Biaceihtu 6:1-40
6 Israel mi nih Jehovah mithmuh ah thil ṭhalo kha an tuah ṭhan. Cucaah Jehovah nih Midian mi hna kut ah kum sarih chung a chanh hna.
2 Midian mi nih Israel mi kha an hrem hna. Midian mi hna ruang ah Israel mi nih tlang cung, lungkua le kal a harnak hmun hna ah i thuhnak kha an ser.
3 Israel mi nih thlaici an tuh tikah Midian mi, Amalek mi le Nichuahlei mi nih an rak doh hna.
4 Israel mi doh awkah riahhmun an khuar i Gaza tiang an cinthlakmi vialte kha an hrawh dih. Israel mi caah ei awk siseh, tuu siseh, caw siseh, laa siseh zeihmanh an ngaan lo.
5 Ram kha hrawh awkah an saṭil le an thlam he khaubawk bu bantuk in an ra. Anmah he, an kalauk he rel cawk lo an si.
6 Israel mi cu Midian mi ruang ah an sifah a zual chin. Cucaah Jehovah sinah bawmh hal in an au.
7 Midian mi ruang ah Israel mi cu Jehovah sinah bawmh hal in an au tikah,
8 Jehovah nih profet pakhat kha an sinah a thlah i hitin a ti hna: “Israel Pathian Jehovah nih ‘Sal nan taannak Izipt ram in kaan chuahpi hna.
9 Izipt mi hna kut in le aan hremtu hna kut in kaan khamh hna. Annih cu nan hmai in ka ṭhawl hna i an ram cu kaan pek hna.
10 Cun “Kei cu nan Pathian Jehovah ka si. Nan umnak ram i Amor mi hna pathian kha ṭih hna hlah u” tiah kaan rak ti hna. Asinain ka bia kha nan ngai lo’ tiah a ti.”
11 A hnuah Jehovah vancungmi cu a ra i Ofrah khua Abiezer mipa Joash ta a simi thingkung nganpi tang ah a ṭhu. Mah lioah Joash fapa Gideon cu Midian mi nih an hmuh nakhnga lo mitsur nennak khor chung ah changvut a tu.
12 Jehovah vancungmi cu a sinah a lang i “A ṭhawngmi ralkap, Jehovah cu na sinah a um” tiah a ti.
13 Mah tikah Gideon nih hitin a ti: “Ka bawipa, vun chim ta ko ning. Jehovah cu kan sinah a um ahcun zeicah hi thil vialte hi kan ton? Jehovah nih Izipt ram in a kan chuahpi tiah kan pupa hna nih an chim tawnmi khuaruahhar thil vialte cu khuazei ah dah an um dih kun? Atu cu Jehovah nih a kan hlawt i Midian mi hna kut ah a kan chanh cang.”
14 Jehovah nih Gideon cu a zoh i “Na ngeihmi thazaang he kal tuah. Israel mi kha Midian mi hna kut in na khamh hna lai. Keimah nih kaan thlah, a si ko lo maw?” tiah a ti.
15 Gideon nih “Jehovah, ka chim ta rih ko lai. Israel mi cu zeitindah ka khamh khawh hna lai? Ka phun cu Manasseh phun lakah a nauta bikmi a si i kei cu ka pa chungkhar lakah a biapi lo bikmi ka si” tiah a ti.
16 Asinain Jehovah nih “Na sinah ka um lai caah Midian mi cu mi pakhat tei bantuk in na tei khawh dih hna lai” tiah a ti.
17 Cu tikah Gideon nih “Na mithmai ṭha ka hmuh ahcun a ka chawntu cu nangmah na si ti a langhtermi hmelchunhnak pakhat in rak ka pe.
18 Na caah tirawl ka va timh lai i ka rat ṭhan hlan tiang zaangfahnak in rak ka kaltak hlah” tiah a ti. Vancungmi nih cun “Na rat ṭhan hlan tiang hika ah ka um ko lai” tiah a leh.
19 Gideon cu a kal i meheh no te kha a thah i a chuan, changvut ephah pakhat* in thilnu phulh lo changreu kha a ser. Sa kha bawm chung ah a rawn i sa hang kha um chung ah a tlen. Cun thingkung nganpi tang ah a ummi vancungmi sinah cun a rak put i a hunh.
20 A hmaanmi Pathian vancungmi nih “Sa le thilnu phulh lo changreu kha la law khika i lung nganpi cung ah va chia, cun sa hang kha toih” tiah a ti tikah Gideon nih cuticun a tuah.
21 Jehovah vancungmi nih aa putmi ṭhiangṭhunh par in sa le thilnu phulh lo changreu kha a hei tongh tikah lung in mei a chuak i sa le thilnu phulh lo changreu cu a kang dih. Cun Jehovah vancungmi cu a hmai in a lo.
22 Cu tik lawng ah Jehovah vancungmi a si kha Gideon nih a hngalh.
Mahle cangka Gideon nih “Aize, Lianngan Bik Bawipa Jehovah, Jehovah vancungmi kha hmaitonh in ka hmuh cang!” tiah a ti.
23 Jehovah nih “Na cung ah daihnak um ko seh. Ṭih hlah, na thi lai lo” tiah a ti.
24 Cuka ah Gideon nih Jehovah caah biakṭheng pakhat a ser. Biakṭheng cu Abiezer mi hna umnak Ofrah ah a um i Jehovah-shalom* tiah nihin ni tiang auh a si.
25 Cu zan ah Jehovah nih hitin a ti: “Na pa cawtum, kum sarih a simi a pahnihnak cawtum no kha la. Cun na pa ta a simi Baal biakṭheng kha hrawk law a pawng ah a ummi biaknak tungphun* kha hau.
26 Hika a himmi tlang cung ah hin lung rual hna law na Pathian Jehovah caah biakṭheng pakhat in ser. Cun a pahnihnak cawtum kha la, na haumi biaknak tungphun in thing kha la law khangh thawinak pe.”
27 Cucaah Gideon nih a sinum lakin pa pahra kha a auh hna i Jehovah nih a chim ning tein a tuah. Asinain a pa chungkhar le khuami kha a ṭih tuk hna caah chun ah a tuah ngam lo, zan ah a tuah.
28 A thaizing zingkate ah khuami nih Baal biakṭheng hrawh a simi, a pawng i biaknak tungphun hau a simi le ser tharmi biakṭheng cung ah a pahnihnak cawtum no thawi a simi kha an hmuh.
29 “Aho nih dah a tuah?” tiah pakhat le pakhat an i hal. An dothlat tikah “Joash fapa Gideon nih a tuah” tiah an ti.
30 Khuami nih Joash cu “Na fapa kha rak chuah tuah, Baal biakṭheng a hrawh i a pawng i biaknak tungphun kha a hau caah a thih awk a si” tiah an ti.
31 Joash nih a chuah hnawhtu vialte kha hitin a ti hna: “Baal cu maw nan ṭanh ko lai? Baal cu maw nan khamh hnik? Baal a ṭanhmi paoh cu nihin zing ah hin thah si hna seh. A biakṭheng cu hrawh a si caah pathian a si ahcun amahle amah i runveng ko seh.”
32 Cun Joash nih “A biakṭheng cu hrawh a si caah Baal nih amahle amah i runveng ko seh” tiah a ti i mah ni thawk in Gideon kha Jerubbaal* tiah a auh.
33 Midian mi, Amalek mi le Nichuahlei mi hna cu Israel mi doh awkah hmunkhat ah an i pum. Tiva kha an tan i Jezreel Horkuang ah riahhmun an khuar.
34 Jehovah thlarau cu Gideon cung ah a tlung. Gideon nih saki a tum tikah Abiezer mi hna cu a hnu zulh awkah an i pum.
35 Manasseh mi vialte sinah lamkal a hei thlah hna tikah annih cu a hnu zulh awkah an hun i pum. Cun Asher mi, Zebulun mi le Naftali mi hna sinah lamkal a thlah hna tikah annih zong a sinah an ra ve.
36 Cun Gideon nih a hmaanmi Pathian cu “Bia na ka kamh bantuk in keimah hmang in Israel mi kha na khamh hna ding a si ahcun,
37 hmelchunhnak pakhat in rak ka pe. Phuhri ah tuuhmul ka chiah lai. A pawngkam vawlei vialte cu a ro i tuuhmul cung lawng ah dap a tlak ahcun bia na ka kamh bantuk in keimah hmang in Israel mi cu na khamh hna lai ti kha ka hngalh lai” tiah a ti.
38 Cutin a cang taktak. A thaizing zingkate ah a tho i tuuhmul cu a sur tikah khengkuar nganpi cu dapti in a khat dih.
39 Mah tikah Gideon nih a hmaanmi Pathian kha “Na thinhung sawh hlah, voikhat te halnak nawl ka pe rih ko. Zaangfahnak in tuuhmul in hneksaknak nawl ka pe rih ko. Tuuhmul lawnglawng hi ro seh law vawlei ah dap tla dih seh” tiah a ti ṭhan.
40 Zan ah Pathian nih cutin a tuah taktak. Tuuhmul lawng a ro i vawlei ah dap a tla dih.
Footnotes
^ 22 L hrawng. Thlaihhlei B14 ah zoh.
^ A sullam “Jehovah Cu Daihnak.”
^ Biafang Fianternak ah zoh.
^ A sullam “Baal Nih I Runveng Seh.”
