Biaceihtu 4:1-24
4 Ehud a thih hnuah Israel mi nih Jehovah mithmuh ah thil ṭhalo kha an tuah ṭhan.
2 Cucaah Jehovah nih Hazor in a ukmi Kanaan siangpahrang Jabin sinah a zuar hna. A ralbawi cu Harosheth-hagoiim ah a ummi Sisera a si.
3 Jabin cu thir nam bunhmi raltuknak rangleng* 900 a ngei. Anih nih Israel mi cu kum 20 chung puarhrang ngai in a hrem hna. Cucaah Israel mi cu Jehovah sinah bawmh hal in an au.
4 Mah lio caan ah Lappidoth nupi, profet nu Deborah nih Israel mi kha bia a ceih hna.
5 Anih cu Efraim tlangram ah a ummi Ramah le Bethel kar i Deborah tum kung tang ah a ṭhu tawn. Israel mi cu Pathian biaceihnak kong hngalh awkah a sinah an kal.
6 Deborah nih mi a thlah hna i Kedesh-naftali ah a ummi Abinoam fapa Barak kha a auhter hna. Cun “Israel Pathian Jehovah nih nawl aan pek: ‘Naftali le Zebulun phun chung in pa 10,000 kha i kalpi hna law Tabor Tlang ah va kai u.
7 Jabin a ralbawi Sisera cu a raltuknak rangleng le a ralkapbu he Kishon tivate ah ka ratpi lai i na kut chung ah kaan pek lai’” tiah a ti.
8 Cu tikah Barak nih “Na ka zulh ahcun ka kal ko lai, na ka zulh lo ahcun ka kal lai lo” tiah a ti.
9 Deborah nih “Kaan zulh hrimhrim lai, asinain ral na dohnak ah nangmah nih thangṭhatnak na hmu lai lo. Zeicahtiah Jehovah nih Sisera cu minu pakhat kut chung ah a pek lai” tiah a ti. Cun Barak kha Kedesh ah a zulh.
10 Barak nih Zebulun phun le Naftali phun kha Kedesh ah a auh hna i pa 10,000 nih an zulh, Deborah zong a sinah a kal ve.
11 Ken phun Heber cu Moses nupi pa Hobab tefa, Ken phun in aa ṭhen i Kedesh khua Zaanannim ah a ummi thingkung nganpi pawng ah a thlam kha a bunh.
12 Abinoam fapa Barak cu Tabor Tlang ah a kai cang ti kha Sisera cu an chimh.
13 Sisera nih thir nam bunhmi raltuknak rangleng 900 le a sinah a ummi ralkap vialte kha a pumh hna i Harosheth-hagoiim in Kishon tivate ah an i thawh colh.
14 Deborah nih Barak cu “Tho tuah! Nihin ah Jehovah nih Sisera cu na kut ah aan pek lai. Jehovah cu na hmaiah a kal, a si lo maw?” tiah a ti. Mah tikah Barak cu a mi 10,000 he Tabor Tlang cun a ṭum.
15 Jehovah nih Sisera le a raltuknak rangleng vialte le a ralkap vialte kha a tuaiter dih hna i Barak vainam thawng in a sunghter hna. Asinain Sisera tu cu a rangleng cung in a ṭum i a ke in a zam.
16 Barak nih raltuknak rangleng le ralkap hna kha Harosheth-hagoiim tiang a dawi hna. Cucaah Sisera ralkap vialte cu vainam in an thi dih, pakhat hmanh an taang lo.
17 Asinain Sisera cu Ken mi Heber nupi Jael thlam ah a ke in a zam. Zeicahtiah Hazor siangpahrang Jabin le Ken mi Heber chungkhar karah daihnak a um.
18 Jael nih Sisera cu a rak don i “Rak lut, ṭih hlah” tiah a ti. Cucaah thlam chung ah cun a lut i Jael nih puan a vorh.
19 Sisera nih “Ka ti a hal, zaangfahnak in ti tlawmpal rak ka pe” tiah a ti tikah cawhnuk rawnmi saphaw thawl kha a on i a dinter. Mah hnuah puan a vorh ṭhan.
20 Sisera nih Jael kha hitin a ti: “Thlam luhnak ah dir law pakhatkhat nih ‘Aho tal an ra maw?’ tiah an in hal ahcun ‘An ra lo’ tiah na ti hna lai.”
21 Heber nupi Jael nih thlam khenhnak fung le sobul kha aa lak. Sisera cu thaba ngai in le thu hluahmah in aa hngilh lioah a thli tein a va naih i thlam khenhnak fung cun a phuzep in vawlei ah tleng lakin a khenh. Cucaah Sisera cu a thi.
22 Sisera a dawitu Barak cu cuka a va phanh tikah Jael nih a rak don i “Ra hmanh, na kawlmi pa cu kaan hmuhsak lai” tiah a ti. Thlam chung a luh tikah Sisera cu a phuzep ah thlam khenhnak fung bunh buin a rak thih ko kha a hmuh.
23 Cu ni ah Pathian nih Kanaan siangpahrang Jabin cu Israel mi hmaiah a sunghter.
24 Israel mi nih fak chin lengmang in an doh i a donghnak ah Kanaan siangpahrang Jabin cu an thah.
Footnotes
^ A hrampi, “thir rangleng.”
