Biaceihtu 18:1-31
18 Mah lio caan ah Israel ram ah siangpahrang an um lo. Dan phun cu Israel phun hna lakah an comi ro kha an lak dih rih lo caah umnak hmun an kawl.
2 Dan phun nih ram va kawl awk le va ngiat awkah an phun chung in thil a ti khomi pa panga kha an thim hna i Zorah le Eshtaol in an thlah hna. “Va kal u law ram kha va ngia u” tiah an ti hna. An i thawh i Efraim tlangram an phanh tikah Mikah inn ah zan an riak.
3 Mikah inn pawng an um lioah Levi mi mino pa aw kha an i cinken i a sinah an va kal. Cun “Aho nih dah hika ah aan ratpi? Zeidah na tuah? Zeicah hika ah na um?” tiah an hal.
4 Cu tikah a caah Mikah nih a tuahmi kha a chimh hna i “Tlangbawi ṭuanpiak ding in a ka hlan” tiah a leh hna.
5 Cun “Kan kal hnawhchanmi hi kan hlawh a tling lai maw, tling lai lo ti kha zaangfahnak in Pathian rak kan halpiak” tiah an ti.
6 Tlangbawi nih “Hnangam tein va kal ko u, Jehovah nih nan khuallam ah aan umpi hna lai” tiah a ti hna.
7 Pa panga cu an i thawh ṭhan i Laish khua an phan. Khuami hna cu Sidon khuami bantuk in midang bochan hau loin an ummi, ral nih an kan doh lai ti thinphan loin hnangam tein an ummi, hremtu le an ram hnahnawhnak a petu an um lomi, Sidon khuami hna he an i hlatmi le midang aho he hmanh an i pehtlaih lomi kha an hmuh.
8 Zorah le Eshtaol khua an rak kir ṭhan tikah an unau hna nih “Zeidah nan lawh?” tiah an hal hna.
9 Annih nih “Ram cu a ṭha tuk ti kha kan hmuh, va do hna u sih. I cungcang loin khulrang in an ram cu va la u sih.
10 Ram cu a kau i rammi cu zeihmanh thinphan loin an ummi kha nan hmuh te lai. Vawleicung i zei thil hmanh bau loin a umnak ram kha Pathian nih aan pek cang hna” tiah an ti hna.
11 Dan phun chungmi hriamtlaimi pa 600 cu Zorah le Eshtaol khua in an i thawh i,
12 Judah ram Kiriath-Jearim ah riahhmun an khuar. Cucaah Kiriath-Jearim nitlaklei ah a ummi cuka hmun cu nihin ni tiang Maha-nehdan* tiah an auh.
13 Cuka in Efraim tlangram ah an kal i Mikah inn an phan.
14 Laish ram ngiat awkah a rak kalmi pa panga nih an unau hna kha “Hika inn ah hin tlangbawi angki,* terafim* milem tete, themhmi milem le tit in thletmi milem a um ti kha nan hngal maw? Zeidah kan tuah awk a si ti kha ruat hmanh u” tiah an ti hna.
15 Cucaah Levi mi mino pa a umnak Mikah inn ah an kal i mino pa cu “Zeidah na lawh?” tiah an hal.
16 Mah lioah hriamtlaimi Dan phun pa 600 cu kutka hram ah an dir.
17 Ram ngiat awkah a rak kalmi pa panga cu themhmi milem, tlangbawi angki, terafim milem tete le tit in thletmi milem va lak awkah innchung ah an lut. (Tlangbawi tu cu hriamtlaimi pa 600 he kutka ah a dir.)
18 Mikah inn ah cun an lut i themhmi milem, tlangbawi angki, terafim milem tete le tit in thletmi milem cu an lak tikah tlangbawi nih “Zeidah nan tuah?” tiah a ti hna.
19 Annih nih “Dai tein um, zeihmanh chim hlah. Kan sinah ra law ruahnak a kan cheutu* le tlangbawi na si lai. Chungkhar pakhat caah tlangbawi ṭuan maw a ṭha deuh asiloah Israel ram i phun pakhat le chungkhar dihlak caah tlangbawi ṭuan dah a ṭha deuh?” tiah an ti.
20 Cu tikah tlangbawi cu a lung a tling i tlangbawi angki, terafim milem tete le themhmi milem kha a lak i a zulh hna.
21 An i thawh ṭhan tikah ngakchia le saṭil le thilri mansung kha a hmaiah an chiah hna.
22 Lamhlat nawn an phanh hnuah Mikah a innpa hna cu hmunkhat ah an i pum i Dan mi cu an dawi hna.
23 An hei au hnawh hna tikah Dan mi cu hnulei an i her i “Zeidah a cang? Zeicah mibu he cun na kan dawi?” tiah Mikah kha an ti.
24 Mikah nih “Ka sermi ka pathian hna kha nan i lak, tlangbawi zong nan i kalpi, zeidah ka ngeih ti kun lai? Keimah tu cu ‘Zeidah a cang?’ nan ka ti lehlam” tiah a ti hna.
25 Dan mi nih cun “Rak kan au hnawh len hlah, a thin a hungmi hna nih an in zuan hnawh lai i nangmah le na chungkharmi hna kha an in thah sual hna lai” tiah an ti.
26 Cun Dan mi cu an kal. Dan mi cu amah nakin an ṭhawn deuh kha a hmuh tikah Mikah zong inn ah a kir ve.
27 Dan mi cu Mikah sermi milem tete le a tlangbawi kha an i lak hnuah Laish khua ah an kal. Zeihmanh thinphan loin hnangam tein a ummi khuami cu an doh hna, vainam in an thah hna i khua cu mei in an khangh.
28 Laish khua cu Beth-rehob ram ta a simi nelrawn ah a um i Sidon khua he aa hlat leng ah aho he hmanh an i pehtlaih lo caah a rak khamhtu an um lo. Cun Dan mi nih khua cu an dirh ṭhan i cuka ah khua an sa.
29 Israel fapa, an pupa Dan min kha la in Laish khua cu Dan tiah a min an thlen.
30 A hnuah Dan mi hna nih themhmi milem cu cuka ah an bunh. Moses fapa Gershom i a fapa Jonathan le a tefa cu rammi pawl sal i kalpi an si hlan tiang Dan phun caah tlangbawi rian an ṭuan.
31 A hmaanmi Pathian inn cu Shiloh i a um chung vialte Mikah sermi themhmi milem cu Dan khua ah a um.
Footnotes
^ A sullam “Dan Riahhmun.”
^ Biafang Fianternak ah zoh.
^ Biafang Fianternak ah zoh.
^ A hrampi, “kan pa.”
