frer selibater li, i pas en bon pe letan sak semenn dan predikasyon avek en ser Kretyen ki’n marye. Sa de dimoun ki’n marye dan sa de legzanp i kapab napa okenn move lentansyon, me kantmenm sa, ki lefe sa i kapab annan lo zot konzwen? En ser ki’n marye ki ti fer fas avek en tel sitiasyon, ti dir: “Kan mon vwar mon msye pe sitan donn son letan ek latansyon en lot ser dan kongregasyon sa i bles mwan. I fer mwan santi mwan enferyer.”

14. (a) Ki lobligasyon ki ganny fer resorti pour bann ki’n marye dan Zenez 2:24? (b) Ki nou devret demann nou lekor?

¹⁴ Nou kapab konpran akoz sa de konzwen ek lezot ki trouv zot dan menm sitiasyon, i kapab santi koumsa. Zot konzwen pe inyor sa lenstriksyon debaz ki Bondye in donnen pour bann ki’n marye: “En zonm pou kit son papa ek son manman e i devret atase avek son madanm.” (Zenez 2:24) Byensir, sa bann ki’n marye zot bezwen kontinyen respekte zot paran, me Bondye i oule ki zot vwar zot lobligasyon anver zot konzwen konman sa keksoz pli enportan. Pareyman, tou vre Kretyen i kontan zot bann frer ek ser spirityel en kantite, me premyerman zot desarz zot responsabilite anver zot konzwen. Me kan en Kretyen ki’n marye,  i pas tro bokou letan oubyen vin tro pre avek en lot Kretyen, sirtou avek en dimoun lot seks, sa i met presyon lo son maryaz. Eski sa i kapab en rezon ki fer annan problenm dan ou maryaz? Demann ou lekor sa kestyon: ‘Eski mon donn mon konzwen mon letan, latansyon ek lafeksyon ki i merite?’

15. Dapre Matye 5:28, akoz en Kretyen ki’n marye i devret veye ki i pa donn tro bokou latansyon en dimoun lot seks?

 ¹⁵ Deplis, bann Kretyen ki’n marye ki donn tro bokou latansyon en dimoun lot seks ki pa son konzwen, pe met son lekor dan en sitiasyon danzere. Nou regrete pour dir ki serten Kretyen ki’n marye in tonm anmoure avek sa bann ki zot ti’n vin tro pros avek. (Matye 5:28) An rezilta sa kalite relasyon ki zot in devlope in fer zot annan en kondwit ki vreman pa onor maryaz ditou. Annou vwar ki zapot Pol ti dir lo sa size.

16. Ki komannman zapot Pol ti donnen konsernan maryaz?

¹⁶ Deswit apre ki zapot Pol ti donn sa konsey “ki maryaz i ganny onore,” i ti donn sa lavertisman: “Ki bann ki’n marye i reste fidel avek kanmarad. Bondye pou ziz bann ki anmenn en lavi dezordonnen e adilter.” (Ebre 13:4) Ler zapot Pol ti dir “reste fidel” i ti pe mazin relasyon seksyel. Sa kalite relasyon i pa “dezordonnen” oubyen sal moralman, si zot ganny pratike selman dan maryaz. Alors, bann Kretyen i pran aker sa parol: “Trouv lazwa avek madanm ou zenntan.”​—Proverb 5:18.

17. (a) Akoz vre Kretyen pa devret les zot ganny enfliyanse par lafason ki lemonn i vwar adilter? (b) Ki mannyer nou kapab swiv legzanp Zob?

¹⁷ Sa bann ki annan relasyon seksyel avek en lot dimoun apard zot konzwen pe demontre en gro mank respe pour lalwa Bondye lo moralite. I vre, ozordi pour bokou dimoun adilter i en keksoz normal. Me nenport kwa ki lezot i kapab panse lo adilter, sa pa devret sanz lafason ki bann Kretyen i vwar li. Zot realize ki finalman pa zonm me ‘Bondye ki pou ziz bann ki anmenn en lavi dezordonnen e adilter.’ (Ebre 10:31; 12:29) Alors, bann vre Kretyen i reste atase avek pwennvi Zeova lo sa size. (Romen 12:9) Pa bliy sa ki  patrias Zob ti dir: “Mon’n fer en lalyans avek mon lizye.” (Zob 31:1) Wi, pour kapab evit okenn keksoz ki kapab fer en dimoun komet adilter, bann vre Kretyen i kontrol zot lizye e zot pa pou kontinyen get en dimoun lot seks ki pa zot konzwen ziska ki zot devlop bann dezir pour sa dimoun.​—Vwar Lezot lenformasyon “Pwennvi Labib lo divors ek separasyon.”

18. (a) Ki kantite serye adilter i ete devan Zeova? (b) Kwa ki parey ant adilter ek ladorasyon zidol?

¹⁸ Ki kantite serye adilter i ete devan Bondye? Lalwa ki ti ganny donnen avek Moiz i ed nou pour konpran pwennvi Zeova lo sa size. Lontan Izrael, si en dimoun ti fer adilter oubyen ador zidol, sa ti de parmi bann lofans ki en dimoun ti kapab ganny met amor. (Levitik 20:2, 10) Eski ou vwar en keksoz ki parey ant sa de lofans ki nou’n mansyonnen? Anfet, en Izraelit ki ti ador zidol ti pe kas son lalyans avek Zeova. Dan menm fason, en Izraelit ki ti fer adilter, ti kas sa lalyans ki i ti fer avek son konzwen. Dan tou le de ka, zot ti bann tret. (Egzod 19:5, 6; Deterononm 5:9; Malaki 2:14) Anfet, tou le de ti koupab devan Zeova, sa Bondye fidel ki nou kapab annan konfyans ladan.​—Psonm 33:4.

19. Kwa ki kapab fer en dimoun pli determinen pour rezet adilter e akoz?

¹⁹ Byensir, bann Kretyen pa anba sa lalwa ki ti ganny donnen avek Moiz. Me kan en Kretyen i rapel ki lontan Izrael si en dimoun ti fer adilter, i ti pe fer en pese grav, alor i kapab pli determinen pour pa fer li. Akoz nou dir sa? Annou fer en konparezon: Eski ou ti pou antre dan en legliz, tonm lo ou de zenou e konmans priye devan en zidol? Petet ou pou dir: ‘Sa zanmen!’ Me si ou ti ganny ofer en kantite larzan pour fer sa, eski ou ti pou ganny lanvi fer li aprezan? Petet ou pou dir: ‘Byensir non!’ Anfet, pour en vre Kretyen mazin ador en zidol e trai Zeova, sa i en keksoz degoutan. Pareyman, nenport kwa ki kapab tant en dimoun pour fer adilter, pour en Kretyen sa nide pour trai Zeova osi  byen son konzwen, i devret en keksoz ki degoutan pour li. (Psonm 51:1, 4; Kolosyen 3:5) Zanmen nou ti pou kontan fer en keksoz ki pou fer Satan kontan, me ki pa pou onor Zeova ek maryaz, ki en laranzman sakre.

20. Ki arive dan lavi maryaz serten dimoun? Donn legzanp.

²⁰ Apard ki rezet kondwit ki kapab pa onor maryaz, ki lezot keksoz ou kapab fer pour reganny sa respe ki ou ti annan pour ou konzwen? Pour reponn sa kestyon, pour en moman esey mazin maryaz konman en lakaz. Apre, mazin bann zoli parol, bon aksyon ek lezot keksoz ki en dimoun i fer pour onor son konzwen, konman bann dekorasyon ki fer sa lakaz pli zoli. Si zot tou le de zot pros avek kanmarad, zot maryaz i parey en lakaz ki’n dekore avek bann dekorasyon, ki fer sa lakaz zoli e i annan en bon latmosfer. Me si ou lafeksyon pour ou konzwen i diminyen, ptitapti sa bann dekorasyon i disparet, ou lavi maryaz i vid parey en lakaz san okenn dekorasyon. Lefet ki ou anvi obeir komannman Bondye pour fer “ki maryaz i ganny onore,” ou pou ganny pouse pour amelyor sitiasyon. Apre tou, en keksoz ki presye e ki annan valer, i vo lapenn repare oubyen aranze. Ki mannyer ou kapab fer sa? Parol Bondye i dir: “Par lasazes en fanmir i ganny batir e par disernman i pou ganny etablir solidman. Par konnesans tou bann lasanm enteryer pou ranpli avek tou keksoz valer ki presye e agreab.” (Proverb 24:3, 4) Annou vwar ki mannyer sa bann parol i kapab aplikab dan maryaz.

21. Ki mannyer ou kapab fer nou maryaz vin for ptitapti? (Vwar osi sa bwat “ Ki mannyer mon kapab amelyor mon lavi maryaz?”)

²¹ Parmi bann ‘keksoz presye’ ki pe ranpli en lakour kot dimoun i ere, i bann kalite parey vre lanmour, lakrent pour Bondye ek en lafwa solid. (Proverb 15:16, 17;  1 Pyer 1:7) Sa bann kalite i fer lavi maryaz vin for. Be eski ou’n remarke konman ki sa bann lasanm in ranpli avek keksoz presye? “Par konnesans.” Wi, kan zot ganny aplike, konnesans dan Labib i annan sa pouvwar pour sanz lafason ki en dimoun i panse e pous bann koup pour renouvle zot lanmour pour kanmarad. (Romen 12:2; Filipyen 1:9) Kan ou ek ou konzwen zot asize ansanm e dan en bon latmosfer zot egzamin en verse Labib, tel parey teks pour lazournen, oubyen en lartik baze lo Labib dan Latour Veyer oubyen Awake! ki relye avek maryaz, i konmsi zot pe get en zoli dekorasyon ki kapab fer zot lakaz vin pli zoli. Kan ou lanmour pour Zeova i pous ou pour aplik sa bann konsey ki ou’n fek egzaminen, dan ou maryaz, i konmsi ou pe anmenn sa dekorasyon dan ou “lasanm enteryer.” An rezilta, serten sa bann kouler ek latmosfer ki ti egziste avan dan ou maryaz i kapab revin ankor.

22. Ki satisfaksyon nou kapab gannyen si nou fer zefor pour zwe nou rol pour ki nou maryaz i vin pli for?

²² I vre i kapab demann en kantite letan ek zefor pour remet sa bann dekorasyon enn par enn kot zot ti ete avan. Me si ou fer bokou zefor pour zwe ou rol, ou pou vreman satisfe akoz ou konnen ki ou pe obeir sa komannman dan Labib ki dir: “Setaki montre plis respe pour kanmarad.” (Romen 12:10; Psonm 147:11) Pli enportan ankor, sa gran zefor ki ou fer pour onor ou maryaz pou fer ou reste dan lanmour Bondye.