Biaceihtu 14:1-20
14 Samson cu Timnah khua ah a va ṭum i Filistin minu pakhat kha a hmuh.
2 Cucaah a nu le a pa sinah a kal i “Timnah khua ah ka mit a ka hlang tukmi Filistin minu pakhat a um. Rak ka ṭhitpiak u” tiah a ti hna.
3 A nu le a pa nih “Kan chungkhat le kan miphun lakah nupi naa hmuh kho lo maw? Cuarpar tan lomi Filistin mi hna lakah cun nupi cu na kawl awk a si maw?” tiah an ti. Asinain Samson nih a pa cu “Ka ṭhitpiak ko, amah lawnglawng ka duh” tiah a ti.
4 A biakhiahnak cu Jehovah lamhruainak a si ti le Filistin mi doh awkah caanrem a kawl ti kha a nu le a pa nih an hngal lo. Mah lio caan ah Israel mi kha Filistin mi nih an uk hna.
5 Cucaah a nu le a pa he Timnah ah cun an va ṭum. Timnah mitsur dum a phanh tikah chiandeih nih Samson cu a huk hnawh.
6 Mah tikah Jehovah thlarau nih ṭhawnnak a pek caah meheh no thlehbaoh bantuk in chiandeih cu a kut in a thlehbaoh i cheu hnih ah a cheu. Mah kong cu a nu le a pa a chim hna lo.
7 Cun a kal i Filistin minu he bia an i ruah tikah a duh phun a si taktak ko ti kha aa fiang.
8 A hnuah Filistin minu ṭhit ding in a kal ṭhan tikah chiandeih ruak cu a va zoh ṭhan i a chung ah khuaibu le khuaihliti a um kha a hmuh.
9 Khuaihliti cu a kut in a lak i a kal pah in a ei. A nu le a pa kha a hei phanh hna tikah a pek ve hna. Asinain chiandeih ruak chung in a lakmi a si kha a chim hna lo.
10 An pafa in minu ton awkah an va kal. An phanh tikah mopa nih an tuah tawn bang in Samson nih puai a tuah.
11 Mi nih Samson kawi caah pa 30 an ratpi hna.
12 Samson nih “Biahleng kaan hal hna lai. Puai tuah ni nisarih chung ah nan ka leh khawh ahcun khiangraang angki zun 30 le thilthuam zun 30 kaan pek hna lai.
13 Nan ka leh khawh lo ahcun khiangraang angki zun 30 le thilthuam zun 30 nan ka pek lai” tiah a ti hna. Annih nih “Biahleng cu kan chim tuah. Kan ngai tuah lai cu” tiah an ti.
14 Samson nih hitin a chimh hna:
“Eitu chung in ei awk a chuak,A ṭhawngmi chung in a thlummi a chuak.”
A nithumnak ni tiang biahleng cu an hngal kho lo.
15 A nilinak ni ah Samson nupi cu “Biahleng a sullam aan chimh nakhnga na vapa cu lem tuah, cun rak kan chim. Cutin na tuah lo ahcun nangmah he, na pa innchungkhar he mei in kan in khangh hna lai. Kan thilri chuh duh ah maw na kan sawm?” tiah an tlerh.
16 Cu tikah Samson cu a nupi nih “Na ka daw lo; na ka huat ko lai. Ka miphun kha biahleng na hal hna ahcun keimah cu a sullam na ka chimh awk a si” tiah ṭah buin a ti. Mah tikah Samson nih “Zeicah kaan chimh lai? Ka nu le ka pa hmanh ka chimh ṭung hna lo” tiah a ti.
17 Puai tuah ni nisarih chung a ṭah hnawh lengmang i a hal chih caah a nisarihnak ni ah biahleng a sullam cu a chimh. Cun a nupi nih a miphun pawl cu a va chimh chin hna.
18 A nisarihnak ni, nitlak hlanah* khuami cu Samson sinah an ra i hitin an leh:
“Khuaihliti nakin a thlum deuhmi a um maw,Chiandeih nakin a ṭhawng deuhmi a um maw?”
Samson nih hitin a ti hna:
“Ka cawla in rak ka thuang hlah u law cu,*Ka biahleng a sullam kha nan ka let kho hnga lo.”
19 Cu tikah Jehovah thlarau nih Samson cu ṭhawnnak a pek. Cucaah Ashkelon ah a kal, khuami pa 30 kha a thah hna i an thilthuam cu a lak. Cun biahleng a sullam a let khotu cu a pek hna. Mah hnuah a pa inn ah thinhung ngai in a kir.
20 Samson nupi cu a kawi hna lak i pakhat kha an pek.
