Biaceihtu 11:1-40
11 Gilead mipa Jefthah cu a ṭhawngmi ralkap a si; anih cu hlawhhlangnu fapa a si i a pa cu Gilead a si.
2 Gilead nupi zong nih fapa a ngeih hna. An hun upat tikah Jefthah cu an ṭhawl i “Nang cu nu dang fa na si caah kan pa innchungkhar ah zei ro hmanh na co lai lo” tiah an ti.
3 Cucaah Jefthah cu a unau hna sinin a zam i Tob ram ah khua a sa. Rian a ngei lomi hna cu a sinah an i fonh i a hnu kha an zulh.
4 Caan tlawmpal a rauh hnuah Ammon mi nih Israel mi cu an rak doh hna.
5 Cu tikah Gilead ram upa hna cu Jefthah va auh ṭhan awkah Tob ram ah an i thawh colh.
6 Annih nih Jefthah cu “Rak kir ṭhan ko, kan haotu na si lai i Ammon mi kha kan doh hna lai” tiah an ti.
7 Asinain Jefthah nih Gilead ram upa hna kha “Nan ka huat tuk caah ka pa inn in nan rak ka ṭhawl, a si ko lo maw? Atu harnak nan ton tik ceo ah zeicah nan hei ka auh ṭhan?” tiah a ti hna.
8 Cu tikah Gilead ram upa hna nih “Cu ruang ah cun pei kan in auh ṭhan cu. Kan sinah na kir ṭhan i Ammon mi kha na doh hna ahcun Gilead ram ah a kan hruaitu na si lai” tiah an ti.
9 Cucaah Jefthah nih “Ammon mi doh awkah nan ka auh i Jehovah nih teinak a ka pek ahcun nan hruaitu ka ṭuan taktak lai!” tiah a ti hna.
10 Gilead ram upa hna nih “Jehovah cu kan karlak ah tehte a si, na chim ning in kan tuah lai” tiah an ti.
11 Cucaah Jefthah cu anmah he cun a kir i hruaitu le haotu ah an ser. Jefthah nih a rak chimmi bia vialte kha Mizpah i Jehovah hmaiah a chim ṭhan.
12 Jefthah nih Ammon siangpahrang sinah lamkal a hei thlah hna i “Ka cung ah na lungsi lonak zeidah a um i ka ram doh awkah na rak i thawh?” tiah bia a cah.
13 Ammon siangpahrang nih Jefthah thlahmi lamkal hna sinah “Israel mi nih Izipt ram in an rak chuah lioah Arnon Horkuang in Jabbok Horkuang tiang, Jordan tiang ka ram kha an rak lak. Atu rak ka khirh ṭhan u law kan karlak ah daihnak a um lai” tiah a ti.
14 Cu tikah Jefthah nih Ammon siangpahrang sinah lamkal a thlah ṭhan hna i,
15 hitin a chimter hna:
“Jefthah bia cu hihi a si: ‘Israel mi nih Moab mi hna ram le Ammon mi hna ram kha an rak la lo.
16 Israel mi cu Izipt ram in an rak chuah tikah Rili Sen tiang ramcar kha an tan. Cun Kadesh ah an phan.
17 Cuka in Israel mi nih Edom siangpahrang sinah lamkal an hei thlah hna i “Zaangfahnak in na ram hi kan tanter ko” tiah an ti. Asinain a tanter duh hna lo. Moab siangpahrang sin zong ah bia an hei cah nain a duh lo. Cucaah Israel mi cu Kadesh ah an caam.
18 Ramcar i an kal lioah Edom ram le Moab ram kha an hrial. Moab ram nichuahlei in an kal i Arnon Horkuang pawng ah an riak. Arnon cu Moab ramri a si caah ramri chung ah cun an lut lo.
19 “‘Cu hnuah Israel mi nih Heshbon in a ukmi Amor siangpahrang Sihon sinah lamkal an hei thlah hna i “Zaangfahnak in kan ram chung kan luh khawh nakhnga na ram hi kan tanter ko” tiah an nawl.
20 Sihon nih Israel mi cu a zum hna lo i a ram kha a tanter duh hna lo. Cucaah a mi cu a pumh hna, Jahaz ah riahhmun an khuar i Israel mi cu an doh hna.
21 Israel Pathian Jehovah nih Sihon le a mi vialte kha Israel mi kut ah a pek hna i an tei hna. Cucaah Israel mi nih cuka ah a ummi Amor mi hna ram vialte cu an lak.
22 Cuticun Arnon Horkuang in Jabbok Horkuang tiang, ramcar in Jordan tiang Amor mi hna ram vialte cu an lak dih.
23 “‘A miphun hmai in Amor mi a ṭhawltu cu Israel Pathian Jehovah a si. Atu Israel mi cu na ṭhawl ko hna lai maw?
24 Na pathian Khemosh nih aan pekmi ram vialte cu na co, a si ko lo maw? Kannih zong kan Pathian Jehovah nih kan hmai in a ṭhawlmi hna ram vialte cu kan co ve ko lai.
25 Zippor fapa, Moab siangpahrang Balak nih Israel mi cu a rak zuamcawh bal hna lo i a do bal hna lo. Nang cu amah nakin maw na ṭhat deuh?
26 Heshbon le a pawngkam khua hna, Aroer le a pawngkam khua hna le Arnon tivakam i khua hna ah Israel mi kum 300 chung an um lioah zeicah ram cu lak ṭhan ding in na rak i zuam lo?
27 Na cung ah zei sualnak hmanh ka tuah lo nain na ka dohmi cu na palh tuk cang. Biaceihtu Jehovah nih Israel mi le Ammon mi karlak ah bia kan ceih ko seh.’”
28 Asinain Jefthah nih bia a cahmi kha Ammon siangpahrang nih a ngai duh lo.
29 Jehovah thlarau cu Jefthah cung ah a tlung i Gilead ram le Manasseh ram kha tan in Gilead ram Mizpah khua ah a kal. Cuka in Ammon mi hna sinah a lan.
30 Jefthah nih Jehovah sinah hitin biakamnak a ser: “Ammon mi kha ka kut chung ah na ka pek ahcun,
31 Ammon mi sinin daihnak he ka rak kir ṭhan tikah keimah don awkah ka inn in a rak chuak hmasa bikmi cu Jehovah ta a si lai i khangh thawinak caah ka pek lai.”
32 Cucaah Jefthah cu Ammon mi hna doh awkah aa thawh i Jehovah nih a kut chung ah a pek hna.
33 Aroer le Minnith karah a ummi khua 20 le Abel-keramim tiang mi tampi kha a thah hna. Cuticun Ammon mi cu Israel mi hmaiah an sung.
34 A donghnak ah Jefthah cu Mizpah i a inn ah a phan. Mah lioah a fanu cu khuangte tum bu le lam buin amah don awkah cun a hung chuak. Anih cu a fanu ngeihchunte a si. Amah hlei ah fanu siseh, fapa siseh a ngei ti lo.
35 Jefthah nih a hmuh tikah a angki cu a thleh i “Aize, ka fanu! Ka lung na ka khuai cang. Nang cu lamhlatpi ah kalter dingmi na si ai cang. Jehovah sinah bia kaa kam cang i ka let kho ṭhan ti lo” tiah a ti.
36 A fanu nih cun “Ka pa, Jehovah sinah bia naa kam cang ahcun na biakam ning in ka cung ah tuah ko. Zeicahtiah Jehovah nih na ral Ammon mi hna cung ah phu aan hlampiak cang” tiah a ti.
37 Cun “Hal kaan duhmi pakhat a um: A caan thla hnih in rak ka pe, ka hawile he tlang cung ah kan va kai lai i ngaknu thiang ka sinak kha ka va ṭah lai”* tiah a ti chap.
38 A pa nih “Va kal ko” tiah a ti i thla hnih chung caan a pek. Cucaah ngaknu thiang a sinak cu ṭah awkah a hawile he tlang cung ah an kai.
39 Thla hnih hnuah a pa sinah a rak kir ṭhan i a pa nih a fanu he aa tlaiin bia aa kammi ning in a tuah. Anih cu a nun chung ngaknu thiang in a um. Israel ram ah a hung ummi phungphai pakhat cu:
40 Kum fatin Israel nungak hna cu Gilead mi Jefthah fanu sinah thangṭhatnak bia chim awkah kumkhat ah nili an kal tawn.
Footnotes
^ Asiloah “va ka ngeih ti lai lo caah ka hawile he kan va ṭap lai.”
