Biaceihtu 19:1-30
-
Benjamin mi nih Gibeah ah nupa sualnak an tuah (1-30)
19 Mah lio caan ah Israel ram ah siangpahrang an um lo. Efraim tlangram a kiken ah a ummi Levi mipa nih Judah ram Bethlehem khuami nu pakhat kha nuchun caah a ṭhit.
2 A nuchun cu a cung ah zumhawktlak loin a um i Judah ram Bethlehem khua i a pa inn ah a kir. Cuka ah thla 4 chung a um.
3 A nuchun kha va hlemh in va auh ṭhan awkah Levi mipa cu a kal. A salpa le laa pahnih zong aa kalpi. A va phanh tikah a nuchun nih a pa inn ah a luhpi. A pa nih a hmuh tikah lunglawm tein a rak don i,
4 nithum chung a caamter. An ei, an ding i cuka ah cun a riak.
5 Nilinak ni ah zingka tein a tho i kal aa timh tikah a nuchun pa nih “Na tha a um nakhnga pakhatkhat ei ta. Cu hnuah na kal te lai” tiah a ti.
6 Cucaah an ṭhu i an ei, an ding. A nuchun pa nih cun “Tuzan te cu riak rih ko, nuam tein um ko” tiah a ti.
7 Cun mipa cu kal ding in a thawh tikah a nuchun pa nih a thlauh lengmang caah cu zan cu a riak ṭhan.
8 Ninganak ni ah zingka tein a tho i kal aa timh tikah a nuchun pa nih cun “Na tha a um nakhnga pakhatkhat ei ta rih” tiah a ti. Cucaah zanlei tiang an ṭhu i an ei.
9 Mipa cu a nuchun le a salpa he kal ding in aa timh tikah a nuchun pa nih “Zoh hmanh! Ni a tla cang lai. Khua a mui hnik cang. Tuzan cu riak rih ko law nuam tein um ko. Thaizing zingkate ah na tho lai i na inn ah cun na tlung te lai” tiah a ti.
10 Asinain a riak duh ti lo. Cucaah a laa pahnih kha kengdanh a danh hna. A nuchun le a salpa he an i thawh i Jerusalem tiah auhmi Jebus khua tiang an phan.
11 Jebus khua pawng an phanh tikah khua a mui deng cang. Cucaah a salpa nih “Jebus mi hna khua ah hin kan riah ko lo?” tiah a bawipa cu a ti.
12 Asinain “Israel mi a si lomi ramdang mi khua ah cun kan riak lai lo. Gibeah khua tiang kan kal ko lai” tiah a bawipa nih a ti.
13 Cun a salpa kha “Gibeah asiloah Ramah tiang kal u sih; pakhatkhat paoh ah kan riak te lai” tiah a ti.
14 Cuticun an kal thluahmah i Benjamin phun ta a simi Gibeah khua pawng an phanh tikah ni cu a tla.
15 Cucaah Gibeah khua ah cun riah ding in an lut i khua chung tual ah an ṭhu, asinain an inn ah riah ding in ahohmanh nih an sawm hna lo.
16 Nitlak hnupi ah tarpa pakhat cu lo in a rak tlung. Anih cu Efraim tlangram in a rami a si i Gibeah khua ah sau nawn a um cang. Khuami hna cu Benjamin phun an si.
17 Khua chung tual ah khual pawl an ṭhutmi kha a hmuh tikah “Khoika in dah nan rat, khoika ah dah nan kal lai?” tiah a ti hna.
18 Levi mipa nih “Judah ram Bethlehem khua in kan ra. Cuka ah ka va tlawng ta i ka umnak Efraim tlangram a kiken ah ka tlung lai. Jehovah inn ah ka kal lai,* asinain ahohmanh nih an inn ah riah ding in an ka sawm lo.
19 Kan laa caah capawl le rawl, keimah, ka nupi le ka salpa caah changreu le mitsur zu a za in kan ngei ko. Tling tein kan ngei dih” tiah a ti.
20 Tarpa nih cun “Ka inn ah rak tlung u.* Nan herhmi paoh kaan tuahpiak hna lai. Khua chung tual ah hin cun riak hlah u” tiah a ti hna.
21 Cun a inn ah a kalpi hna i laa kha rawl a pek hna. Annih zong an ke an i ṭawl i an ei, an ding.
22 An ei, an din lioah khua chung i mi hrokhrol pawl nih inn kha an kulh i innka cu an cumh chih. Cun tarpa cu “Na inn i a tlungmi pa kha rak chuahpi! Kan ihpi lai” tiah an ti.
23 Inn-ngeitu cu a chuak i hitin a ti hna: “Unau hna, cu bantuk thil ṭhalo cu tuah hlah u. Anih cu ka khual a si. Zaangfahnak in cu bantuk ningzah awk thil cu tuah hlah u.
24 Hika ah ka fanu ngaknu le a nuchun an um ko. Anmah kha ka rak chuahpi hna lai i thlauh khawh nan si ti lo ahcun ningcang loin nan rak tuah khawh ko hna. Hi mipa cung ah cun ningzah awk tlak thil kha tuah hlah u.”
25 Asinain a bia kha an ngai duh lo. Cucaah Levi mipa nih a nuchun cu inn leng ah a chuah. Zan khuadei an tlaihhrem i ningcang loin an tuah. Khua a dei tik ceo ah an thlah.
26 Khuadeika te ah minu cu a ra i a bawipa aa ṭhumhnak tarpa innka hram ah a tlu. Cuka ah khua a ceu tiang a ril ko.
27 Zingka ah a bawipa cu a tho i a khuallam peh ding in innka a hun tikah a nuchun cu innka hram ah a kut chiah in a rak rilh ko kha a hmuh.
28 A nuchun cu “Tho, kal u sih” tiah a ti. Asinain zeihmanh a let ti lo. Cun a la cung ah a khin i inn ah a tlunpi.
29 Inn a phanh tikah nam* kha aa lak, a nuchun ruak cu ṭhen 12 in a can i Israel phun pakhat cio kha a kuat hna.
30 A hmumi vialte nih “Izipt ram in Israel mi kan rak chuah lioin atu tiang hi bantuk thil hi a um bal lo i a can zong a cang bal lo. Mah kong hi ruat u sih, i ceihṭi u sih law zeidah tuah awk a si ti kha biakhiak u sih” tiah pakhat le pakhat an i ti.
