Biaceihtu 8:1-35
8 Efraim mi hna nih Gideon cu “Zeicah hitin na kan tuah? Midian mi na doh hna lioah zeicah na kan auh ve lo?” tiah an ti i fakpi in an mawhchiat.
2 Mah tikah Gideon nih “Ka tuahmi cu nan tuahmi he tahchunh ahcun zeihmanh a si lo. Abiezer mi nih mitsur thei kan lawhmi cu Efraim mi nih a ṭilṭawt nan charmi tluk hmanh a si lo.
3 Pathian nih Midian bawi Oreb le Zeeb kha nan kut ah aan pek cang hna. Ka tuahmi cu nan tuahmi he tahchunh ahcun zeihmanh a si lo” tiah a ti hna tikah an lung a dai.
4 Mah hnuah Gideon le a mi 300 cu Jordan Tiva ah an phan i an tan. An ba tuk nain an ral cu an dawi thluahmah rih ko hna.
5 Sukkoth khua an phanh tikah khuami cu “Ka mi pawl an bat tuk caah zaangfahnak in changreu pe hna u, zeicahtiah Midian siangpahrang Zebah le Zalmunna kha kan dawi hna” tiah a ti hna.
6 Asinain Sukkoth khua i bawi hna nih “Zebah le Zalmunna cu na kut chung ah um cang hna seh law cu bang na ralkap cu zeicah changreu kan pek hna lai?” tiah an ti.
7 Gideon nih “A ṭha! Zebah le Zalmunna kha Jehovah nih ka kut chung ah a ka pek tikah ramlak i hling le so in kaan tuk hna lai” tiah a ti hna.
8 Cun Penuel khua an phanh tikah khuami cu cutin a hal ve hna. Asinain Sukkoth khuami bantuk in an rak leh ve.
9 Cucaah Gideon nih “Teinak he ka rak kir tikah nan innsang hi ka chimh lai” tiah a ti hna.
10 Zebah le Zalmunna cu an ralkap 15,000 hrawng he Karkor ah an um. Vainam aa putmi ralkap 120,000 cu an thih dih cang caah Nichuahlei ralkap lakah mah zat lawng an taang.
11 Gideon cu thlam ah a ummi nih an hmanmi lam ning in Nobah le Jogbehah nichuahlei ah a kal thluahmah i riahhmun kha an i ruah lo liopi ah a va doh hna.
12 Midian siangpahrang pahnih Zebah le Zalmunna cu an zam. Gideon nih a dawi hna i a tlaih hna. Cucaah ralkap vialte cu zei tuah awk hngal loin an um.
13 Joash fapa Gideon cu raltuknak hmun khan Heres lei a kaimi lam ning in a rak kir.
14 Lam ah Sukkoth khuami mino pa pakhat kha a tlaih i a kherhhlai tikah Sukkoth khua bawi le upa 77 an min kha a ṭialpiak.
15 Cun Gideon cu Sukkoth khuami hna sinah a kal i “‘Zebah le Zalmunna cu na kut chung ah um cang hna seh law cu bang a bami na ralkap cu zeicah changreu kan pek hna lai?’ tiah nehsawh in nan rak ka timi Zebah le Zalmunna cu anmah hi an si” tiah a ti hna.
16 Mah hnuah khua upa kha a auh hna, ramlak hling le so in a tuk hna i a chimhhrinh hna.
17 Cun Penuel khua i innsang kha a chimh i khuami cu a thah hna.
18 Gideon nih Zebah le Zalmunna kha “Tabor khua i nan thahmi hna cu zei bantuk mi dah an si?” tiah a hal hna tikah “Nangmah bantuk an si. Siangpahrang fapa an lo” tiah an leh.
19 Gideon nih “Annih cu chuakṭi khat ka unau an si. Jehovah a nun bang in an nunnak kha rak zuah hna u law cu kaan that hna hnga lo” tiah a ti hna.
20 Cun a fater Jether kha “Tho law that hna” tiah a ti. Asinain Jether cu mino te a si rih caah a ṭih i a vainam kha a zuk ngam lo.
21 Zebah le Zalmunna nih “Tho law nangmah nih rak kan that ko. Pasal na si lo maw?” tiah an ti. Cucaah Gideon cu a tho i Zebah le Zalmunna cu a thah hna. Cun an kalauk hngawng ah oihmi thlapa cheu mui hlawn thil kha a lak.
22 A hnuah Israel mi nih Gideon kha “Midian mi hna kut in na kan khamh caah nangmah, na fapale le na tule nih rak kan uk ko u” tiah an ti tikah,
23 Gideon nih “Kaan uk hna lai lo. Ka fapa zong nih aan uk hna lai lo. Jehovah nih aan uk hna lai” tiah a ti hna.
24 Cun “Hal kaan duhmi hna pakhat a um: hranchaw lakin hnartonh pakhat cio rak ka pe u” tiah a ti hna. (Zeicahtiah an teimi hna cu Ishmael mi an si caah sui hnartonh an ngei.)
25 Annih nih “Kan in pek lai ta” tiah an ti i puan kha an phah. Cuka ah an lakmi hranchaw chung in hnartonh pakhat cio an chiah.
26 Gideon nih a hmuhmi sui hnartonh cu shekel* 1,700 a rit. Mah leng ah thlapa cheu mui hlawn thil, hnatonh, Midian siangpahrang nih an i hrukmi maimaw rong tuuhmul puan le kalauk hngawng oih hna zong a hmuh rih.
27 Gideon nih a hmuhmi sui in tlangbawi angki* pakhat a ser i a umnak Ofrah khua ah a chiah. Israel mi cu cuka ah an ra i mah kha an biak.* Cucaah angki cu Gideon le a chungkhar mi hna caah rap a hung si.
28 Cuticun Midian mi cu an sung i Israel mi kha an zuamcawh ngam ti hna lo. Gideon chan ah ram cu kum 40 chung a dai.
29 Joash fapa Jerubbaal cu inn ah a ṭin i cuka ah khua a sa.
30 Gideon cu nupi tampi a ngeih caah fapa 70 a ngei.
31 Shekhem ah a ummi a nuchun nih fapa pakhat a hrinpiak. A min ah Abimelek tiah a sak.
32 Joash fapa Gideon cu chan tlung in a nun hnuah a thi. Abiezer mi hna umnak Ofrah khua i a pa Joash thlan ah an vui.
33 Gideon a thihle cangka Israel mi nih Baal kha an biak ṭhan.* Baalberith kha an pathian ah an ser.
34 Israel mi nih an pawngkam ral vialte sinin a khamhtu hna Jehovah Pathian kha an hngal ti lo.
35 Gideon tiah auhmi Jerubbaal nih ṭhatnak tampi a tuahpiak hna nain Israel mi nih a chungkhar cung ah a fekmi dawtnak an langhter lo.
Footnotes
^ Shekel pakhat cu 11.4 g he aa tluk. Thlaihhlei B14 ah zoh.
^ Biafang Fianternak ah zoh.
^ Asiloah “mah he hlawh an hlang.”
^ Asiloah “Baal sinah hlawh an hlang ṭhan.”
