Biaceihtu 3:1-31
3 Kanaan ram an doh lioah aa tel bal lomi Israel mi pawl hneksak awkah Jehovah nih a umter rihmi, miphun hna an um.
2 (Cutin a tuahmi cu ral a do bal lomi chanthar Israel mi hna nih raldohnak ah hmuhtonnak an ngeih ve nakhnga caah a si.)
3 Annih cu Filistin bawi panga, Kanaan mi vialte, Sidon mi le Baal-hermon Tlang in Lebo-hamath* tiang Lebanon Tlang ah a ummi Hiv mi an si.
4 Moses sinin an pupa hna sinah pekmi Jehovah nawlbia kha an ngai lai maw, ngai lai lo ti hngalh awkah Israel mi cu mah miphun hmang in hneksak an si.
5 Cucaah Israel mi cu Kanaan mi, Hit mi, Amor mi, Periz mi, Hiv mi le Jebus mi hna lakah an um.
6 Israel mi nih mah miphun hna i an fanule cu an ṭhit hna, an fanule kha mah miphun hna i an fapale cu an vatter hna. Cun an pathian hna zong kha an hun biak.
7 Israel mi nih Jehovah mithmuh ah thil ṭhalo kha an tuah i an Pathian Jehovah kha an philh. Baal pathian hna le miphun dang hna i biaknak tungphun* kha an biak.
8 Cu tikah Jehovah thinhunnak cu Israel mi cung ah a alh i Mesopotamia siangpahrang Kushan-rishathaim kut ah a zuar hna. Israel mi nih kum 8 chung a rian an ṭuan.
9 Israel mi cu Jehovah sinah bawmh hal in an au tikah Jehovah nih khamhtu pakhat a chuahter. Anih cu Kaleb nau, Kenaz fapa Othniel a si.
10 Jehovah thlarau cu a cung ah a tlung i Israel mi hna biaceihtu a hung si. Raltuknak i a kal tikah Jehovah nih Mesopotamia siangpahrang Kushan-rishathaim kha a kut ah a pek i a tei.
11 Cun ram cu kum 40 chung a dai. Cu hnuah Kenaz fapa Othniel cu a thi.
12 Israel mi nih Jehovah mithmuh ah thil ṭhalo kha an tuah ṭhan. Jehovah mithmuh ah thil ṭhalo an tuah caah Jehovah nih Moab siangpahrang Eglon kut ah a chanh hna.
13 Cun Eglon nih Ammon mi le Amalek mi kha bawmhnak a hal hna. Annih nih Israel mi kha an doh hna i tum kung khua kha an lak.
14 Israel mi nih kum 18 chung Moab siangpahrang Eglon rian kha an ṭuan.
15 Israel mi nih Jehovah sinah bawmh hal in an au tikah Jehovah nih khamhtu pakhat a chuahter ṭhan. Anih cu Benjamin phun Gera fapa Ehud a si i kehtlak a si. Israel mi nih amah cu Moab siangpahrang Eglon kha ngunkhuai an pekter.
16 Ehud nih dong khat* a saumi kaphnih har vainam kha a ser i a puan tang a orhlei phei ah a ṭem chih.
17 Cun Moab siangpahrang Eglon cu ngunkhuai a pek. Eglon cu a thau ngaingaimi a si.
18 Ehud nih ngunkhuai a pek dih tikah ngunkhuai a phortu kha a va thlah hna.
19 Gilgal i lung milem umnak pawng* an phanh tikah a kir ṭhan i “Siangpahrang, biathli chimh awk kaan ngei” tiah a ti. Mah tikah siangpahrang nih a sinum kha a chuahter hna i an dihlak in an chuak.
20 Siangpahrang cu inncung bik khaan* ah amah lawng in a ṭhut lioah Ehud cu a pawng ah a va kal i “Pathian sinin a rami bia chimh awk kaan ngei” tiah a ti. Cucaah siangpahrang cu a bawiṭhutdan in a tho.
21 Ehud nih cun a orhlei phei ah a ṭemmi vainam kha a kehlei kut in a zuh i siangpahrang paw ah cun a sawh,
22 a hlok zong a pil dih, nam cu a zuh ṭhan lo caah a thau nih a khuh dih, a ek zong a hung chuak.
23 Ehud nih inncung bik khaan innka kha a khar i a hrenh, cun thlalang awng in a chuak.
24 Cu hnuah sinum pawl an ra i inncung bik khaan aa hrenhmi kha an hmuh tikah “Siangpahrang cu innchung ah zunput a kal i a si lai” tiah an ti.
25 Saupi an hngah nain innka a hun hlei lo tikah an lungre a thei. Cucaah tawh kha an lak i an on tikah siangpahrang cu ṭuang ah a ril i a rak thih ko kha an hmuh.
26 Cutin an hngah lioah Ehud cu a rak luat diam cang. Lung milem pawng* khan a lan i Seirah ah him tein a phan.
27 Efraim tlangram a phanh tikah saki kha a tum. Israel mi cu tlang cung in an rak ṭum i amah nih cun a hruai hna.
28 Ehud nih “Ka hnu rak ka zul u, zeicahtiah Jehovah nih nan ral Moab mi kha nan kut chung ah aan pek cang hna” tiah a ti hna. Cucaah an zulh i Moab mi hna an zam khawh nakhnga lo Jordan Tiva a puanhnak zawn kha an lak. Ahohmanh tiva an tanter hna lo.
29 Israel mi nih a ṭhawng i a ral a ṭhami Moab mi 10,000 hrawng kha pakhat hmanh taang loin an thah hna.
30 Cu ni ah Israel mi nih Moab mi cu an tei hna i ram cu kum 80 chung a dai.
31 Amah hnuah Anath fapa Shamgar nih caw khalhnak fung zum in Filistin mi 600 kha a thah hna i Israel mi kha a khamh hna.
Footnotes
^ Asiloah “Hamath luhnak.”
^ Biafang Fianternak ah zoh.
^ Mah cu lehmah 15 (38 cm) hrawng a saumi dong tawi a si kho. Thlaihhlei B14 ah zoh.
^ Asiloah “lung cawhnak khor hna pawng” ti zong a si kho.
^ Mah cu nikhua a linh caan i umnak caah inn a cung ah sak chapmi a si.
^ Asiloah “Lung cawhnak khor hna pawng” ti zong a si kho.
