Biaceihtu 21:1-25
-
Benjamin phun a tlau nakhnga lo an timhtuah (1-25)
21 Israel mi nih “Ahohmanh kan fanule kha Benjamin pa kan vatter hna lai lo” tiah Mizpah ah chiatserh in bia an i kam.
2 Cun Israel mi cu Bethel ah an kal, a hmaanmi Pathian hmaiah zanlei tiang an ṭhu i fakpi in an ṭap.
3 Annih nih “Maw Israel Pathian Jehovah, Israel miphun lakah zeicah hi bantuk thil hi a um? Nihin ah Israel phun pakhat cu zeicah an bau?” tiah an ti.
4 Mi cu a thaizing zingkate ah an tho i biakṭheng pakhat an ser, cun khangh thawinak le hawikomhnak thawinak kha an pekchanh.
5 Cu hnuah Israel mi nih “Israel phun dihlak chung in Jehovah hmaiah a rak chuak lomi an um maw?” tiah an ti. Zeicahtiah Mizpah i Jehovah hmaiah a chuak lomi paoh cu thah an si hrimhrim lai tiah bia an rak i kam.
6 Israel mi cu an unau Benjamin phun nih an tonmi thil cung ah an ngaih a chia i “Nihin ah Israel phun pakhat cu hloh an si cang.
7 Kan fanule kha nupi caah pek lo ding in Jehovah hmaiah chiatserh in bia kan i kam cang fawn i a taang rihmi Benjamin mi hna hi khoika in dah nupi kan kawlpiak hna lai?” tiah an ti.
8 Annih nih “Israel phun chung in Mizpah i Jehovah hmaiah a rak chuak lomi an um maw?” tiah an hal. Cu tikah Israel mibu an i pumhnak hmun ah Jabesh-gilead khuami pakhat hmanh an rak chuah lo kha an hmuh.
9 Milu an rel tikah Jabesh-gilead khuami pakhat hmanh an um lo.
10 Israel mibu nih a ṭhawng bikmi ralkap 12,000 kha an thlah hna i “Jabesh-gilead khuami kha vainam in va that hna u, nu le ngakchia hmanh va ngaan hna hlah u.
11 Pa vialte le pa he a umṭi cangmi nu vialte kha nan thah hna lai” tiah an cah hna.
12 Jabesh-gilead khuami lakah pa he a umṭi bal lomi ngaknu thiang 400 kha an hmuh hna. Annih cu Kanaan ram Shiloh i riahhmun ah an ratpi hna.
13 Cun mibu nih Rimmon lungpi ah a ummi Benjamin pa hna sinah mi an thlah hna i daihnak bia an thanh hna.
14 Cu tikah Benjamin pa hna cu an ram ah an kir ṭhan. Israel mi nih Jabesh-gilead in an tlaihmi nu pawl kha an pek hna nain an i za lo.
15 Israel miphun chung in Benjamin phun kha Jehovah nih a ṭhen hna caah Israel mi cu Benjamin phun nih an tonmi thil cung ah an ngaih a chia.
16 Mibu lak i upa hna nih “Benjamin phun chung i nu vialte cu thah dih an si cang fawn i a taang rihmi Benjamin pa hna hi khoika in dah nupi kan kawlpiak hna lai?” tiah an ti.
17 Annih nih “A taang rihmi Benjamin mi hna ca zong ah ram covo a um awk a si. Cu lo ahcun Israel chung in phun pakhat a tlau sual lai.
18 ‘A fanu kha Benjamin pa a vattermi cu chiatserh si ko seh’ tiah bia kan rak i kam cang caah kan fanule kha nupi caah kan pe kho hna lo” tiah an ti.
19 Cu tikah annih nih “Bethel chaklei, Bethel in Shechem lei kainak lam nichuahlei, Lebonah thlanglei ah a ummi Shiloh ah kum fatin Jehovah caah puai a um kha ta” tiah an ti.
20 Cucaah Benjamin pa kha an auh hna i hitin an ti hna: “Va kal u law mitsur dum ah va i thup u.
21 Shiloh khua i ngaknu pawl cu laam awkah an rak chuah tikah mitsur dum in nan chuak lai i nupi caah pakhat cio nan i tlaih hna lai, cun nan ram ah nan kir ṭhan lai.
22 An pale le an ṭale nih an kan phunzai hnawh ahcun ‘Rak kan theithiam ko u, raldohnak kan kal lioah an caah nupi a za in kan chuahpi kho lo. Nannih zong nih nan biakamnak buar loin nupi nan pe kho ṭung hna lo’ tiah kan ti hna lai.”
23 Benjamin phun nih an chim ning tein an tuah. A laammi nu hna lakin nupi caah pakhat cio an tlaih hna i an ram ah an kir. Cun khua cu an dirh ṭhan i cuka ah khua an sa.
24 Cu hnuah Israel mi cu an i ṭhen i an phun le an chungkhar an umnak, an comi ram cio ah an kir.
25 Mah lio caan ah Israel ram ah siangpahrang an um lo. Mikip nih an mithmuh ah a ṭha an timi paoh kha an tuah.
