Biaceihtu 16:1-31
16 Voikhat cu Samson cu Gaza khua ah a kal. Cuka ah hlawhhlangnu pakhat kha a hmuh i a inn ah a zulh.
2 Gaza khuami hna nih “Samson a ra” ti an theih tikah khua hauka in zan khuadei an bawh i an kulh. Zan khuadei dai tein an um i “Khua a dei tikah kan thah te lai” tiah an ti.
3 Samson cu zanṭim tiang a it. Cun a tho i khua hau kutka kha a tung pahnih le a hrenhnak he a phawi, a liang ah aa khinh i Hebron khua hmaiah a ummi tlangpar tiang a phorh.
4 A hnuah Sorek Horkuang ah a ummi Delilah timi nu he an i duh.
5 Cucaah Filistin bawi pawl cu Delilah sinah an ra i “A ṭhawnnak hrampi hi zeidah a si, zeitindah kan tei khawh lai i zei in dah kan ṭem khawh lai ti kha hngalh awkah rak lem. Ngun tangka 1,100 cio kan in pek lai” tiah an ti.
6 Delilah nih Samson cu “Na ṭhawnnak hrampi hi zeidah a si, zei in dah ṭem khawh na si i tei khawh na si ti kha rak ka chim” tiah a ti.
7 Samson nih “A ro rih lomi liza a thar pasarih in an ka ṭem ahcun ka tha a der lai i midang bantuk ka si ko lai” tiah a ti.
8 Filistin bawi pawl nih a ro rih lomi liza a thar pasarih an rak put i hri cun Delilah nih Samson cu a ṭem.
9 Ihnak khaan chung ah mi nih an rak bawh cang. Delilah cu “Samson, Filistin mi nih an in rat hnawh!” tiah a au. Mah tikah liza kha mei nih khumhri a tlaih tikah a cah dih bantuk in fawi tein a chah dih. A ṭhawnnak biathli cu hngalh a si lo.
10 Delilah nih Samson cu “Na ka hlen i bia hmaan na ka chim lo. Zei in dah ṭem khawh na si lai ti kha atu rak ka chim” tiah a ti.
11 Samson nih cun “Hman rih lomi hri thar in an ka ṭem ahcun ka tha a der lai i midang bantuk ka si ko lai” tiah a leh.
12 Cucaah Delilah nih hri thar kha a lak i a ṭem. Cun “Samson, Filistin mi nih an in rat hnawh!” tiah a au. (Cu lioah ihnak khaan chung in mi nih an rak bawh.) Cu tikah a ban i hri cu laa bantuk in a chah dih.
13 Cu hnuah Delilah nih “Na ka hlen i atu tiang bia hmaan na ka chim rih lo. Zei in dah ṭem khawh na si lai ti kha rak ka chim ko” tiah a ti ṭhan. Samson nih “Ka sam phiar, phiar sarih hi thiam ah na tah chih ahcun ka tha a der lai” tiah a ti.
14 Cucaah a sam phiar cu tahtlem in a khawn chih. Mah hnuah “Samson, Filistin mi nih an in rat hnawh!” tiah a au. Samson cu a hun i hlau i a sam kha a dawh tikah tahtlem he, a thiam he a poih dih.
15 Delilah nih “Na lungthin cu ka sinah a um lo buin ‘Kaan dawt’ tiah zeitindah na chim khawh? Voithum tiang na ka hlen i na ṭhawnnak hrampi kha na ka chim rih lo” tiah a ti.
16 Cuticun nifatin a hal i a hnek lengmang caah a ing kho ti lo i thih hmanh a duh.
17 A donghnak ah a lung chung ummi vialte cu a chimh i “Ka chuahka in Pathian caah Nazir* mi ka si i ka sam kaa met bal lo. Ka sam kaa meh ahcun ka ṭhawnnak nih a ka chuahtak lai. Ka tha a der lai i midang bantuk ka si lai” tiah a chimh.
18 Samson nih a lungthin chung ummi vialte a ka chimh dih ti a hngalh tikah Delilah nih Filistin bawi pawl cu a auh colh hna i “Rak ra u, tutan cu a lung chung ummi vialte a ka chimh dih cang” tiah a ti hna. Filistin bawi pawl cu an ra i tangka zong an rak put.
19 Delilah nih Samson cu a phei cung ah a thlim. Cun pa pakhat kha a auh i a sam phiar, phiar sarih kha a tanter. A ṭhawnnak nih a chuahtak cang caah Delilah nih a hun tei khawh.
20 Delilah cu “Samson, Filistin mi nih an in rat hnawh!” tiah a au. Cu tikah Samson cu a hun i hlau i “A hlan bantuk in ka tho lai i ka luat ko lai” tiah a ruah. Asinain Jehovah nih a kaltak cang kha a hngal lo.
21 Cucaah Filistin mi nih an tlaih i a mit an khoih. Cun Gaza khua ah an ratpi. Dar cikcin pahnih in an ṭem i thonginn ah fang an rialter.
22 Tlawmpal ah an mehmi a sam cu a hun sau ṭhan.
23 Filistin bawi pawl cu hmunkhat ah an i pum. “Kan pathian nih kan ral Samson kha kan kut ah a kan pek cang!” tiah an ti i an pathian Dagon thangṭhatnak caah raithawinak puai nganpi an tuah.
24 Mi nih Samson an hmuh tikah an pathian kha an thangṭhat i “Kan pathian nih kan ram a hrawktu le kan mi tampi a thattu kan ral kha a kan pek cang” tiah an ti.
25 Mi cu an hun i nuam tuk i “Samson kha rak chuahpi u law nuamhnak kan tuahpiak seh” tiah an ti. Cucaah nuamhnak tuahter awkah thonginn in an rak chuahpi i tung pahnih karah an dirter.
26 Samson nih a kut in a hruaitu pate kha “Inn tungpi pahnih kha rak ka tawnghter, i hngauh ka duh” tiah a ti.
27 (Inn cu nu he, pa he an khat. Filistin bawi vialte zong an um ve. Inncung zong ah Samson nih nuamhnak a tuahmi a zohtu mi 3,000 hrawng an um.)
28 Samson nih Jehovah kha a auh i “Lianngan Bik Bawipa Jehovah, rak ka philh sawh hlah! Zaangfahnak in atu voikhat te hi thazaang rak ka pe ṭhan ko. Maw Pathian, ka mit pakhat ca tal ah hin Filistin mi hna cung ah teirul ka chamter ko” tiah a nawl.
29 Samson cu a lai ah a ummi inn tungpi pahnih karah fek tein a dir i a orhlei kut in pakhat, a kehlei kut in pakhat a nam.
30 “Filistin mi hna he rak ka thihter ko!” tiah a au i a thazaang dihlak in inn tung kha a nam tikah inn cu bawi pawl le mi vialte cung ah a cim. A nunnak pek in a thahmi cu a nun chung ah a thahmi nakin an tam deuh.
31 A hnuah a unau hna le a pa innchungkhar vialte nih Samson ruak kha an va lak. Zorah le Eshtaol karah a ummi a pa Manoah thlan ah an vui. Samson nih Israel mi cu kum 20 chung bia a ceih hna.
Footnotes
^ Biafang Fianternak ah zoh.
