Biaceihtu 2:1-23
2 Jehovah vancungmi cu Gilgal in Bokhim ah a kal i Israel mi kha hitin a ti hna: “Izipt ram in kaan chuahpi hna i nan pupa hna sinah chiatserh in bia kaa kammi ram ah kaan luhpi hna. Cun ‘Nanmah he ka sermi biakamnak kha zeitik hmanh ah ka hrawk lai lo.
2 Nannih zong cuka rammi hna he biakamnak nan ser lai lo i an biakṭheng kha nan hrawh hna lai’ tiah ka rak ti. Asinain ka bia kha nan ngai lo. Zeicah nan ngaih lo?
3 Cucaah ‘Nan hmai in ka ṭhawl ti hna lai lo. Annih cu nan caah rap an si lai i an pathian biak awkah an in lem hna lai’ tiah ka ti.”
4 Jehovah vancungmi nih cutin a chim tikah Israel mi vialte cu thangpi in an ṭap.
5 Cucaah cuka hmun kha Bokhim* tiah min an pek i Jehovah sinah rai an thawi.
6 Joshua nih a thlah hna tikah Israel mi cu anmahle an comi ram cio lak awkah an i thawh.
7 Israel mi nih Joshua a nun chung le Joshua nakin a nunkhua a sau deuh i Israel mi hna caah Jehovah tuahmi thil lianngan vialte a hmumi upa pawl an nun chung cu Jehovah kha an biak.
8 Jehovah sal Nun fapa Joshua cu kum 110 a si ah a thi.
9 Gaash Tlang chaklei, Efraim tlangram ah a ummi Timnath-heres i a comi ram ah an vui.
10 Anmah chan mi vialte cu an pupa hna sinah pumh an si.* Cun Jehovah kong le Israel mi caah Pathian nih a tuahmi thil kong a hngal lomi a dang chan pakhat a hung chuak.
11 Israel mi nih Jehovah mithmuh ah thil ṭhalo an tuah i Baal pathian hna kha an biak.
12 Izipt ram in a rak chuahpitu an pupa hna Pathian Jehovah kha an kaltak. An pawngkam mi nih an biakmi pathian hna hnu kha an zulh i an kunpiak hna. Cuticun Jehovah kha a thin an hunter.
13 Jehovah kha an kaltak i Baal le Ashtoreth milem hna kha an biak.
14 Mah tikah Jehovah thinhunnak cu Israel mi cung ah a alh i anmah a dotu le an thilri a chuttu hna kut ah a chanh hna. An pawngkam ral hna sinah a zuar hna. Cucaah an ral kha an tei kho ti hna lo.
15 An kalnak paoh ah Jehovah nih a ralchanh hna. Jehovah nih a chim bantuk in le Jehovah nih chiat a ser bantuk in an cung ah thil ṭhalo a tlunter i fakpi in harnak an tong.
16 Cucaah Jehovah nih anmah a dotu le an thil a chuttu hna kut in khamh awkah biaceihtu kha a chuahter hna.
17 Asinain biaceihtu hna bia kha an ngai duh lo. A dang pathian kha an biak* i an kunpiak hna. An pupa hna nih an rak zulhmi lam in khulrang in an pial. An pupa hna nih Jehovah nawlbia kha an rak zulh nain annih tu cu an zul lo.
18 An caah Jehovah nih biaceihtu a chuahter hna i Jehovah cu biaceihtu hna sinah a um. Biaceihtu hna chan ah Israel mi cu an ral kut in a khamh hna. Anmah a hremtu hna le an cung ah a puarhrangmi hna ruang ah an hrum-ai tikah Jehovah nih a zaangfah hna.*
19 Asinain biaceihtu a thih tikah Israel mi nih pathian dang kha an biak ṭhan hna i an kunpiak hna. An pupa hna nakin an nunning a rawkral deuh ṭhan. An tuahsernak le an lungkhonnak kha an kaltak hlei lo.
20 A donghnak ah Jehovah thinhunnak cu Israel mi cung ah a alh i hitin a ti: “Hi miphun nih an pupa hna sinah ka sermi biakamnak kha an buar i ka nawl an ngaih lo caah,
21 kei zong nih Joshua a thih hnu in a taang rihmi miphun pakhat te hmanh ka ṭhawlpiak ti hna lai lo.
22 Mah cu Israel mi nih an pupa hna bantuk in keimah Jehovah lam kha an zul lai maw, zul lai lo ti hneksak awkah a si.”
23 Cucaah Jehovah nih a taang rihmi miphun hna cu a umter rih hna, a ṭhawl colh hna lo i Joshua kut ah a pe hna lo.
