Biaceihtu 7:1-25
7 Jerubbaal tiah auhmi Gideon le a sinah a ummi vialte cu zingka tein an i thawh i Harod Cerhti pawng ah riahhmun an khuar. Midian mi tu cu an chaklei, Moreh tlangbo pawng i nelrawn ah riahhmun an khuar.
2 Jehovah nih Gideon cu “Na sinah a ummi cu an tam tuk. Midian mi kha an kut chung ah ka pek hna ahcun ‘Keimah thazaang thawng in teinak ka hmuhmi a si’ tiah an i porhlaw lai.
3 Cucaah mibu sinah ‘A ṭih i a therphangmi paoh cu inn ah kir u’ tiin va thanh” tiah a ti. Gideon nih cutin a hneksak hna tikah mi 22,000 cu inn ah an kir i 10,000 an taang.
4 Jehovah nih Gideon cu “Mi an tam tuk rih, tiva ah kalpi hna law cuka ah ka hneksak hna lai. ‘Hi pa hi na sinah kal seh’ tiah ka timi cu a kal lai. ‘Hi pa hi na sinah kal hlah seh’ tiah ka timi cu a kal lai lo” tiah a ti.
5 Cucaah tiva ah cun a kalpi hna.
Jehovah nih Gideon cu “A kut in ti a suak i uico bantuk in a dingmi le khukbil buin a dingmi kha a dang tein ṭhen hna” tiah a ti.
6 A kut in ti a suak i a dingmi cu mi 300 an si. A dang vialte cu khukbil in a dingmi an si.
7 Jehovah nih Gideon cu “A kut in ti a suak i a dingmi, mi 300 he kaan khamh lai i Midian mi kha na kut chung ah kaan pek lai, a taangmi vialte cu inn ah kirter ko hna” tiah a ti.
8 An sinin riahcaw le saki kha an lak hnuah inn ah a kirter hna. Mi 300 lawng a tanter hna. Midian mi hna riahhmun cu a niamnak lei nelrawn ah a um.
9 Cu zan ah Jehovah nih “Tho law an riahhmun kha va do, na kut chung ah kaan pek cang.
10 Va doh awkah na ṭih ahcun na hnu zultu Purah he riahhmun ah va ṭum u.
11 Zeidah an chim ti kha va ngai law Midian mi hna doh awkah ralṭhatnak na ngei lai” tiah a ti. Cucaah a hnu zultu Purah he cun riahhmun kam tiang an va kal.
12 Midian mi, Amalek mi le Nichuahlei mi vialte nih nelrawn cu khaubawk bu bantuk in an khuh dih. An kalauk cu rilikam thetse bantuk in rel cawk lo an si.
13 Gideon cu a va phanh tikah pa pakhat nih a hawipa kha “Mang ka manh. Barli changreu hlum pakhat cu kan riahhmun ah a rak ril. Thlam pakhat kha fakpi in a pah i a tlu. Thlam cu aa let i a rawk dih” tiah a mang kong kha a rak chimh.
14 Cu tikah a hawipa nih “Mah cu Israel mi Joash fapa Gideon vainam a si hrimhrim ko lai, Pathian nih Midian mi le riahhmun vialte hi a kut ah a pek cang” tiah a ti.
15 Gideon nih mang le a sullam kong an chimmi a theihle cangka a kun i Pathian kha a biak. Cun Israel riahhmun ah a kir ṭhan i “Tho tuah u! Jehovah nih Midian riahhmun kha nan kut ah aan pek cang hna” tiah a ti hna.
16 Mi 300 cu phuthum ah a ṭhen hna i saki le a chung ah meifar tom chiahmi vawlei um* nganpi kha an dihlak in a pek hna.
17 Cun hitin a ti hna: “Rak ka zoh u law ka tuah ning tein tuah u. Riahhmun kam ka phanh tikah ka tuah bantuk in nan tuah lai.
18 Keimah le ka sinah a ummi vialte nih saki kan tum tikah riahhmun velchum i nan umnak cio in saki kha nan rak tum ve lai i ‘Jehovah le Gideon vainam!’ tiah nan au lai.”
19 Gideon le a sinah a ummi ralkap 100 cu ralvengtu pawl an i thlenka zanṭim* hrawng ah riahhmun kam cu an va phan. Saki an tum i an i putmi vawlei um cu an khuai.
20 An phuthum ning in saki an tum i vawlei um cu an khuai. An kehlei kut in meifar tom kha an i put. An orhlei kut in saki kha an i put i an tum. Cun “Jehovah le Gideon vainam!” tiah an au.
21 Mah lioah riahhmun velchum i an umnak hmun cio ah an dir. Midian ralkapbu cu an au buin an zam.
22 Mi 300 nih saki cu ngol loin an tum. Jehovah nih riahhmun i a ummi vialte kha anmahle anmah a dohter hna. Cucaah ralkap pawl cu Beth-shittah tiang, Zererah tiang, Tabbath pawng i Abelmeholah ramri tiang an zam.
23 Gideon nih Naftali, Asher le Manasseh phun chung in Israel pa pawl kha a pumh hna i Midian mi cu an dawi hna.
24 Efraim tlangram vialte ah lamkal a thlah hna i “Midian mi kha va do hna u. Bethbarah tiang, Jordan Tiva a puanhnak le tivate hna kha va la u” tiah a ti hna. Cucaah Efraim mi cu hmunkhat ah an i pum i Bethbarah tiang, Jordan Tiva a puanhnak le tivate hna kha an lak.
25 Midian bawi pahnih Oreb le Zeeb kha an tlaih hna. Oreb kha Oreb lungpi cung ah an thah. Zeeb kha Zeeb mitsur nennak khor ah an thah i Midian mi cu an dawi thluahmah hna. Oreb lu le Zeeb lu cu Jordan Tiva pawng ah a ummi Gideon sinah an rak put.
