Skip to content

Al lo konteni

 SAPIT 3

Kontan sa bann ki Bondye i kontan

Kontan sa bann ki Bondye i kontan

“Sa ki mars avek bann dimoun saz pou vin saz.”​—PROVERB 13:20.

1-3. (a) Ki Labib i dir ki nou bezwen admet? (b) Ki mannyer nou kapab swazir bann zanmi ki pou ankouraz nou fer sa ki byen?

PAREY leponz, imen i tant pour abzorb oubyen aksepte nenport kwa ki otour zot. I tre fasil pour kopi latitid, fason viv ek karakter bann dimoun ki nou pros avek, menm san ki nou realize.

2 Labib i dir en keksoz ki nou bezwen admet, akoz i vre. I dir: “Sa ki mars avek bann dimoun saz pou vin saz, me sa ki frekant bann enbesil pou mal pase.” (Proverb 13:20) La sa proverb pa pe koz lo letan nou bat avek en dimoun kekpar. Sa lekspresyon “mars avek” i vedir ki nou kontinyen frekant en dimoun. * Remarke ki en referans lo Labib i dir lo sa verse: “Pour mars avek en dimoun i bezwen annan lanmour ek latasman.” Pa ou pou dakor ki nou tant pour imit dimoun ki nou kontan! Anfet, sanmenm sa ki nou fer, akoz ler nou vin atase avek dimoun ki nou kontan, zot kapab enfliyans nou en kantite. E i kapab en bon oubyen move lenfliyans.

3 Pour nou kapab reste dan lanmour Bondye, i tre enportan ki nou fer zanmi avek sa bann ki pou ankouraz nou fer sa ki byen. Me konman nou pou arive fer sa? I senp, nou kapab fer sa kan nou kontan sa bann ki Bondye i kontan e ler nou fer zanmi avek sa bann ki deza son zanmi. Zis mazin sa. Eski i annan pli bon zanmi ki nou kapab trouve  apard sa bann ki annan bann kalite ki Zeova i rode dan son bann zanmi? Bon, i byen alors ki nou egzaminen ki kalite dimoun ki Bondye i kontan. Kan nou byen konn pwennvi Zeova, nou pou pli byen kapab swazir bann bon zanmi.

SA BANN KI BONDYE I KONTAN

4. Akoz Zeova i annan drwa pour swazir lekel ki i oule fer zanmi avek e akoz i ti apel Abraam “mon zanmi”?

4 Pa Zeova i annan tou drwa pour swazir byen avek ki sennla i pou fer zanmi? Apre tou, i Souvren Senyer liniver e napa en pli gran privilez ki en dimoun i kapab gannyen ki vin son zanmi. Alors, lekel ki i swazir konman son zanmi? Zeova i vin pros avek sa bann ki annan konfyans dan li e ki met tou zot lafwa dan li. Annou pran par egzanp, Abraam, en zonm ki ti renonmen pour son lafwa ekstraordiner. Napa en keksoz pli difisil ki ti kapab teste lafwa en Papa, ki si i ti ganny demande pour ofer son garson konman en sakrifis. * Me kantmenm sa, “Abraam ti ofer Izaak [konman] sakrifis,” i pa ti doute “ki Bondye i annan sa pouvwar pour resisit menm en dimoun mor.” (Ebre 11:17-19) Vi ki Abraam ti demontre sa kalite lafwa ek lobeisans, avek lanmour Zeova ti apel li “mon zanmi.”​—Izai 41:8; Zak 2:21-23.

5. Ki mannyer Zeova i vwar sa bann ki fidelman obeir li?

5 Zeova i vreman apresye en kantite sa bann ki fidelman obeir li. I kontan sa bann ki pour zot napa nanryen ki pli enportan ki reste fidel avek li. (2 Samyel 22:26) Parey nou’n vwar dan Sapit 1, Zeova i vreman apresye sa bann ki swazir pour obeir akoz zot kontan li. Proverb 3:32 i dir: “I pros avek bann ki drwat.” Sa bann ki fidelman fer sa ki i demann zot, in ganny en zoli lenvitasyon sorti kot li: Zot kapab vin bann  envite dan son “latant,” pour ador li e apros li dan lapriyer nenport ler.​—Psonm 15:1-5.

6. Konman nou kapab montre ki nou kontan Zezi e ki santiman Zeova i annan pour sa bann ki kontan son Garson?

6 Zeova i kontan sa bann ki kontan Zezi, son sel Garson ki i’n kree. Zezi ti dir: “Si en dimoun i kontan mwan, i ava obei mon lansennyman. Mon Papa pou kontan li, e nou pou vin kot li e nou pou reste avek li.” (Zan 14:23) Konman nou kapab montre ki nou kontan Zezi? Sirman i kan nou obeir son bann komannman, ki enkli sa travay pour pres sa bon nouvel e fer disip. (Matye 28:19, 20; Zan 14:15, 21) Nou osi montre ki nou kontan Zezi kan nou swiv byen son “legzanp,” savedir menm si nou enparfe, nou fer tou nou mye dapre nou abilite pour imit lafason ki i ti koz avek dimoun ek sa ki i ti fer. (1 Pyer 2:21) Sa i tous Zeova en kantite kan i vwar zefor ki bann imen pe fer, sa bann ki zot lanmour pour son Garson i pous zot pour swiv sa semen ki Kris in trase.

7. Akoz nou montre ki nou saz ler nou fer zanmi avek bann ki zanmi Zeova?

7 Serten bann kalite ki Zeova i rode dan son bann zanmi i: lafwa, fidelite, lobeisans, lanmour pour Zezi ek lapresyasyon pour lafason ki i ti viv. I byen ki nou tou nou demann nou lekor: ‘Eski sa bann ki mon pros avek i annan sa bann kalite ek sa bon kondwit? Eski mon’n fer zanmi avek sa bann ki zanmi Zeova?’ Nou montre ki nou saz si nou fer sa. Sa bann ki’n devlop bann kalite ki fer plezir Bondye e ki pres sa bon nouvel Rwayonm avek devouman, zot kapab annan en bon lefe lo nou. Zot kapab ankouraz nou pour kontinyen determinen pour fer plezir Bondye.​—Vwar sa bwat “ Kwa ki fer en dimoun en bon zanmi?”.

TIR LESON AVEK LEGZANP DAN LABIB

8. Kwa ki enpresyonn ou dan sa lanmitye ki ti egziste ant (a) Naomi ek Rit? (b) sa trwa zenn Ebre? (c) Pol ek Timote?

8 Labib i ranpli avek bann legzanp kot bokou ti benefisye  akoz zot ti swazir bann bon zanmi. Ou kapab lir lo sa lanmitye ant Naomi ek son belfiy Rit, ant sa trwa zenn Ebre ki pa ti kit kanmarad en pa ler zot ti Babilonn e ant Pol ek Timote. (Rit 1:16; Danyel 3:17, 18; 1 Korentyen 4:17; Filipyen 2:20-22) Me annou konsantre lo en lot legzanp byen remarkab: sa i David ek Yonatann.

9, 10. Kwa ki ti fer David ek Yonatann annan sa lanmitye antre zot?

9 Labib i dir ki apre ki David ti’n touy Golyat, “Yonatann ti vin atase avek David e Yonatann ti konmans kontan David parey li menm.” (1 Samyel 18:1) Menm si Yonatann ti bokou pli vye ki David, depi sa zour zot ti devlop en lanmitye ki pa ti pou zanmen kase, sa ti leka ziska ki Yonatann ti mor dan batay. * (2 Samyel 1:26) Kwa ki ti fer li posib pour sa de zanmi sitan atase avek kanmarad?

10 Sa lanmour ki zot ti annan pour Bondye ek sa gran determinasyon pour reste fidel ti fer zot atase avek kanmarad. Zot tou le de ti anvi fer plezir Bondye. Se bann kalite ki zot ti annan ki ti fer zot kontan kanmarad. Sirman Yonatann ti’n bezwen enpresyonnen par kouraz ek devouman sa zennonm ki pa ti per pour defann non Zeova. San okenn dout, David ti respekte Yonatann ki ti pli vye ki li, ki ti fidelman siport ladorasyon Zeova e ki olye mazin zis son lekor i ti mazin David premye. Par egzanp, mazin sa ki ti arive ler David ti vreman dekouraze, i ti bezwen mars an tayan dan dezer akoz move Lerwa Sail, papa Yonatann, ti vreman ankoler avek li. Yonatann ti demontre son fidelite avek David dan en fason tre tousan kan i ti pran linisyativ e “al kot David . . . pour ed li annan plis konfyans dan Bondye.” (1 Samyel 23:16) Zis esey mazinen ki mannyer David ti’n bezwen  santi kan i ti vwar son tre bon zanmi pe vini, pe vin donn li sa sipor ek lankourazman! *

11. Ki leson ou tire dan sa lanmitye ant Yonatann ek David?

 11 Ki leson nou tire avek legzanp Yonatann ek David? Pli bon leson ki nou kapab tire dan sa legzanp, se ki keksoz pli enportan pour bann zanmi annan an komen, i keksoz spirityel. Ler nou vin pros avek sa bann ki annan menm krwayans avek nou, ki annan menm pwennvi avek nou lo sa ki byen ek mal e ki osi anvi reste fidel avek Bondye, nou kapab partaz nou pwennvi, santiman ek leksperyans avek kanmarad ki pou ankouraz e batir nou. (Romen 1:11, 12) Parmi nou bann frer ek ser ki ador Zeova nou kapab vwar sa bann tel zanmi ki enterese avek bann keksoz spirityel. Me eski sa i vedir ki tou dimoun ki asiste renyon kongregasyon kot Lasal Rwayonm i en bon zanmi? Non, pa neseserman.

VEYE LEKEL OU VIN PROS AVEK

12, 13. (a) Akoz nou bezwen fer atansyon lekel ki nou frekante menm parmi bann Kretyen? (b) Ki difikilte bann Kretyen dan premye syek ti bezwen fer fas avek e ki lavertisman sa ti pous Pol pour donnen?

 12 Menm dan kongregasyon, si nou anvi ganny batir spirityelman, nou pou bezwen byen swazir lekel ki nou pou frekante. Eski sa i devret sirprann nou? Pa vreman. Serten Kretyen dan kongregasyon i kapab pran bokou letan avan ki zot vin matir spirityelman, zis parey serten fri lo en pye dibwa i kapab pran plis letan pour zot mir. Anfet, nenport ki kongregasyon ki ou ale, ou pou zwenn bann Kretyen avek diferan nivo spirityalite. (Ebre 5:12–6:3) Byensir, nou demontre lanmour ek pasyans anver bann nouvo ek bann ki feb, akoz nou ti a kontan ki zot vin for spirityelman.​—Romen 14:1; 15:1.

13 Parfwa, en sitiasyon i kapab leve dan kongregasyon ki fer ki nou pou bezwen vey byen lekel nou frekante. Serten i kapab fer bann keksoz ki pa apropriye. Lezot i kapab konmans gard rankin oubyen konmans konplent. Bann Kretyen dan premye syek N.L. ti fer fas avek menm difikilte. Menm si lamazorite ti reste fidel, serten pa ti azir dan en bon fason. Lefet ki dan kongregasyon Korent ti annan ki pa ti swiv serten lansennyman Kretyen, zapot Pol ti bezwen averti sa kongregasyon: “Pa les zot ganny anbete: ‘Move frekantasyon, i gat repitasyon.’” (1 Korentyen 15:12, 33) Pol ti menm averti Timote ki menm parmi bann Kretyen i kapab annan serten ki pa fer sa ki byen. Pol ti dir Timote pour reste lwen avek sa bann ki azir dan sa fason, pour li pa vin pros avek zot.​—2 Timote 2:20-22.

14. Ki mannyer nou kapab aplik sa prensip ki trouve dan sa konsey ki Pol ti donnen konsernan frekantasyon?

14 Ki mannyer nou kapab aplik sa prensip ki trouve dan sa konsey ki Pol ti donnen? Se kan nou fer sir ki nou pa  vin pros avek personn, ki swa en Kretyen oubyen enn ki pa Temwen Zeova, ki kapab enfliyans nou pour fer sa ki mal. (2 Tesalonisyen 3:6, 7, 14) Nou bezwen veye pangar nou perdi nou spirityalite. Pa bliye, parey en leponz nou kapab abzorb oubyen imit latitid ek fason viv nou bann bon zanmi. Nou konnen ki si nou tranp en leponz dan vineg nou pa kapab ekspekte ki i pou gonfle avek delo. Alors nou pa kapab frekant bann ki annan en move lenfliyans e ekspekte ki zot pou annan en bon lefe lo nou.​—1 Korentyen 5:6.

Ou kapab ganny bann bon zanmi parmi bann frer ek ser Kretyen

15. Ki ou kapab fer pour trouv bann zanmi dan kongregasyon ki fer bokou zefor pour reste for spirityelman?

15 Gran mersi i annan bokou sans ki nou pou kapab trouv bann bon zanmi dan kongregasyon Kretyen. (Psonm 133:1) Ki mannyer ou kapab trouv bann zanmi dan kongregasyon ki fer bokou zefor pour reste for spirityelman? Anmezir ki ou devlop bann kalite e azir dan en fason ki fer plezir Bondye, san dout sa bann ki pe esey fer menm keksoz avek ou, pou anvi vin pros avek ou. Me an menm tan, ou menm ou pou bezwen bouze pour al ver lezot e pran linisyativ pour fer nouvo zanmi. (Vwar sa bwat “ Konman nou ti fer bon zanmi.”) Fer zanmi avek sa bann ki ou vwar i annan bann kalite ki ou ti a kontan annan. Pran aker sa konsey dan Labib pour ‘ouver gran ou leker.’ Kan ou pe fer zanmi avek ou bann frer ek ser pa bezwen gete ki ras zot ete, zot nasyonalite oubyen kiltir. (2 Korentyen 6:13; 1 Pyer 2:17) Pa bezwen frekant zis bann ki dan ou laz. Pa bliye, Yonatann ti bokou pli vye ki David. Si ou fer zanmi avek bann ki pli aze ki ou, zot kapab ed ou ganny leksperyans ek lasazes.

KAN SITIASYON I VIN DIFISIL

16, 17. Si enn nou frer oubyen ser i ofans nou dan en fason ou en lot, akoz nou devret toultan reste fidel avek kongregasyon?

16 Vi ki dan kongregasyon sakenn i annan son personnalite, nou tou nou’n grandi dan diferan sirkonstans, sa i fer ki  tanzantan i kapab annan bann problenm. Enn nou frer oubyen ser Kretyen i kapab dir oubyen fer en keksoz ki ofans nou. (Proverb 12:18) Parfwa bann difikilte i egziste akoz sakenn i annan diferan personnalite, akoz zot in mal konpran en keksoz, oubyen akoz zot napa menm lopinyon lo serten topik. Eski nou pou les sa bann difikilte fer nou tonbe e aret asosye avek kongregasyon? Nou pa pou zanmen fer sa si nou vreman kontan Zeova ek sa bann ki i kontan.

17 Konman nou Kreater e sa Enn ki gard nou vivan, Zeova i merite ganny nou lanmour ek tou nou devosyon. (Revelasyon 4:11) E osi, nou merite fidelman siport sa kongregasyon ki i kontan pour servi. (Ebre 13:17) Alors, si enn nou frer oubyen ser i ofans nou oubyen dezapwent nou dan en fason ou en lot, nou pa pou kit kongregasyon zis pour montre ki nou pa kontan sa ki’n arive. Pa i pou mal pour fer sa? Pa Zeova ki’n ofans nou. Si nou kontan Zeova nou pou toultan reste fidel avek li ek son pep.​—Psonm 119:165.

18. (a) Ki nou kapab fer pour gard lape dan kongregasyon? (b) Ki benediksyon nou gannyen ler nou pare pour pardonnen kan i annan bon rezon pour fer li?

 18 Nou lanmour pour nou bann frer ek ser i pous nou pour gard lape dan kongregasyon. Sa bann ki Zeova i kontan i enparfe e Zeova i konn sa byen, alors nou osi nou devret gard sa antet. Si nou kontan nou bann frer ek ser nou pou kapab les pase bann pti fot ki zot fer, akoz nou konnen ki nou tou nou enparfe e fer fot. (Proverb 17:9; 1 Pyer 4:8) Nou lanmour pou fer li posib pour nou “pardonn kanmarad sak fwa” ki nou ganny ofanse. (Kolosyen 3:13) I pa toultan fasil pour met sa konsey an pratik. Si nou pa arive kontrol nou santiman negatif, nou kapab tant pour gard rankin, petet nou menm kapab krwar ki ler nou ankoler nou pe pini sa enn ki’n ofans nou. Me laverite se ki ler nou gard rankin sa i kapab fer nou dimal. Kan nou pare pour pardonnen ler i annan bon rezon pour fer li, sa i fer nou ganny bokou benediksyon. (Lik 17:3, 4) Sa i fer nou viv anpe, i anpes annan diskord dan kongregasyon e pli enportan ankor, nou kapab protez nou relasyon avek Zeova.​—Matye 6:14, 15; Romen 14:19.

KAN NOU BEZWEN ARET FREKANT EN DIMOUN

19. Ki sitiasyon ki kapab egziste ki fer ki nou pou bezwen aret frekant serten dimoun?

19 Parfwa nou ganny demande pour aret frekant en dimoun ki ti nou frer oubyen ser Kretyen. Sa i arive kan en dimoun i ganny ekskli dan kongregasyon akoz i pa oule repantir apre ki i’n kas lalwa Bondye, oubyen kan enn i rezet vre lansennyman pour ansenny sa ki fo. E osi kan en dimoun i deside pour nepli ganny rekonnet konman en Temwen Zeova. Parol Bondye i dir nou klerman ki nou “pa devre asosye” avek zot. * (1 Korentyen 5:11-13; 2 Zan  9-11) I kapab vreman difisil pour nou pa frekant en dimoun ki petet ti nou zanmi oubyen ki nou fanmir. Eski nou pou determinen pour fer sa ki byen, montre ki pour nou i pli enportan pour reste fidel avek Zeova ek son bann lalwa ki drwat? Pa zanmen bliye ki Zeova i vreman apresye nou fidelite ek lobeisans.

20, 21. (a) Akoz sa laranzman pour ekskli en dimoun i en fason pour demontre lanmour? (b) Akoz i tre enportan pour byen swazir nou zanmi?

20 Sa disiplin pour ekskli en dimoun ki pa repantir dan kongregasyon, i en laranzman ki Zeova in fer avek lanmour. Ki mannyer sa? Kan en dimoun ki pa repantir i ganny ekskli, sa i montre ki nou kontan sa non Zeova ki sen e osi tou sa ki sa non i reprezante. (1 Pyer 1:15, 16) Ler en dimoun i ganny ekskli sa i fer ki kongregasyon i reste an sekirite. Bann ki fidel dan kongregasyon i kapab ganny proteze kont move lenfliyans sa bann ki volonterman fer pese e zot kapab kontinyen ador Zeova akoz zot konnen ki kongregasyon i en landrwa kot zot kapab ganny proteze kont sa move lemonn. (1 Korentyen 5:7; Ebre 12:15, 16) Kan en dimoun i ganny disiplinen dan sa fason, akoz son pese, sa i en fason pour montre lanmour. I kapab sanmenm sa ­disiplin ki i bezwen pour ed li sanz son latitid e pour li pran bann pa neseser pour retourn kot Zeova.​—Ebre 12:11.

21 Dimoun ki nou vin pros avek i kapab annan en gro lefe lo nou, zot kapab enfliyans nou en kantite e sa i larealite. I tre enportan alors pour nou byen swazir lekel ki nou pou frekante. Kan nou fer zanmi avek sa bann ki zanmi Bondye, kontan sa bann ki Bondye i kontan, nou pou annan bann pli bon zanmi dan nou kote. Sa ki nou aprann avek zot pou ed nou reste determinen pour fer plezir Zeova.

^ par. 2 Sa mo Ebre ki’n ganny tradwir “sa ki frekant,” i osi kapab ganny tradwir konman asosye oubyen vin zanmi.​—Ziz 14:20; Proverb 22:24.

^ par. 4 Kan Zeova ti demann Abraam pour sakrifye Izaak, i ti pe montre ki kalite sakrifis ki li menm i ti pou fer letan ki i ti pou ofer son sel Garson ki i’n kree li tousel. (Zan 3:16) Me dan ka Abraam, Zeova ti anpes li touy son garson, i ti donn li en mouton pour sakrifye dan plas Izaak.​—Zenez 22:1, 2, 9-13.

^ par. 9 David ti zenn, “ankor en garson,” kan i ti touy Golyat. E kan Yonatann ti mor i ti dan son 30 an. (1 Samyel 17:33; 31:2; 2 Samyel 5:4) Vi ki Yonatann ti mor apepre a laz 60 an, i kler ki i ti apepre 30 an pli vye ki David.

^ par. 10 Parey nou kapab vwar dan 1 Samyel 23:17, Yonatann ti dir senk keksoz pour ankouraz David: (1) I ti dir David pa bezwen per. (2) I ti asir David ki tou bann zefor Sail pou tonm dan delo. (3) I ti rapel li ki i pou vin lerwa, zis parey Bondye ti’n promet. (4) I ti promet ki i pou reste fidel avek David. (5) I ti dir David ki Sail ti konnen ki li Yonatann ti pou reste fidel avek li.

^ par. 19 Si ou oule konn plis lenformasyon lo konman pour konsider sa bann ki’n ganny ekskli e ki’n deside pour nepli ganny rekonnet konman en Temwen Zeova, vwar Lezot lenformasyon “Ki relasyon nou devret annan avek en dimoun ki’n ganny ekskli dan kongregasyon?