Biaceihtu 17:1-13
-
Mikah milem le a tlangbawi (1-13)
17 Efraim tlangram ah Mikah timi pa pakhat a um.
2 A nu kha “Ka nu, na ngun tangka 1,100 a firtu chiat na rak serhmi kha ka theih. Ngun tangka cu keimah sinah a um, keimah nih ka lakmi a si” tiah a ti. Cu tikah a nu nih “Ka fa, Jehovah nih thluachuah in pe ko seh” tiah a ti.
3 Cucaah a nu cu ngun tangka 1,100 cu a pek ṭhan tikah a nu nih “Mah ngun tangka hi nangmah ca milem sernak ah hman ding in Jehovah sinah ka pekchanh lai. Ngun tangka cu nangmah ta ah a cang lai” tiah a ti.
4 Mikah nih tangka a pek ṭhan tikah a nu nih ngun tangka 200 a lak i sosertu cu a pek. Sosertu nih themhmi milem le tit in thletmi milem kha a ser i Mikah inn ah an chiah.
5 Mikah nih siasal biaknak inn pakhat a ngei. Tlangbawi angki* pakhat le terafim* milem tete a ser i a fapa pakhat kha tlangbawi a ṭuanter.
6 Mah lio caan ah Israel ram ah siangpahrang an um lo. Mikip nih anmah mithmuh ah a ṭha an timi paoh kha an tuah.
7 Judah ram Bethlehem khua ah Levi mi mino pa pakhat a um. Anih cu Judah mi chungkhar pakhat sinah sau nawn a um cang.
8 Cu pa cu umnak hmun kawl awkah Judah ram Bethlehem khua in a rak chuak. Khual a tlawn pah in Efraim tlangram ah a ummi Mikah inn ah a hung phan.
9 Mikah nih “Khoika in dah na rat?” tiah a hal tikah “Judah ram Bethlehem khua in a rami Levi mi ka si. Umnak hmun ka kawl lio a si” tiah a leh.
10 Cu tikah Mikah nih “Ka sinah um law ruahnak a ka cheutu* le tlangbawi na si lai. Kei zong nih kumkhat ah ngun tangka phar 10 le na herhmi thilpuan le tirawl kaan pek lai” tiah a ti. Cucaah Levi mipa cu a inn ah a lut.
11 Mikah inn ah um ding in a hna a tla i anih cu Mikah fapale lakah pakhat bantuk a hung si.
12 Cun Mikah nih Levi mipa cu tlangbawi ah a ser i a inn ah cun a umter.
13 Mikah nih “Levi mi cu ka tlangbawi a si cang caah Jehovah nih thluachuah a ka pek hrimhrim lai” tiah a ti.
