Biaceihtu 5:1-31
5 Cu ni ah Deborah le Abinoam fapa Barak cu hitin hla an sa:
2 “Jehovah cu thangṭhat u!Israel mi cu an sam an i thlah,*Lungtho tein ral an do.
3 Siangpahrang hna, ngai u! Uktu hna, nan hna chit u!
Jehovah sinah hla ka sa lai.
Israel Pathian Jehovah sinah thangṭhatnak hla ka sa lai.
4 Maw Jehovah, Seir ram in na chuah tikah,Edom ram in na hun i thawh tikah,Vawlei cu aa hnin, van in ruah a sur,Minmei nih ti an thlet.
5 Jehovah hmaiah tlang hna cu an ti dih,*Israel Pathian Jehovah hmaiah Sinai Tlang hmanh a ti dih.
6 Anath fapa Shamgar chan ah,Jael chan ah, lampi cu an king;Khualtlawngtu hna cu lam dangdang in an kal.
7 Israel khuate hna ah mi an um ti lo;Israel ram ah nu can in,Keimah Deborah ka thawh hlan tiang mi an king.
8 Pathian dang kha an i thim tikah,Khua hauka ah ral a tho.
Israel mi 40,000 lakah,Phaw pakhat, fei pakhat te hmanh a um lo.
9 Mipi he mah lungtho tein ral a domi,Israel ralbawi hna sinah ka lungthin cu a um.
Jehovah cu thangṭhat u!
10 Laa aa citmi hna,Ṭuangphah ṭhaṭha cung ah a ṭhumi hna,Lam ah aa chawkmi hna,Ruat tuah u!
11 Tikhor pawng ah saṭil ca ti a thantu hna aw cu theih a si;Jehovah i a dingmi tuahsernak kong,Israel khuate ah a ummi hna i a dingmi an tuahsernak kong kha an i ceih.
Jehovah miphun cu khua hauka ah an kal.
12 Maw Deborah, i hlau law tho tuah!
I hlau law tho law hla sa tuah!
Abinoam fapa Barak, tho tuah! Sal taangmi hna kha kalpi cang hna!
13 A taangmi hna cu hruaitu hna sinah an vung ṭum;Jehovah miphun cu miṭhawng hna doh awkah ka sinah an ra.
14 Maw Benjamin, horkuang ah a ummi Efraim nih,Na mi hna he na hnu in an in zulh.
Ralbawi hna cu Makhir sinin an hun chuak,Ralkap a khawmtu hna* cu Zebulun sinin an hun chuak.
15 Issakhar bawi hna cu Deborah sinah an um,Issakhar bantuk in Barak zong a um ve.
Anih cu horkuang lei ah a ke in a ṭum.
Reuben phun cu lungawṭawm in an um.
16 Thiltom pahnih* karah zeicah na ṭhut,Tuukhal tummi thonglawi aw kha zeicah na ngaih?
Reuben phun cu lungawṭawm in an um.
17 Gilead cu Jordan Tiva khattalei ral ah a um ko;Dan cu zeicah a tilawng he aa ṭhen khawh lo?
Asher zong rilikam ah a ṭhu sawhsawh ko,A tilawng dinhnak kha a chuahtak kho lo.
18 Zebulun cu an nunnak hmanh pek a ngamhmi miphun an si;Naftali zong tlang cung ah an nunnak hmanh pek a ngamhmi an si ve.
19 Siangpahrang pawl nih an rak doh hna;Megiddo tiva pawng Taanakh khua ahKanaan siangpahrang hna nih an doh hna.
Ngun hranchaw zeihmanh an la kho lo.
20 Vancung in arfi nih an doh;An i velnak lam in Sisera kha an rak doh.
21 Kishon tiva nih a fenh dih hna,Hlanlio tiva, Kishon tiva kha.
Mi lianngan kha ka lamh chih cang hna.
22 Raltuknak rang hna cu khulrang in an i chaih tikahAn tin nih vawlei a khawn thawng a thang.
23 Jehovah vancungmi nih ‘Meroz cu chiatserh si ko seh,Cuka mi hna zong chiatserh si ko hna seh,Zeicahtiah Jehovah kha an rak bawm lo,Jehovah caah ral a domi a ṭhawngmi hna kha an rak bawm duh hna lo’ a ti.
24 Ken mi Heber nupi Jael cuNu hna lakah thluachuak bik a si;Thlam i a ummi nu hna lakah thluachuak bik a si.
25 Ti a hal tikah cawhnuk kha a pek.
Aa dawh tukmi khengkuar in cawhnuk a khammi kha a pek.
26 Thlam khenhnak fung kha aa lak,A orhlei kut in rianṭuantu hmanmi sobul kha aa lak.
Sisera lu ah a khenh i a den,A phuzep ah tleng lakin a khenh.
27 Jael kehram ah cun a tlu; a ril i a cawl kho ti lo;A kehram ah a tlu i a ril;A rilhnak ah cun a thi beh.
28 Thlalang awng in nu pakhat khua a cuan,Sisera a nu a si i a fapa cu a hngah ko,‘A rangleng cu zeicah a hnut hnga?
A rangleng thawng cu zeicah ka theih rih hnga lo?’ a ti.
29 A inn i a fim bikmi nu hna nih an leh;Amah zong nih hitin aa ti lengmang ve ko,
30 ‘An lakmi hranchaw an i phaw i a si lai,Ralkap pakhat cio caah ngaknu pakhat maw, pahnih dik,Sisera caah a rong thuhmi puan pakhat hnu pakhat,Hranchaw a latu hna caah a rong thuhmi,Par suaimi hngawngngerh pakhat hnu pakhat an i phaw i a si lai.’
31 Maw Jehovah, na ral vialte cu rawk dih ko hna seh,Nangmah aan dawtu hna cu nika bang in ceu chin ko hna seh.”
Cu hnuah ram cu kum 40 chung a dai.
