Bann Proverb 14:1-35
14 En madanm ki vreman saz i ranforsi son lakaz,Me en madanm ki bet i kas son lakaz avek son prop lanmen.
2 En dimoun ki fer sa ki drwat i annan en gran respe pour Zeova,Me en dimoun ki anbet lezot* pa kontan Bondye.
3 En dimoun ki bet i dir bann keksoz arogan ki parey en baton,Me en dimoun ki saz i dir bann keksoz ki protez li.
4 En park* i prop ler napa bef,Me en toro ki for i fer ganny en kantite rekolt.
5 En temwen ki fidel pa pou koz manti,Me en fo temwen i zis koz manti.
6 En dimoun ki boufonn lezot i rod lasazes e i pa gannyen,Me en dimoun entelizan i ganny konnesans fasilman.
7 Reste lwen avek en dimoun ki bet,Parski ou pa pou aprann nanryen si ou ekout li.
8 Lasazes i ed en dimoun ki pridan pour li konpran kote i pe ale,Me en dimoun ki bet i anbet son lekor.*
9 Bann dimoun ki bet i krwar i gou ler zot fer bann move keksoz,*Me bann dimoun ki fer sa ki drwat i anvi fer lape* avek kanmarad.
10 Zis leker ki konnen ki i sagrenE personn pa kapab santi sa lazwa ki i pe santi.
11 Lakaz bann move dimoun pou ganny detrir,Me latant bann dimoun ki fer sa ki drwat pou vin pli gran.
12 En dimoun i kapab krwar ki en semen i bon,Me finalman i pou mor.
13 Leker en dimoun i kapab dan douler menm si i pe riyeE i kapab zwaye e apre i sagren.
14 En dimoun ki rebele pou peye pour sa ki i’n fer,Me en bon dimoun i ganny rekonpanse pour sa ki i’n fer.
15 En dimoun ki bet* i krwar tou keksoz,Me en dimoun ki pridan i reflesir byen lo sa ki i pou fer.
16 En dimoun ki saz i pridan e i aret fer bann move keksoz,Me en dimoun ki bet i enpridan* e i tro konfidan.
17 En dimoun ki ankoler vitman i fer bann keksoz bet,Me dimoun i ay en dimoun ki reflesir byen.
18 En dimoun ki napa leksperyans* pou vin bet,Me en dimoun ki pridan i ganny konnesans konman en kouronn.
19 Bann move dimoun pou bezwen azenou devan bann bon dimounE bann move dimoun pou azenou kot baro bann dimoun ki fer sa ki byen.*
20 Ler en dimoun i pov, menm son bann prosen i ay li,Me en dimoun ris i annan en kantite zanmi.
21 En dimoun ki pa kontan son prosen i fer pese,Me en dimoun ki demontre konpasyon pour en dimoun pov i zwaye.
22 Eski pa bann dimoun ki fer plan pour fer sa ki mal pou al dan en move semen?
Me bann dimoun pou demontre lanmour* ek fidelite pour en dimoun ki anvi fer sa ki byen.
23 En dimoun i ganny byenfe dan nenport travay dir ki i fer,Me en dimoun ki zis koze i vin pov.
24 Kouronn bann dimoun saz i zot larises,Me bann dimoun ki bet pou reste bet.
25 En temwen ki dir laverite i sov lavi,*Me en temwen ki anbet lezot i zis koz manti.
26 En dimoun ki annan en gran respe pour Zeova i annan en kantite konfyans dan liE sa pou protez son bann zanfan.
27 En gran respe pour Zeova i donn laviE i fer en dimoun aret fer en keksoz ki kapab touy li.
28 Ler en lerwa i diriz en kantite dimoun, sa i fer li ganny glorifye,Me en dirizan ki pa diriz okenn dimoun i en nanryen ditou.
29 En dimoun ki pa ankoler vitman i annan en kantite disernman,Me en dimoun ki napa pasyans i montre ki i bet.
30 En leker kalm i bon pour lasante,*Me zalouzi i en maladi ki manz lezo.
31 En dimoun ki trik en dimoun pov i ensilte sa Enn ki’n fer li,Me en dimoun ki demontre konpasyon pour en dimoun pov i glorifye Bondye.
32 Bann move keksoz ki en move dimoun i fer pou fer li tonbe,Me en dimoun ki fer sa ki byen pou ganny proteze akoz i fidel.
33 Lasazes i reste trankil dan leker en dimoun ki entelizan,Me en dimoun ki bet i bezwen dir sa ki i krwar i konnen.
34 Ladrwatir i glorifye en nasyon,Me pese i fer en pep onte.
35 Lerwa i kontan en serviter ki fer bann keksoz avek bon zizman,Me i ankoler avek en dimoun ki fer bann keksoz ki fer onte.
Bann not
^ Oubyen “ki son semen i tord.”
^ Oubyen “loz.”
^ Oubyen posibleman, “lezot dimoun.”
^ Oubyen “ler zot sipoze aranz keksoz.”
^ Oubyen “i demontre labonte.”
^ Oubyen “napa leksperyans.”
^ Oubyen “vreman ankoler.”
^ Oubyen “ki bet.”
^ Oubyen “dimoun ki drwat.”
^ Oubyen “lanmour fidel.”
^ Ebre, neʹphesh. Vwar Leksplikasyon bann mo.
^ Oubyen “i donn en dimoun lavi.”
