Biaceihtu 12:1-15
12 Efraim mi pa hna cu hmunkhat ah an i pum, Zaphon khua tiang* tiva kha an tan i “Ammon mi hna doh awk i na kal lioah zeicah na kan auh ve lo? Nangmah he, na inn he mei in kan in khangh lai” tiah Jefthah cu an ti.
2 Cu tikah Jefthah nih hitin a ti hna: “Keimah le ka mi hna nih Ammon mi kha fakpi in kan doh hna lioah bawmh ka rak in hal hna nain nan rak ka bawm lo.
3 Nan ka bawmh lomi kha ka hmuh tikah ka nunnak thap in Ammon mi cu ka doh hna i Jehovah nih ka kut chung ah a ka pek. Atu ah keimah cu zeicah nan rak ka doh?”
4 Jefthah nih Gilead mi pa vialte cu a pumh hna i Efraim mi cu an doh hna. “Efraim ram le Manasseh ram ah a ummi nannih Gilead mi cu Efraim phun chung in a zammi men nan si” tiah a titu Efraim mi cu an tei hna.
5 Gilead mi nih Efraim ram hmai i Jordan ti puanhnak kha an lak. Cuka in zam aa timmi Efraim mi nih “Tiva ka tanter ko” tiah an ti tikah Gilead mi nih “Efraim mi na si maw?” tiah an hal hna. “Ka si lo” an ti ahcun,
6 “Shibboleth tiah chim hmanh” an ti hna. Mah kha a aw an chuah thiam lo i “Sibboleth” tiah an ti ahcun an tlaih hna i Jordan ti puanhnak ah an thah hna. Mah lio caan ah Efraim mi 42,000 an thi.
7 Gilead mi Jefthah nih Israel mi cu kum 6 chung bia a ceih hna hnuah a thi. Gilead ram i a khua ah an vui.
8 Jefthah hnuah Bethlehem khuami Ibzan cu Israel mi hna biaceihtu a hung si.
9 Fapa 30 le fanu 30 a ngei. A fanule kha a phun a si lomi pa a vatter hna i a fapale kha a phun a si lomi nu 30 a ṭhitpiak hna. Ibzan nih Israel mi cu kum 7 chung bia a ceih hna.
10 Cu hnuah a thi i Bethlehem khua ah an vui.
11 Ibzan hnuah Zebulun phun, Elon cu Israel mi hna biaceihtu a hung si i Israel mi cu kum 10 chung bia a ceih hna.
12 Zebulun phun, Elon cu a thi i Zebulun ram Aijalon khua ah an vui.
13 Elon hnuah Pirathon mi Hillel fapa Abdon cu Israel mi hna biaceihtu a hung si.
14 Anih cu fapa 40 le tupa 30 a ngei i an dihlak in laa pakhat cio an ngei. Abdon nih Israel mi cu kum 8 chung bia a ceih hna.
15 Pirathon mi Hillel fapa Abdon cu a thi i Amalek mi hna tlangram ah a ummi Efraim ram, Pirathon khua ah an vui.
Footnotes
^ Asiloah “chaklei tiang” ti zong a si kho.
