Biaceihtu 9:1-57
9 A hnuah Jerubbaal fapa Abimelek cu Shekhem khua ah a va kal i a nu ṭale le a dang a pu chungkhar dihlak kha hitin a ti hna:
2 “‘Jerubbaal fapa 70 ning in uk maw a ṭha deuh asiloah mi pakhat nih uk dah a ṭha deuh? Kei zong nan thi le nan sa ka si kha philh hlah u’ tiah Shekhem khua hruaitu hna* kha va chim hna u.”
3 A nu ṭale nih Shekhem khua hruaitu hna kha cutin an va chimh hna tikah annih nih Abimelek hnu zulh kha an hun duh i “Anih cu kan unau pei a si cu” tiah an ti.
4 Annih nih Baal-berith biakinn in ngun tangka 70 kha an lak i an pek. Abimelek nih mah tangka cun rian a ngei lomi mi hrokhrol pawl kha a hnu zulh awkah a hlan hna.
5 Cun Ofrah khua i a pa Jerubbaal inn ah a kal i a unau 70 kha lung pakhat cung ah a thah hna. Jerubbaal fapa a hniang bik Jotham lawnglawng aa thup i a luat.
6 Shekhem hruaitu vialte le Bethmillo ralhruang ah a ummi vialte cu Shekhem khua i thingkung nganpi pawng ah a ummi lungphun ah an i pum i Abimelek kha siangpahrang ah an ser.
7 Mah kong cu Jotham kha an chimh tikah Gerizim tlangpar ah a va kai colh i hitin thangpi in a au: “Shekhem hruaitu hna, ka bia ngai tuah u. Cutin nan tuah ahcun Pathian zong nih nan bia a ngaih ve lai.
8 “Voikhat cu thingkung hna nih anmah a uktu ding siangpahrang kha chiti thuh awkah an i thawh. Oliv kung kha ‘Rak kan uk’ tiah an ti.
9 Oliv kung nih ‘Pathian le minung thangṭhatnak ah hmanmi chiti chuah ti loin maw a dang thingkung cu ka uk hna hnga?’ tiah a leh hna.
10 Cun theipi kung sinah an kal i ‘Ra law rak kan uk’ tiah an ti.
11 Theipi kung nih ‘Ka thei thlumthlum tlai ti loin maw a dang thingkung cu ka uk hna hnga?’ tiah a leh hna.
12 Mah hnuah mitsur ruang kha ‘Ra law rak kan uk’ tiah an ti.
13 Mitsur ruang nih cun ‘Pathian le minung lung a lawmhtermi mitsur zu thar chuah ti loin maw a dang thingkung cu ka uk hna hnga?’ tiah a leh hna.
14 A donghnak ah thingkung vialte nih hlingbur kha ‘Ra law rak kan uk’ tiah an ti.
15 Mah tikah hlingbur nih thingkung hna kha ‘Nanmah uk awkah siangpahrang in chiti nan ka thuh taktak ahcun ra u law ka thladem tang ah i dor u. Cutin a si lo ahcun ka chung in mei a chuak lai i Lebanon Tlang sidar kung kha a kangh dih lai’ tiah a leh hna.
16 “Abimelek siangpahrang ah nan sermi cu zumhawktlak tein le upat awk tlak in kan tuahmi a si tiah maw nan ruah, Jerubbaal le a chungkhar cung ah hitihin maw ṭhatnak nan langhter i hmuh awkah aa tlakmi ning in nan pehtlaih?
17 Midian mi hna sinin nanmah khamh awkah ka pa cu a nunnak hmanh thap in ral a rak do.
18 Asinain nihin ah ka pa innchungkhar kha nan ralchanh hna i a fapa 70 kha lung pakhat cung ah nan thah hna. Cun a salnu fapa Abimelek kha nan unau a si ca men ah Shekhem hruaitu hna a uktu siangpahrang ah nan ser.
19 Nihin ah Jerubbaal le a chungkhar cung ah zumhawktlak tein le upat awk tlak tein nan tuahmi a si ahcun Abimelek cung ah i lawm u law anih zong nan cung ah i lawm ve seh.
20 Cutin a si lo ahcun Abimelek chung in mei chuak seh law Shekhem hruaitu hna le Bethmillo ah a ummi hna cu kang hna seh. Cun Shekhem hruaitu le Bethmillo ah a ummi hna sinin mei chuak seh law Abimelek cu kang seh.”
21 Cutin a chim hnuah Jotham nih a upa Abimelek kha a ṭih caah a zam i Beer khua ah a va um.
22 Abimelek nih Israel ram kha kum thum chung a uk.
23 Pathian nih Abimelek le Shekhem hruaitu hna karlak ah ralnak a chuahter caah hruaitu hna nih Abimelek cu an rawi.
24 Cutin a canmi cu puarhrangpi in thah a simi Jerubbaal fapa 70 caah phuhlam awkah a si. A unau a thattu Abimelek le cutin thah awkah a bawmmi Shekhem hruaitu hna kha an tuahsernak ruang ah dantat an si nakhnga caah a si.
25 Shekhem hruaitu hna nih a thli tein Abimelek bawh awkah tlangpar ah mi an chiah hna. Annih nih cuka lam in a rami paoh kha an thil an chuh hna. Mah kong cu Abimelek nih a theih.
26 Ebed fapa Gaal cu a unau hna he Shekhem ah an rak i ṭhial i Shekhem hruaitu hna nih amah cu an hun i bochan.
27 Annih cu mitsur dum ah an kal, mitsur thei kha an lawh, an nen i puai an tuah. Cu hnuah an pathian inn ah an kal, an ei, an ding i Abimelek cu chiat an serh.
28 Ebed fapa Gaal nih hitin a ti: “Jerubbaal fapa Abimelek cu ahodah a si? Shekhem khua bawi in rian a pekmi Zebul cu ahodah a si? Zeicah an rian cu kan ṭuan lai? Shekhem pa Hamor tefa hna rian tu kha ṭuan u. Zeicah Abimelek rian cu kan ṭuan lai?
29 Hi mi hna nih ka bia an ngaih ahcun Abimelek cu ka ṭhumh lai.” Cu hnuah Abimelek kha “Na ralkapbu cu nganter law rak ka do” tiah a zuamcawh.
30 Ebed fapa Gaal chimmi kha khua bawi Zebul nih a theih tikah a thin a hung tuk.
31 Cucaah Abimelek sinah a thli tein mi a hei thlah hna i “Ebed fapa Gaal le a unau hna cu atu Shekhem ah an um i nangmah ralchanh awkah khuami kha an forh hna.
32 Cucaah nangmah le na mi hna cu zan ah ra u law khua leng in hngak u.
33 Ni a chuahle cangka khua cu rak do u. Gaal le a mi hna cu nanmah doh awkah an rak chuah tikah zeiti lam paoh in tei awkah i zuam” tiah a ti.
34 Abimelek le a mi vialte cu zan ah an i thawh. Phuli ah an i ṭhen i Shekhem khua leng in an hngah.
35 Ebed fapa Gaal cu khua hauka ah a va dir tikah Abimelek le a mi hna zong an i thuhnak in an rak chuak ve.
36 Gaal nih mi a hmuh hna tikah “Zoh hmanh! Tlangpar in mi an rak ṭum khih” tiah Zebul kha a ti. Asinain Zebul nih “Tlang thla khi minung bantuk in na hmuh i a si ko lai” tiah a ti.
37 A hnuah Gaal nih “Zoh hmanh! Tlangbo laifang in mi an rak ṭum khih. Phukhat cu Meo-menim thingkung nganpi lei in an ra” tiah a ti ṭhan.
38 Mah tikah Zebul nih “Abimelek cu ahodah a si i a rian cu kan ṭuan lai tiah i porhlaw ngai in na rak chim kha na philh cang maw? Annih cu na nautat ngaimi kha an si lo maw? Atu tho law do hna ngat” tiah a ti.
39 Cucaah Gaal nih Shekhem hruaitu hna kha a hruai hna i Abimelek cu an va doh.
40 Abimelek nih a rak doh ve tikah Gaal cu a zam. Khua hauka tiang lam thluangthluan mi tampi thah an si.
41 Abimelek cu Arumah ah a um rih. Zebul nih Gaal le a unau hna kha Shekhem in a ṭhawl hna.
42 A thaizing ah mi cu khua leng ah an chuak. Mah kong kha Abimelek nih a theih tikah,
43 a mi kha phuthum ah a ṭhen hna i khua leng in an bawh hna. Khua chung in mi an rak chuah tikah an doh hna i an thah hna.
44 Abimelek le a sinah a ummi hna cu an va tli i khua hauka ah hmun an la. Mah lioah a dang phuhnih nih khua leng ah a ummi vialte kha an doh hna i an thah hna.
45 Abimelek nih khua kha chun nitlak a doh i a lak. Khuami kha a thah hna, khua kha a hrawh dih i cite a vorh.
46 Shekhem innsang cung ah a ummi hruaitu hna nih mah kong kha an theih tikah El-berith biakinn tang i khor chung ah an va lut colh.
47 Shekhem innsang ah a ummi hruaitu hna cu hmunkhat ah an i pum ti kha Abimelek nih a theihle cangka,
48 a mi dihlak he Zalmon Tlang ah an kai. Abimelek nih hreitlung kha a lak i thingnge pakhat kha a sam, a liang ah aa khinh i “Ka tuah ning tein tuah zokzok ve u” tiah a ti hna.
49 A mi hna zong nih thingnge cu an sam i Abimelek cu an zulh. Thingnge cu khor velchum ah an chiah i mei an duah. Cucaah Shekhem innsang ah a ummi vialte zong an thi dih. Nu he, pa he 1,000 hrawng an si.
50 Cun Abimelek cu Thebez ah a kal, khua cu a kulh i a lak.
51 Khua laifang ah a fek ngaimi innsang a um. Nu he, pa he, khua hruaitu hna he cuka ah an va tli, an i kharkhumh i innsang cungcih tiang an kai.
52 Abimelek nih innsang cu a rak doh. Innka kha mei in duah awkah a rak naih tikah,
53 nu pakhat nih Abimelek kha facang rialnak a cunglei lung a thlak hnawh i a lu a kuai.
54 A hriamnam putu a hnu zul kha a auh zokzok i “‘Nu pakhat nih a thah’ tiah mi nih an ka ti nakhnga lo na vainam kha zuk law rak ka that” tiah a ti. A hnu zul nih cun vainam in a sawh i a thi.
55 Abimelek a thih kha an hmuh tikah Israel mi vialte cu an inn cio ah an tlung.
56 Cuticun a unau 70 kha a thah hna i a pa cung ah thil ṭhalo a tuahmi ruang ah Abimelek cu Pathian nih teirul a cham.
57 Cun Pathian nih Shekhem mi hna i an ṭhatlonak kha anmah lu cung lila ah a tlakter. Cuticun Jerubbaal fapa Jotham chimmi chiatserhnak bia cu an cung ah a tlung.
Footnotes
^ Asiloah “vawlei ngeitu hna” ti zong a si kho.
