Biaceihtu 20:1-48
-
Benjamin mi kha an doh hna (1-48)
20 Cucaah Dan khua in Beersheba tiang le Gilead ram ah a ummi Israel mi vialte cu Mizpah i Jehovah hmaiah lungrual tein an i pum.
2 Aa pummi Pathian mibu lakah haotu hna le Israel phun dihlak an i tel i vainam aa tlaihmi ralkap 400,000 an um.
3 Mizpah ah Israel mi an i pum timi thawng kha Benjamin phun nih an theih.
Israel mi nih “Zeitindah hi bantuk thil ṭhalo hi a chuah ning a si? Rak kan chim tuah u” tiah an ti tikah,
4 thah a simi nu a va Levi mipa nih “Keimah le ka nuchun cu zan riah awkah Benjamin ram Gibeah khua ah kan phan.
5 Zan ah Gibeah khuami hna* nih an ka chuah hnawh i ka riahnak inn kha an rak kulh. Thah an ka timh, asinain ka nuchun tu kha an tlaihhrem i a thi.
6 Ka nuchun ruak cu ka can i Israel ram pumpi ah ṭhen khat cio ka kuat hna. Zeicahtiah annih nih Israel ram ah ningzah awk tlak thil le thil fihnung kha an tuah.
7 Cucaah Israel mi hna, nan ruahnak rak chim cio u law i ruahṭi hna u sih” tiah a ti hna.
8 Cu tikah Israel mi vialte nih lungrual tein hitin an ti: “Ahohmanh kan inn le kan thlam ah kan kir lai lo.
9 Atu Gibeah khua doh awkah camcawhfung zuh in mi thim hna u sih.
10 Annih nih Israel ram ah thil fihnung a tuahtu Benjamin phun, Gibeah khuami kha an doh hna lai i dan an tat hna lai. Anmah caah tirawl khawmh ding in Israel phun dihlak chung in mi 100 ah 10, mi 1,000 ah 100, mi 10,000 ah 1,000 tiin kan thim hna lai.”
11 Cucaah Israel mi vialte cu Gibeah khua doh awkah an ṭangṭi i lungrual tein an i pum.
12 Israel mi nih Benjamin phun dihlak sinah mi an hei thlah hna i “Nan lakah hi bantuk thil ṭhalo hi zeicah a um?
13 Atu Gibeah khua i mi zei ruaram lo pawl kha rak chuah hna u, kan thah hna lai i Israel ram chung in ṭhatlonak kha kan hloh lai” tiah an ti hna. Asinain an unau Israel mi hna bia kha Benjamin phun nih an ngai duh lo.
14 Benjamin mi cu Israel mi doh awkah an khua cio in an rak chuak i Gibeah khua ah an i pum.
15 Cu ni ah a rak chuakmi Benjamin phun vainam aa tlaihmi ralkap cu 26,000 an si. Gibeah khua zong ah raldoh a thiam tukmi ralkap 700 an um.
16 Benjamin ralkapbu chung ah cun kehtlak hmangmi ralkap 700 an um i annih cu samfa fakhat hmanh ngaan loin lungherh cheh a thiammi an si.
17 Benjamin phun telh loin vainam aa tlaihmi Israel ralkap cu 400,000 an si. An dihlak in raltuknak ah hmuhtonnak a ngeimi an si.
18 Israel mi cu Pathian lamhruainak hmuh awkah Bethel ah an kal. “Benjamin phun doh awkah aho nih dah a kan hruai lai?” tiah an hal tikah Jehovah nih “Judah phun nih aan hruai hna lai” tiah a leh hna.
19 Cu hnuah Israel mi cu zingka tein an i thawh i Gibeah khua pawng ah riahhmun an khuar.
20 Israel mi cu Benjamin phun doh awkah an chuak i Gibeah khua ah timhcia tein hmun an la.
21 Benjamin phun cu Gibeah khua in an hung chuak i mah ni ah Israel mi 22,000 an thah hna.
22 Asinain Israel ralkap hna nih ralṭhatnak an langhter i a nikhatnak ni hmun an laknak ṭhiamṭhiam ah hmun an la ṭhan.
23 Israel mi cheukhat cu Bethel ah an kal i Jehovah hmaiah zanlei tiang an ṭap. “Kan unau Benjamin phun cu kan do ṭhan hna lai maw?” tiah Jehovah kha an hal tikah Jehovah nih “Va do ṭhan hna u” tiah a ti hna.
24 Cucaah Israel mi nih Benjamin mi cu a voihnihnak an va naih ṭhan hna.
25 Benjamin phun zong Gibeah khua in a voihnihnak an hung chuak ṭhan i vainam aa tlaihmi Israel ralkap 18,000 kha an thah hna.
26 Israel mi dihlak cu Bethel ah an kal, Jehovah hmaiah an ṭhu i an ṭap, cu ni zanlei tiang rawl an ul i Jehovah sinah khangh thawinak le hawikomhnak thawinak kha an pekchanh.
27 Cu hnuah Israel mi nih Jehovah cu lamhruainak an hal. Zeicahtiah mah lio caan ah a hmaanmi Pathian biakamnak kuang cu Bethel ah a um i,
28 Aaron fapa, Eleazar fapa Finehas cu biakamnak kuang hmaiah tlangbawi in rian a ṭuan. Israel mi nih “Kan unau Benjamin phun cu kan do rih hna lai maw? Kan ngol lai dah?” tiah an hal tikah Jehovah nih “Va do hna u. Thaizing ah nan kut ah kaan pek hna lai” tiah a ti hna.
29 Cucaah Israel mi nih Gibeah khua velchum ah a thli tein a bawhtu ralkap kha an chiah hna.
30 Israel mi cu Benjamin phun doh awkah a voithumnak an i thawh i a hlan bantuk in Gibeah khua hmaiah timhcia tein hmun an la ṭhan.
31 Benjamin mi nih an rak chuah hnawh hna tikah khua he aa hlatnak tiang an i dawiter hna. Benjamin mi nih a hlan bantuk in an doh hna tikah Bethel lei kalnak lam le Gibeah lei kalnak lam ah Israel mi 30 hrawng an thah hna.
32 Cu tikah Benjamin mi nih a hlan bantuk in an sung ṭhan cang tiah an ruah. Asinain Israel mi cu “Kan zamtak hna lai i khua he aa hlatnak lampi tiang kan i dawiter hna lai” tiah an rak i chimcia cang.
33 Israel mi cu an umnak hmun in an chuak i Baaltamar ah timhcia tein hmun an la. Mah lioah Gibeah khua velchum i a bawhtu ralkap hna cu an bawhnak hmun in an rak chuak ve.
34 Raldoh a thiam tukmi Israel ralkap 10,000 cu Gibeah khua hmaiah an rak phan i raldohnak cu a fak chinchin. Asinain a rauhhlan ah thil ṭhalo kan tong cang lai ti kha Benjamin phun nih an hngal lo.
35 Jehovah nih Israel mi hna hmaiah Benjamin phun cu a sunghter hna. Cucaah vainam aa tlaihmi Benjamin ralkap 25,100 kha Israel mi nih mah ni ah an thah hna.
36 Israel mi cu an sungh caah an zammi a si tiah Benjamin mi nih an rak ruah. Asinain Gibeah khua velchum ah an chiahmi a bawhtu ralkap kha an zumh hna caah Israel mi cu an zammi a si.
37 A bawhtu ralkap cu khulrang in khua chung ah an va lut. Khua pumpi ah an i ṭhek i khuami vialte kha vainam in an thah hna.
38 Khua a bawhtu ralkap hna kha khua chung in meikhu kaiter in hmelchunhnak pek awkah Israel mi nih an rak chimhcia cang hna.
39 Israel mi an zam tikah Benjamin mi nih an doh hna i Israel mi 30 hrawng an thah hna. Cun “A hlan bantuk in kan hmaiah an sung cikcek ko hih!” tiah an ti.
40 Asinain hmelchunhnak meikhu tom cu Gibeah khua in a kai. Benjamin mi nih an hnulei an hei zoh tikah an khua in meikhu chahpipi a kaimi kha an hmuh.
41 Israel mi cu an hun i mer ṭhan i an doh hna. Benjamin mi nih fakpi in harnak kan tong cang lai ti kha an hmuh tikah zei tuah awk hngal loin an um.
42 Cucaah ramcar lei ah an zam. Asinain Israel mi nih an dawi hna. Khua chung in a rak chuakmi Israel mi zong nih an dawi ve hna i an thah hna.
43 Benjamin mi kha an kulh hna i ngol loin an dawi hna. Gibeah khua nichuahlei ah an hrawh cikcek hna.
44 Cuticun Benjamin ralkap ṭhawngṭhawng 18,000 an thi.
45 Benjamin mi cu an i mer i ramcar ah a ummi Rimmon lungpi tiang an zam. Israel mi nih Benjamin mi 5,000 kha lam ah an thah hna. A taangmi kha Gidom tiang an dawi rih hna i mi 2,000 an thah chap hna.
46 Cu ni ah vainam aa tlaihmi Benjamin ralkap 25,000 an thi. An dihlak in a ṭhawngmi ralkap an si.
47 Asinain mi 600 tu cu ramcar ah a ummi Rimmon lungpi ah an zam i cuka ah thla 4 an um.
48 Israel mi cu an rak kir ṭhan i Benjamin ram khua hna ah a taang rihmi minung le saṭil dihlak kha vainam in an thah hna. Lam ah an hmuhmi khua vialte zong an khangh dih.
Footnotes
^ Asiloah “vawlei ngeitu hna” ti zong a si kho.
