Biaceihtu 13:1-25
13 Israel mi nih Jehovah mithmuh ah thil ṭhalo kha an tuah ṭhan. Cucaah Jehovah nih Filistin mi hna kut ah kum 40 chung a chanh hna.
2 Mah lioah Dan phun, Zorah khuami Manoah timi pa pakhat a um. A nupi cu a cing i fa a ngei lo.
3 Nikhat cu Jehovah vancungmi cu Manoah nupi sinah a lang i hitin a ti: “Nang cu na cing i fa na ngei lo. Asinain nau na pawi lai i fapate na hrin lai.
4 Atu thawk in mitsur zu siseh, zu he aa pehtlaimi zeihmanh ding hrimhrim hlah. A thiang lomi zeihmanh ei hlah.
5 Fa na pawi lai i fapate na hrin lai. A chuahka in Pathian caah Nazir* mi a si lai i zeitik hmanh ah a sam meh a si lai lo. Anih nih Israel mi kha Filistin mi hna kut in a khamh hna lai.”
6 Cu hnuah a vapa sinah a kal i hitin a ti: “A hmaanmi Pathian mi pakhat cu ka sinah a ra. A muisam cu a hmaanmi Pathian vancungmi a lo. Khuaruahhar taktak a si. Khoika in dah a rat ti kha ka hal lo i a min zong a ka chim lo.
7 Asinain ‘Nau na pawi lai i fapate na hrin lai. Atu thawk in mitsur zu siseh, zu he aa pehtlaimi zeihmanh ding hlah. A thiang lomi zeihmanh ei hlah. Zeicahtiah ngakchia cu a chuahka in a thih tiang Pathian caah Nazir mi a si lai’ tiah a ka ti.”
8 Cu tikah Manoah nih Jehovah kha hitin a nawl: “Jehovah, pakhat tein hal kaan duh. Na rak thlahmi a hmaanmi Pathian mipa kha zaangfahnak in rak thlah ṭhan law a chuak laimi naute hi zeitindah kan zohkhenh awk a si ti kha kan cawnpiak seh.”
9 A hmaanmi Pathian nih a bia kha a ngaihpiak. Manoah nupi khua leng i a ṭhut lioah a hmaanmi Pathian vancungmi cu a sinah a ra ṭhan. Mah lioah a vapa cu a pawng ah a um lo.
10 Manoah nupi cu khulrang in a vapa sinah a va tli i “Kan hnulei i ka sinah a langmi pa cu a ra ṭhan” tiah a ti.
11 Cu tikah Manoah cu a tho i a nupi he mipa sinah cun an va kal. “Ka nupi a chawntu cu na si maw?” tiah a hal tikah “Ka si ko” tiah a leh.
12 Manoah nih “Na chim bang in si ko seh. Ngakchia a nunning cu zeidah a lawh lai i zei rian dah a ṭuan lai?” tiah a hal.
13 Jehovah vancungmi nih cun hitin a ti: “Hrial ding in ka rak chimhmi vialte kha na nupi nih hrial seh.
14 Mitsur ruang in a chuakmi zeihmanh ei hlah seh. Mitsur zu siseh, zu he aa pehtlaimi zeihmanh ding hlah seh. A thiang lomi zeihmanh ei hlah seh. Nawl ka pekmi vialte kha na zulhter lai.”
15 Manoah nih Jehovah vancungmi cu “Zaangfahnak in um ta rih. Meheh no te pakhat kan in chuanpiak lai” tiah a ti.
16 Jehovah vancungmi nih cun “Ka um rih hmanh ah na rawl cu ka ei lai lo. Asinain Jehovah sinah khangh thawinak pek na duh ahcun na pek khawh ko” tiah a ti. Manoah nih Jehovah vancungmi a si kha a hngal lo.
17 Mah tikah Jehovah vancungmi kha “Na chimmi bia a tlin tikah upatnak kan in pek khawh nakhnga na min ahodah a si?” tiah a hal.
18 Asinain Jehovah vancungmi nih “Ka min cu khuaruahhar tuk a si caah rak ka hal duh hlah” tiah a ti.
19 Manoah nih meheh no le changvut thawinak kha Jehovah sinah cun lung cung ah a pekchanh. Manoah le a nupi nih an zoh ko lioah Pathian nih khuaruahhar thil a tuah.
20 Cutin an zoh lioah Jehovah vancungmi cu biakṭheng in a chuakmi meizik chung in van ah a kai. Manoah le a nupi cu vawlei ah an bawk colh.
21 Cu tikah Manoah nih Jehovah vancungmi a si kha a hun hngalh. Jehovah vancungmi cu Manoah le a nupi sinah a lang ṭhan ti lo.
22 Manoah nih a nupi cu “Pathian kha kan hmuh caah kan thi cang lai” tiah a ti.
23 A nupi nih Manoah cu “Jehovah nih thihter a kan duh ahcun khangh thawinak le changvut thawinak kan pekmi kha a cohlang lai lo. Khuaruahhar thil zong a kan hmuhsak lai lo i hi thil vialte zong hi a kan chim lai lo” tiah a ti.
24 A hnuah Manoah nupi nih fapa a hrin i Samson tiah min a sak. Ngakchiapa cu a hun ṭhang thluahmah i Jehovah nih thluachuah a pek.
25 A caan a phanh tikah Zorah le Eshtaol kar Mahanehdan i a um lioah Jehovah thlarau cu Samson cung ah rian ṭuan hram aa thawk.
Footnotes
^ Biafang Fianternak ah zoh.
