Unsang Matanga sa Pagkaamahan ang Diyos?

DAGHAN ang makasag-ulo sa Amahan Namo, o Pag-ampo sa Ginoo​—ang sulondang pag-ampo nga gitudlo ni Jesus sa iyang mga tinun-an. (Mateo 6:9-13) Sa matag higayon nga ilang litokon ang maong pag-ampo, ilang tawgon ang Diyos nga “Amahan Namo.” Apan, pila lang ang makaingon nga sila nakaila gayod kaniya?

Komosta sa imong bahin? Nakaila ka ba gayod sa Diyos? Suod ka ba kaayo kaniya nga puwede nimong masulti kaniya ang imong makalilipay ug makapasubo nga mga kasinatian? Sa pagkatinuod, unsay buot ipasabot sa pagkaila kaniya?

“Jehova ang Iyang Ngalan”

Alang sa usa ka gamayng bata, ang iyang amahan mao kanang iyang gitawag ug Papa. Apan samtang magkadako siya, iyang mahibaloan ang ngalan ug reputasyon sa iyang amahan ug lagmit iyang ipasigarbo siya. Komosta ang bahin sa atong langitnong Maghahatag ug Kinabuhi? Nakaila ka ba sa iyang ngalan ug kon unsay kahulogan niana?

Bisan tuod daghan ang molitok sa pamulong nga “Balaanon ang imong ngalan” sa dihang sila mangadye sa Pag-ampo sa Ginoo, sila tingali dili makatubag kon pangutan-on, “Unsa may iyang ngalan?” (Ang Bag-ong Maayong Balita Biblia) Ang punog-bituon nga kalangitan, ang habog nga kabukiran, ang lainlaig kolor nga kagaangan (coral reef) nga puno sa nagkalidadis nga mga linalang nagpamatuod nga adunay Diyos. Apan, wala kini magtug-an kanato sa iyang ngalan. Aron mahibaloan kanang ngalana, kinahanglan natong susihon ang Bibliya. Kini laktod nga nag-ingon: “Jehova ang iyang ngalan.”​—Exodo 15:3.

Gusto sa Diyos nga atong mailhan ang iyang ngalan nga Jehova. Ngano man? Tungod kay ang iyang ngalan nagpaila kon kinsa siya. Ang maong ngalan sa literal nagkahulogang “Iyang Gipahinabo nga Mamao.” Sa ato pa, mahimo niya ang lainlaing papel aron matuman ang iyang katuyoan. Hunahunaa kana niining paagiha: Aron maatiman ang iyang pamilya, ang usa ka amahan mahimong tigpangitag pangabuhian, magtatambag, maghuhukom, tighusay, tigpanalipod, ug magtutudlo, depende sa panginahanglan ug kahimtang sa pamilya. Sa samang paagi, ang ngalang Jehova nagpasalig  kanato nga ang Diyos makahimo gayod sa pagtuman sa iyang kabubut-on aron sa pagpanalangin sa tanan nga nag-alagad kaniya, bisan unsa pay mahitabo.

Tagdon nato ang lainlaing papel nga gihimo sa atong mahigugmaong Diyos nga nahiuyon sa kahulogan sa iyang ngalan. Kini motabang kanimo sa pagsabot kon unsang matanga sa Diyos si Jehova, ug sa pagkahibalo kon unsay imong buhaton aron masuod kaniya.

“Diyos sa Gugma ug sa Kalinaw”

Gitawag ni apostol Pablo ang atong Magbubuhat nga “Diyos sa gugma ug sa kalinaw.” (2 Corinto 13:11) Ngano? Una pa niana, si Jesu-Kristo miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Tungod sa iyang dakong gugma sa katawhan, gihatag sa Diyos ang iyang pinalanggang Anak ingong lukat, aron kadtong magpasundayag ug pagtuo kaniya makabaton ug kinabuhing dayon, nga walay kasakit ug pag-antos gumikan sa sala. Mao nay hinungdan kon nganong si Pablo miingon: “Ang suhol nga ginabayad sa sala mao ang kamatayon, apan ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.” (Roma 6:23) Dili ba kana angayng magtukmod kanato sa paghigugma sa Diyos ug sa pagpakigsuod kaniya?

Gipadayag sa Diyos ang iyang gugma dili lamang ngadto sa katawhan sa katibuk-an kondili sa matag usa usab sa iyang matinumanong mga alagad. Sa mga Israelitas, nga subsob nagmasinupakon, si Moises miingon: “Magpadayon ba kamo sa pagbuhat niini ngadto kang Jehova, Oh katawhan nga hungog ug dili maalamon? Dili ba siya man ang imong Amahan nga nagpatungha kanimo, siya nga nagbuhat kanimo ug naghatag kanimo ug kalig-on?” (Deuteronomio 32:6) Imo bang nasabtan kon unsay gipasabot nianang mga pulonga? Ingong mahigugmaong Amahan, si Jehova nahingawa sa iyang katawhan, bisan pa sa ilang mga kahuyangan. Ug siya nagtagana sa tanan nilang panginahanglan​—sa materyal, emosyonal, ug sa espirituwal.

Kulob hayang ang atong kinabuhi nga tungod niana kita mobati usahay ug grabeng kaguol. Busa, kinahanglang dunay motabang kanato aron kita makapamensar pag-ayo ug dili malumsan sa kaguol. Kinsa may makatabang kanato? Pinaagi sa iyang Pulong, ang Bibliya, si Jehova nagtaganag mahigugmaong tambag ug nag-atiman kanato. Kanang Sagradong Basahon nagpatin-aw kon nganong kita nag-antos pag-ayo ug kon sa unsang paagi atong masagubang kana. Sa dihang ang usa ka bata madagma ug mapangos, ang usa ka mahigugmaong amahan andam nga motabang kaniya. Ingon usab niana si Jehova. Sa iyang dakong gugma siya moyuko, ingnon ta, aron sa pagtabang kanato. Sa pagkatinuod, dili mubo ang kamot ni Jehova alang niadtong nagpakitag pagtuo kaniya.​—Isaias 59:1.

Pinaagi sa pagkahimong “Tigpatalinghog sa pag-ampo,” gipakita usab sa Diyos nga siya nahigugma kanato. (Salmo 65:2) Nganong makaingon man kita niana? Si apostol Pablo nagpatin-aw: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Pinaagi sa kinasingkasing nga pag-ampo ug pagsunod sa giya nga gitagana sa Diyos diha sa iyang Pulong, imong masinati usab “ang kalinaw sa Diyos nga labaw sa tanang panghunahuna.”

“Usa ka Diyos sa Kahibalo”

Si Jehova nga Diyos gihubit diha sa Bibliya ingong “hingpit sa kahibalo.” Kay siya “Diyos sa kahibalo,” siya nakasabot kanato ug nahibalo sa atong mga panginahanglan labaw kay ni bisan kinsa. (Job 36:4; 1 Samuel 2:3) Iyang gipahibalo  pinaagi sa iyang alagad nga si Moises nga “dili sa tinapay lamang mabuhi ang tawo kondili sa matag pulong gikan sa baba ni Jehova nga ang tawo mabuhi.” (Deuteronomio 8:3; Mateo 4:4) Nagpasabot kini nga aron magmalipayon, kita nagkinahanglan ug labaw pa kay sa materyal nga mga butang.

Ang atong Maglalalang nagtagana kanato ug bililhong giya ug tambag pinaagi sa iyang Pulong, ang Bibliya. Sa dihang atong tun-an ang Bibliya ug ipadapat ang iyang tambag, kita makabatog kaayohan “sa matag pulong gikan sa baba ni Jehova.” Pananglitan, si Zuzanna, nga usa ka Kristohanong babaye, miingon bahin sa iyang kaminyoon: “Ang among kaminyoon napalig-on pinaagi sa among pagbasa sa Bibliya nga magkauban, pagtambong sa Kristohanong mga tigom nga magkauban, ug pagpakigsulti sa uban bahin sa Bibliya. Tungod sa giya sa Diyos, kami parehas ug tumong ug mas suod sa usag usa.”

Sa unsang paagi ka makabenepisyo gikan sa tambag ug instruksiyon nga gitagana sa Diyos? Pinaagi sa regular nga pagtuon sa Bibliya ug pagpadapat sa tambag niana, ikaw makadawat ug espirituwal nga mga panalangin gikan kaniya.​—Hebreohanon 12:9.

“Diyos sa Kaluwasan”

Gubot kaayo ang kalibotan karon. Wala kita masayod kon unsay mahitabo ugma. Kon ikaw nagpuyo sa usa ka dapit nga nagusbat tungod sa gubat, tingali mangandoy kag kalinaw. Diha sa daghang dapit sa kalibotan, ang mga tawo nagkinabuhi sa kahadlok tungod sa krimen ug kapintasan, paghuyang sa ekonomiya, ug sa terorismo. Kinsa may makaluwas kanato gikan niining tanan? Mas gikinahanglan gayod sa tawo karon ang panalipod ug kaluwasan.

“Ang ngalan ni Jehova usa ka malig-ong torre. Nganha niana ang matarong modagan ug mahatagan sa panalipod,” nag-ingon ang Bibliya. (Proverbio 18:10) Ang pagkaila sa ngalan sa Diyos ug pagsalig niana magtukmod kanato sa pagpamalandong kon unsa nay iyang nahimo ug iya pang pagahimoon aron sa pagluwas niadtong nagpakitag pagtuo kaniya. Gipamatud-an gayod ni Jehova nga Diyos nga makahimo siya sa pagluwas sa iyang katawhan. Pananglitan, iyang giluwas ang Israel pinaagi sa paglaglag sa mga karo ug kasundalohan ni Paraon. Si Jehova napamatud-an nga Diyos sa pagkamatinumanon, ang Diyos nga nahinumdom sa mga sinakit ug nagtinguha sa pagluwas kanila.​—Exodo 15:1-4.

Ang atong walay-kataposang kaugmaon nagdepende sa atong pagpakitag pagtuo kang Jehova nga Diyos ingong Manluluwas. Si Haring David sa karaang Israel, kinsa nakasagubang ug daghang kalisdanan, nagpakita nianang matanga sa pagtuo sa dihang siya misulat bahin kang Jehova: “Ikaw mao ang akong Diyos sa kaluwasan.” (Salmo 25:5) Si apostol Pedro masaligong miingon: “Si Jehova mahibalo kon unsaon pagluwas sa katawhan nga may diyosnong pagkamahinalaron gikan sa pagsulay.”​—2 Pedro 2:9.

Mahitungod sa tawo nga nangayog tabang kaniya, ang Diyos nagsaad: “Panalipdan ko siya tungod kay nakaila siya sa akong ngalan.” (Salmo 91:14) Ang mga alagad sa Diyos karon nakasinati sa katumanan niana nga saad. Si Henryk nga taga-Polandia matinumanong nag-alagad kang Jehova sulod sa 70 ka tuig, bisan pa sa mga kalisdanan ug paglutos. Sa 16 anyos pa lang siya, ang iyang amahan gibalhog sa kampo konsentrasyon sa Auschwitz. Si  Henryk ug ang iyang magulang nga lalaki gibilanggo diha sa usa ka koreksiyonal sa Nazi nga alang sa mga batan-on. Human niana, gibalhinbalhin siya sa lainlaing kampo konsentrasyon. Mahitungod sa mga panghitabo niadtong panahona, si Henryk nahinumdom: “Sa tanan nakong kalisdanan, wala gyod ko pasagdi ni Jehova. Kanunay niya akong gitabangan nga magpabiling matinumanon, bisan tuod ug makadaghan na akong nag-ungaw sa kamatayon.” Oo, si Jehova nagpalig-on sa pagtuo sa iyang mga alagad ug naghatag kanilag kusog aron makalahutay.

Sa dili madugay luwason sa Diyos ang tanan nga nagpakitag pagtuo kaniya ug nagsalig nga iyang luwason sila. Siya miingon: “Ako mao si Jehova, ug gawas kanako wala nay manluluwas.” (Isaias 43:11) Sa “gubat sa dakong adlaw sa Diyos nga Labing Gamhanan,” iyang wagtangon ang mga daotan gikan sa yuta ug luwason ang mga matarong. (Pinadayag 16:14, 16; Proverbio 2:21, 22) Si Jehova nagpasalig kanato: “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”​—Salmo 37:11.

Pagkahimong “mga Anak sa Diyos”

Sa mga adlaw ni manalagnang Malaquias, ang mga Israelitas nangangkon nga si Jehova mao ang ilang Amahan. Apan, kon bahin sa pagpasidungog ug pagpakitag debosyon kaniya, sila naghalad ug hugaw nga mga tinapay ug mga mananap nga buta ug piang. Mao nga gisukna sila ni Jehova: “Kon ako usa ka amahan, hain man ang pasidungog kanako?”​—Malaquias 1:6.

Ayawg sundoga ang dili-matinumanong mga Israelitas. Hinunoa, amo kang gidasig sa pagkat-on bahin kang Jehova nga Diyos ug sa pagpakigsuod o pagduol kaniya. “Duol sa Diyos,” nag-awhag ang tinun-an nga si Santiago, ‘ug siya moduol kanimo.’​—Santiago 4:8.

Ang pag-isip kang Jehova ingong atong Amahan naglangkit ug pipila ka responsibilidad. Kon maningkamot ka sa pagpasidungog sa Diyos pinaagi sa maunongong pagsunod sa iyang mga sukdanan diha sa matag bahin sa imong kinabuhi, dili gayod niya kalimtan ang imong mga paningkamot. Sa kasukwahi, siya motabang kanimo sa pagsubay sa dalan nga motultol sa gisaad nga bag-ong kalibotan, diin ang “ang kamatayon mawala na, ni may pagbangotan ni pagtiyabaw ni may kasakit pa.” (Pinadayag 21:4) Nianang panahona, ang tanang masinugtanong katawhan “ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”​—Roma 8:21.

[Blurb sa panid 5]

Gusto sa Diyos nga atong mailhan ang iyang ngalan nga Jehova, nga sa literal nagkahulogang “Iyang Gipahinabo nga Mamao”

[Blurb sa panid 6]

“Sa tanan nakong kalisdanan, wala gyod ko pasagdi ni Jehova.”—HENRYK

[Blurb sa panid 7]

“Ang among kaminyoon napalig-on pinaagi sa among pagbasa sa Bibliya nga magkauban, pagtambong sa Kristohanong mga tigom nga magkauban, ug pagpakigsulti sa uban bahin sa Bibliya.”—ZUZANNA