Biaceihtu 10:1-18
10 Abimelek a thih hnuah Issakhar phun Dodo fapa, Puah fapa Tola cu Israel mi khamh awkah a hung chuak. Anih cu Efraim tlangram Shamir khua ah a um.
2 Israel mi kha kum 23 chung bia a ceih hna hnuah a thi i Shamir khua ah an vui.
3 Tola hnuah Gilead mi Jair cu a hung chuak i Israel mi kha kum 22 chung bia a ceih hna.
4 Jair cu fapa 30 a ngei. A fapale nih laa pakhat cio le khua pakhat cio an ngei. Mah khua 30 cu nihin ni tiang Havvoth-jair tiah auh a si i Gilead ram ah a um.
5 Jair cu a thi i Kamon khua ah an vui.
6 Israel mi nih Jehovah mithmuh ah thil ṭhalo kha an tuah ṭhan. Baal pathian, Ashtoreth milem, Aram* pathian, Sidon pathian, Moab pathian, Ammon pathian le Filistin pathian hna kha an hun biak. Jehovah kha an hlawt i an bia ti lo.
7 Cucaah Jehovah thinhunnak cu Israel mi cung ah a alh i Filistin mi le Ammon mi sinah a zuar hna.
8 Mah kum ah Israel mi kha an namneh hna i fakpi in an hrem hna. Amor mi hna ram a rak simi Jordan khattalei ral i Gilead ram ah Israel mi kha kum 18 chung an hrem hna.
9 Ammon mi cu Judah phun, Benjamin phun le Efraim phun doh awkah Jordan Tiva kha an rak tan. Cucaah Israel mi cu fakpi in harnak an tong.
10 Israel mi cu Jehovah sinah bawmh hal in an au i “Kan Pathian, nangmah cu kan in kaltak i Baal kha kan biak caah na cung ah kan sual cang” tiah an ti.
11 Jehovah nih Israel mi kha hitin a ti hna: “Izipt mi, Amor mi, Ammon mi, Filistin mi,
12 Sidon mi, Amalek mi le Midian mi nih an in hrem hna tikah kaan khamh hna, a si ko lo maw? Ka sinah bawmh hal in nan au tikah an kut chung in ka rak in khamh hna.
13 Asinain nan ka hlawt i pathian dang kha nan biak caah kaan khamh ti hna lai lo.
14 Nan i thimmi pathian hna sinah cun va kal u law bawmh va hal hna ngat u. Annih nih harnak chung cun in khamh ko hna seh.”
15 Israel mi nih Jehovah kha “Kan sual cang ko. A ṭha na ti ning paoh in tuah ko. Asinain tutan te hi cu zaangfahnak in rak kan khamh ko” tiah an nawl.
16 Cun an lakah a ummi ramdang mi pathian hna kha an hlonh dih i Jehovah cu an biak. Cucaah Israel mi nih harnak an tonmi kha Pathian nih a ing kho ti lo.
17 A hnuah Ammon mi cu hmunkhat ah an i pum i Gilead ah riahhmun an khuar. Israel mi zong hmunkhat ah an i pum ve i Mizpah ah riahhmun an khuar.
18 Gilead rammi le an bawi pawl nih “Ammon mi doh awkah aho nih dah a kan hruai lai? Anih cu Gilead ram ah a ummi vialte hruaitu siseh” tiah pakhat le pakhat an i ti.
Footnotes
^ Asiloah “Siria.”
