Biaceihtu 1:1-36
1 Joshua a thih hnuah Israel mi nih Jehovah cu “Kanaan mi hna doh awkah ahodah a kal hmasa bik lai?” tiah an hal.
2 Jehovah nih “Judah phun a kal lai. Ram cu a kut chung ah ka pek cang” tiah a ti.
3 Judah phun nih an unau Simeon phun cu “Kanaan mi hna va doh awkah kan comi ram ah rak kan zul u. Nan comi ram ah kan in zulh ve hna lai i kan in bawmh hna lai” tiah an ti hna. Cucaah Simeon phun nih cun an zulh hna.
4 Judah phun cu an va kal i Jehovah nih Kanaan mi le Periz mi kha an kut chung ah a pek hna caah Bezek khua ah pa 10,000 kha an tei hna.
5 Bezek khua ah Adonibezek kha an hmuh i an doh. Kanaan mi le Periz mi cu an tei hna.
6 Adonibezek cu a zam i an dawi. An tlaih tikah a kutpi le a kepi kha an tan hna.
7 Adonibezek nih “Siangpahrang 70 kha an kutpi le an kepi ka rak tan hna i ka cabuai tang ah rawl ṭilṭawt an rak char. Ka rak tuahmi ning in Pathian nih a ka cham ṭhan ko” tiah a ti. Adonibezek cu Jerusalem khua ah an kalpi i cuka ah a thi.
8 Judah mi nih Jerusalem cu an doh i an lak. Khuami kha vainam in an thah hna i khua cu mei in an khangh.
9 Cun Judah mi cu tlangram, Negeb le Shefelah ah a ummi Kanaan mi doh awkah an va ṭum.
10 Judah mi nih Hebron (Hebron cu Kiriath-arba tiah auh a rak si) ah a ummi Kanaan mi cu an doh hna i Sheshai, Ahiman le Talmai kha an thah hna.
11 Cuka in an i thawh i Debir khuami kha an doh hna. (Debir cu Kiriath-sefer tiah auh a rak si.)
12 Kaleb nih “Kiriath-sefer a do i a la khomi cu ka fanu Aksah kha nupi caah ka pek lai” tiah a ti.
13 Kaleb a nau Kenaz fapa Othniel nih khua cu a lak. Cucaah a fanu Aksah kha nupi caah a pek.
14 A va inn a kal lioah Aksah nih a pa sinah lo pakhat hal ding in a va kha a forh. Cun Aksah cu laa cung in a ṭum.* Kaleb nih “Zeidah na duh?” tiah a hal.
15 Anih nih “Zaangfahnak in thluachuah rak ka pe. Thlanglei ah ram pakhat* na ka pek cang caah Gulloth-maim* zong hi rak ka pe” tiah a ti. Cucaah Chaklei Gulloth le Thlanglei Gulloth kha a pek.
16 Moses nupi pa tefa a simi Ken mi hna cu Judah mi he tum kung khua in Arad thlanglei Judah ramcar ah an ra i cuka mi hna sinah khua an sa ve.
17 Judah mi tu cu an unau Simeon phun he an i thawh. Zefath khua ah a ummi Kanaan mi kha an doh hna i an hrawh cikcek hna. Cucaah mah khua cu Hormah* tiah min an pek.
18 Judah mi nih Gaza le a pawngkam ram, Ashkelon le a pawngkam ram, Ekron le a pawngkam ram kha an lak.
19 Jehovah cu Judah mi sinah a um caah tlangram kha an lak khawh. Asinain rawn ah a ummi hna cu an ṭhawl kho hna lo. Zeicahtiah annih cu thir nam bunhmi raltuknak rangleng* an ngei.
20 Moses nih bia a rak kamh ning in Kaleb cu Hebron khua kha an pek i Anak fapa pathum cu cuka in a ṭhawl hna.
21 Asinain Jerusalem ah a ummi Jebus mi tu cu Benjamin phun nih an ṭhawl hna lo. Cucaah Jebus mi cu nihin ni tiang Jerusalem khua ah Benjamin mi hna sinah an um ve.
22 Mah lio caan ah Josef tefa hna nih Bethel kha an va doh i Jehovah cu an sinah a um.
23 Josef tefa hna nih Bethel khua cu an va ngiat. (Mah khua cu Luz tiah auh a rak si.)
24 Mi-ngiatu hna nih khua chung in a rak chuakmi pa pakhat kha an hmuh tikah “Khua chung luhnak lam na kan hmuhsak ahcun na nunnak kan in zuah lai”* tiah an ti.
25 Cu pa nih khua luhnak lam cu a hmuhsak hna. Khuami kha vainam in an thah dih hna nain cu pa le a chungkhar tu cu an luatter hna.
26 Cu pa cu Hit mi hna ram ah a kal i khua pakhat a dirh, mah khua cu Luz tiah min a pek i nihin ni tiang cutin auh a si.
27 Manasseh mi nih Beth-shean le a pawngkam khua hna, Taanakh le a pawngkam khua hna, Dor le a pawngkam khua hna, Ibleam le a pawngkam khua hna, Megiddo le a pawngkam khua hna kha an la lo. Kanaan mi cu cuka ram ah an i benh chih.
28 Israel mi cu an hun ṭhawn tikah Kanaan mi cu sal ah an ser hna. Kanaan mi cu an dihlak in an ṭhawl hna lo.
29 Efraim mi nih Gezer ah a ummi Kanaan mi kha an ṭhawl hna lo. Cucaah Kanaan mi cu Gezer khua ah an sinah an um ve.
30 Zebulun mi nih Kitron le Nahalol khuami kha an ṭhawl hna lo. Kanaan mi cu an sinah an um ve i sal ah an ser hna.
31 Asher mi nih Akko, Sidon, Ahlab, Akhzib, Helbah, Afik le Rehob khuami kha an ṭhawl hna lo.
32 Asher mi nih cuka ram ah a ummi Kanaan mi cu an ṭhawl hna lo caah Kanaan mi sinah cun an um ve.
33 Naftali mi nih Beth-shemesh le Beth-anath khuami kha an ṭhawl hna lo i cuka ram ah a ummi Kanaan mi sinah cun an um ve. Beth-shemesh le Beth-anath khuami cu sal ah an ser hna.
34 Amor mi nih Dan mi hna kha rawn ah ṭumnak nawl an awnh hna lo. Tlangram ah an umter chih hna.
35 Cucaah Amor mi cu Heres Tlang, Aijalon le Shaalbim khua ah an i benh chih. Asinain Josef tefa hna cu an hun ṭhawn tikah annih cu sal ah an ser hna.
36 Amor ram cu Akrabbim kainak in aa thawk i Sela in a cunglei ah a kai.
