Skip to content

Al lo konteni

 LEZOT LENFORMASYON

Pwennvi Labib lo divors ek separasyon

Pwennvi Labib lo divors ek separasyon

Zeova i ekspekte bann ki’n marye pour reste fidel avek zot ve maryaz. Ler Zeova ti ini ansanm sa premye zonm avek son madanm, i ti dir: “En zonm . . . i devret atase avek son madanm e zot devret vin en sel laser.” Pli tar, Zezi ti dir menm parol e i ti azoute: “Alor sa ki Bondye in ini ansanm zonm pa devre separe.” (Zenez 2:24; Matye 19:3-6) I evidan ki Zeova ek Zezi i konsider maryaz konman en lyen pour lavi diran ki fini selman letan enn ant sa de dimoun i mor. (1 Korentyen 7:39) Maryaz i en laranzman sakre, pour sa rezon divors i en keksoz serye. Anfet, Zeova i deteste divors ki napa en rezon valab dapre Labib.​—Malaki 2:15, 16.

 Ki rezon ki an annakor avek Labib ki permet divorse? An realite, Zeova i deteste adilter ek fornikasyon. (Zenez 39:9; 2 Samyel 11:26, 27; Psonm 51:4) Anfet, fornikasyon i telman mal ki i en rezon ki permet en dimoun pour divorse. (Dan Sapit 9 paragraf 7, i donn plis detay lo ki si sa egzakteman fornikasyon.) Zeova i donn sa konzwen inosan sa drwa pour li swazir pour reste avek sa enn ki’n fer fornikasyon ouswa pour rod en divors. (Matye 19:9) Alors, si sa konzwen inosan i deside pour rod son divors, i pa pe fer en keksoz ki Zeova i kondannen. Parkont, kongregasyon Kretyen pa ankouraz personn pour rod divors. Annefe, serten sirkonstans i kapab pous sa konzwen inosan pour reste avek son konzwen, sirtou si i senserman repantir. An tou ka, dimoun ki annan en rezon ki annakor avek Labib pour divorse i devret fer son prop desizyon e aksepte nenport konsekans ki vin avek.​—Galat 6:5.

Dan serten sitiasyon tre grav, serten Kretyen i kapab deside pour rod en separasyon oubyen divors menm si sa lot pa’n fer fornikasyon. Dan en ka parey, Labib i dir ki i devret “reste tousel ou sinon retourn avek son mari.” (1 Korentyen 7:11) En tel Kretyen pa kapab rod en lot dimoun pour li marye avek pli tar. (Matye 5:32) La enn de ka eksepsyonnel ki kapab en rezon pour de dimoun separe.

Volonterman pa soutenir finansyerman son fanmir. En fanmir i kapab vreman mizer e napa bann keksoz debaz akoz sa msye pa fourni sa ki neseser menm si i ti kapab fer li. Labib i dir: “Si en dimoun i pa port swen . . . bann ki viv dan son lakaz, i’n abandonn lafwa e i pir ki en non-krwaryan.” (1 Timote 5:8) Si sa msye pa oule sanze, son madanm pou bezwen deside si i bezwen protez son lekor ek son zanfan par rod en separasyon legal. Byensir,  bann ansyen i devret egzamin seryezman en ka kot en Kretyen pa oule soutenir finansyerman son fanmir. Si i persiste i kapab ganny ekskli dan kongregasyon.

Labi fizik tre grav. En konzwen vyolan i kapab sitan abiz fizikman son konzwen ki son lasante oubyen menm son lavi i an danze. Si tou le de msye ek madanm i Kretyen, bann ansyen i devret egzamin sa sitiasyon. Annan labitid pour pran lakoler oubyen vyolan i en rezon ki en dimoun i kapab ganny ekskli dan kongregasyon.​—Galat 5:19-21.

Si sa konzwen i fer li enposib pour ou servi Bondye. En msye oubyen en madanm i kapab toultan pe sey fer li enposib pour son konzwen servi Bondye oubyen menm fors son konzwen pour kas bann lalwa Bondye dan en fason ou lot. Dan en tel ka, sa konzwen ki an danze pou bezwen deside si dan son ka i bezwen rod en separasyon legal pour li “obei Bondye plito ki zonm.”​—Akt 5:29.

Dan tou sa bann sitiasyon vreman grav ki nou fek diskite, personn pa devret met presyon lo sa konzwen ki inosan pour separe oubyen reste. Menm si lezot Kretyen matir ek bann ansyen i kapab donn led ek konsey ki baze lo Labib, zot pa kapab konn tou detay ki pe arive dan lavi sa koup. Selman Zeova ki konn tou. Byensir, en madanm oubyen en msye Kretyen pa ti pou onor Bondye oubyen maryaz si i ti pe egzazer problenm kot lakour pour li kapab viv tousel. Zeova i vwar si en dimoun pe fer plan pour li kapab separe menm si i esey kasyet sa. An realite, tou keksoz “i ekspoze devan lizye sa enn avek ki nou bezwen rann kont.” (Ebre 4:13) Me si en sitiasyon byen danzere i kontinyen, personn pa devret kritik en Kretyen ki finalman deside pour separe. A lafen di zour, “nou tou nou pou paret devan Bondye pour ganny zize.”​—Romen 14:10-12.