LONG Jun 1970, mi slip long wan hospital long Pennsylvania, Yunaeted Stet. Long taem ya mi gat 20 yia, mo mi joen long wok blong ami, be afta mi kasem wan bigfala sik. Wan dresa i stap jekem blad presa blong mi evri haf aoa. Dresa ya i wari taem hem i stap luk se blad presa blong mi i stap godaon. Mi girap mi askem long hem se: “?Yu yu luk wan man i ded finis?” Hem i lukluk mi mo fes blong hem i kam nogud, mo hem i ansa se: “Nogat, mi neva luk.” Mi ting se bambae mi ded, be nogat mi laef yet. I gud we mi talem sam laef stori blong mi, long yufala.

Long Julae 1969 mi kasem Vietnam. Oli givim wan wik long mi blong mi lan long taem mo weta blong kantri ya, sem mak olsem ol narafala soldia. Mi stat blong sik, taem mi wok long ples blong katem man long taem blong faet. Mi mi glad blong givhan long olgeta we oli sik mo olgeta we oli karekil. Mo mi wantem kam wan dokta blong katem man.

Oli sanem mi blong wok long wan hospital blong ol soldia long Mekong Delta. Long ples ya, i gat plante helikopta we oli stap karem ol soldia we oli karekil i kam long hospital ya. Mi mi laekem kantri blong mi mo mi laekem blong wok, taswe mi wantem givhan long ol man blong kantri blong mi kwiktaem. Oli sanem ol soldia we oli karekil i go kwiktaem long ol kontena we i gat ekondisen insaed long hem, mo hemia nao ples blong katem man. Long rum ya i gat wan dokta blong katem man, wan dokta blong stikim man i slip, mo i gat tu nes. Olgeta ya oli mekem bes blong olgeta blong sevem laef blong ol soldia ya. Long ol helikopta ya i gat sam bigfala bag we oli no karemaot. Oli talem long mi se insaed long ol bag ya, i gat ol hafhaf bodi blong ol soldia we oli ded taem bom i faerap. Hemia nao faswan stori blong mi, taem mi go long faet.

Faswan taem we mi harem trutok long ol Witnes blong Jehova, hemia taem mi yangfala. Mama blong mi hem i stadi Baebol wetem ol Witnes, be hem i neva baptaes. Nating se i olsem, mi mi laekem blong joen long ol stadi ya. Wan dei, mi mo step papa blong mi, mitufala i pas long rod mo mi luk wan Haos Kingdom. Afta mi askem long hem se: “?Wanem ya?” Hem i talem long mi se: “!Yu no mas go klosap long ol man ya!” Mi mi lavem hem mo mi trastem hem, taswe  mi obei long hem, mo mi no moa joen wetem ol Witnes blong Jehova.

Mi stap tingbaot plante nogud samting we oli hapen, taem mi kambak long Vietnam. From samting ya, mi no moa save soemaot ol filing blong mi. I luk olsem se, i no gat man i kasemsave long ol samting we oli stap hapen long Vietnam. Mi tingbaot samting we ol man oli talem, taem oli stap maj long rod. Oli singaot ol soldia blong Amerika se, ol soldia blong kilim pikinini, from we oli harem wan ripot se ol soldia oli stap kilim ol pikinini we oli no gat fol. Ol samting we oli hapen, oli mekem mi harem se mi nidim blong fren gud wetem God.

Mi stat blong go long ol defdefren jos, blong lukaot God. Mi mi lavem God, be mi no glad long ol samting we mi luk long ol jos ya. Wan dei, mi go long wan Haos Kingdom long Delray Beach, Florida. Faswan taem we mi go long miting, hem i long Sande, Februari 1971.

Taem mi go insaed long Haos Kingdom, pablik tok i finis, mo mi stap long Wajtaoa Stadi. Mi no tingbaot samting we Wajtaoa i tokbaot, be mi tingbaot se mi luk ol pikinini oli stap lukaotem ol vas, long Baebol blong olgeta. !Samting ya i mekem mi glad tumas! !Mi stap lesin mo mi lukluk nomo! Taem miting i finis, wan brata we i gat samwe 80 yia i kam luk mi. Nem blong hem Jim Gardner. Hem i givim buk ya Trutok Blong Soemaot Rod Blong Itenel Laef mo i askem se: “?Yu yu glad blong tekem buk ya? Mi ansa se yes, mo mitufala i mekem plan blong stadi long Tasde moning, mo hemia faswan taem we mi stadi Baebol.

Long Sande afta long miting mi mas wok. Mi wok long wan hospital long Boca Raton, Florida, mo mi stat wok long 11 klok long naet kasem 7 klok long moning. I no gat plante sikman long naet ya, ale mi stat blong ridim Trutok buk ya. Wan nes i karemaot buk ya long mi, i lukluk kava blong hem, mo i askem long mi sipos bambae mi kam wan Witnes blong Jehova. Mi karemaot buk long hem mo mi talem long hem se bambae mi kam wan Witnes blong Jehova, nating se mi ridim haf blong buk ya nomo. Hem i gowe long mi, mo mi stap ridim buk ya gogo mi finisim buk ya long naet ya nomo.

Taem mi mo Brata Jim i rere blong stadi, mi askem long hem se: “?Bambae yumitu stadi long wanem?” Hem ansa se: “Long buk ya we mi givim long yu.” Mi talem long hem se:“Mi ridim finis.” Long kaen fasin Brata Jim, i talem se: “Ale, i gud yumitu luk fas japta.” Mi mi sek long ol save we mi lanem. Hem i talem long mi blong jekem plante vas long Baebol blong mi, we hem i King James Version. Mi mi lanem ol save long saed blong tru God, Jehova. Mi mo Brata Jim, mitufala i stadi long tri japta long moning ya. Afta long taem ya, mitufala i stadi tri japta evri Tasde moning. Mi mi laekem tumas ol stadi we mitufala i mekem. !Mi mi glad tumas blong stadi wetem wan brata we tabu spirit i makemaot hem mo hem i save Charles T. Russell!

Mi mi stadi blong sam wik nomo, biaen mi go prij. I had blong mi prij long ol haos wanwan, be Brata  Jim i givhan long mi blong winim fasin fraet we mi gat. (Ol Wok 20:20) Hem i givhan bigwan long mi blong laekem wok ya. Mi harem se hemia wan blesing we mi kasem, blong mekem wok blong prij. !Mi glad tumas blong stap olsem wan man blong wok blong God!—1 Korin 3:9.

Naoia bambae mi tokbaot wan samting we i sas tumas long mi, hemia faswan taem we mi lavem Jehova. (Revelesen 2:4) Lav we mi gat long Jehova i givhan long mi blong mi stanap strong mo mi fogetem ol rabis memori blong faet mo plante narafala problem.—Aesea 65:17.

Long 1971, mi aot long haos we papa mo mama blong mi tufala i letem mi blong stap long hem. ?From wanem? !From we step papa blong mi i no wantem se wan Witnes blong Jehova i stap long ples ya! Long taem ya mi nogat plante mane. Hospital i pem mi evri tu wik mo mi yusum mane ya, blong pem ol klos blong mi blong prij. From we mi wantem jenis gud blong mekem wok blong Jehova. Mi gat sam mane we mi sevem long bang, be i stap long Michigan, we i wan narafala taon we mi gruap long hem. Taswe mi slip insaed long trak blong mi blong sam dei. Mi swim mo mi sevem mustas blong mi, long ol smol rum olsem toelet, we oli stap long ples blong fulumap bensin.

Wan dei, mi go long Haos Kingdom sam aoa bifo we miting blong prij i stat. Mi sidaon biaen long ples we ol narafala oli no save luk mi, ale mi tingbaot bakegen ol samting we oli hapen long Vietnam. Mi luk blad, mo mi smelem bodi blong man we i bon long faea mo biaen mi stat blong wari. I olsem se mi save harem mo luk wan yangfala man i stap singaot mo i askem se: “?Bambae mi gohed blong laef? ?Bambae mi mi laef no nogat?” Mi mi save se  bambae hem i ded, be mi traem blong mekem hem i harem gud nomo mo mi mekem olsem se evri samting bambae i oraet. Mi sidaon,mo mi stap krae.

Mi krae mo mi prea long Jehova. (Ol Sam 56:8) Mi stat blong gat strong tingting long laef bakegen. Mo long ples ya nao, mi luksave se promes ya i nambawan tumas. Jehova bambae i mekem ol yangfala man ya oli laef bakegen mo bambae oli gat janis blong lanem trutok. Laef bakegen bambae i finisim ol fasin we oli mekem man i harem nogud, mo ol samting we oli mekem yumi safa. (Ol Wok 24:15) Taem mi kasem save samting ya, lav we mi gat long Jehova i kam strong moa. Dei ya i wan spesel dei blong mi. Stat long taem ya, taem mi kasem eni trabol long laef, be oltaem mi traehad blong tingbaot faswan taem we mi lavem Jehova.

Ol man oli mekem plante nogud samting long taem blong faet, mo mi tu mekem sem samting. Be i gat tu vas long Baebol we oli mekem mi harem gud, taem mi tingbaot tufala. Faswan, hemia Revelesen 12:10, 11, we i talem se yumi winim Setan long paoa blong trutok, mo long paoa blong blad blong Jisas. Nambatu, hemia Galesia 2:20, we i mekem mi tingbaot bakegen se Jisas i ded blong sevem mi. Mi talem tangkiu from sakrefaes blong Jisas Kraes we i mekem se Jehova i save fogivim mi, from ol samting we mi mekem. Taswe naoia tingting blong mi i klin mo mi gat strong tingting blong tokbaot Jehova we i God blong sore.—Hibrus 9:14.

Taem mi tingtingbak long ol samting we oli hapen long laef blong mi, mi luksave klia we oltaem Jehova i stap lukaotgud long mi. Eksampol, taem we Brata Jim i faenemaot se mi stap slip long trak blong mi, long sem dei ya nomo hem i talem long wan sista we i gat rent haos, blong mi save rentem wan rum long haos blong hem. Mi sua fulwan se Jehova i yusum Brata Jim mo sista ya, blong tufala i lukaotgud long mi. !Jehova i kaen tumas! Hem i lukaotgud long ol man we oli wosipim hem.

Long Mei 1971 mi mas go long Michigan. Bifo we mi aot long Florida, mi karem plante buk mo magasin long trak blong mi, mo mi ron i go long not. Mi givimaot olgeta buk mo magasin bifo we mi go long Georgia. Mi gat strong tingting blong prij long olgeta ples we mi go long hem. Mi prij long ol man we oli stap long kalabus, mo tu mi givim ol traket long ol man we oli go long ol smol rum olsem toelet, long ples blong spel. Mi no save, sipos wan long ol man we mi prij long hem i i bin kam long trutok.—1 Korin 3:6, 7.

Fastaem we mi lanem trutok, blong talem stret, mi no save toktok long fasin we i waes taem mi toktok wetem ol famle blong mi. Samtaem, mi tok stret long olgeta. Mi lavem tufala brata blong mi tumas, John mo Ron mo taem mi prij long tufala, mi traem fosem tufala blong tufala tu i folem niufala bilif blong mi. Biaen mi mas talem sore long tufala from fasin we mi mekem. Be mi gohed blong prea, se wan dei bambae tufala i kam long trutok. Stat long taem ya, Jehova i givhan long mi blong toktok long waes fasin, taem mi prij mo taem mi tijim ol narafala long Baebol.—Kolosi 4:6.

Fasin blong mi blong fren gud wetem Jehova, i stap fasples blong laef blong mi. Nating se i olsem, i gat sam narafala tu, we mi lavem olgeta tumas, olsem, woman blong mi Susan. Mi wantem mared long wan woman we bambae i givhan long mi blong gohed blong mekem wok blong Jehova. Susan i wan woman we i lavem Jehova tumas. Taem mitufala i stap fren yet, mi go luk hem long haos blong papa mo mama blong hem long Rhode Island. Mi luk hem i stap sidaon long vranda, i stap ridim Wajtaoa mo i jekem olgeta vas blong Baebol we oli stap long Wajtaoa ya. Samting ya i mekem mi mi sek, from we haf blong  Wajtaoa we hem i stap ridim, i no blong stadi long hem long taem blong miting. Mi glad tumas, taem mi luk samting ya. Mi luksave se hem i tinghae long fasin blong hem blong fren gud wetem Jehova. Long Disemba 1971, mitufala i mared. Mi glad tumas blong maredem wan woman we i sapotem gud mi. Hem i lavem mi, be hem i lavem Jehova moa. Samting ya i mekem mi glad tumas.

Jehova i givim tu naesfala boe long mitufala, hemia Jesse mo Paul. Jehova i lidim tufala taem tufala i gruap. (1 Samuel 3:19) Tufala tugeta i fren gud wetem hem, mo samting ya i mekem mifala i glad tumas. Tufala i mekem wok blong Jehova fultaem, blong bitim 20 yia finis. Mo tufala i stap gohed yet blong mekem wok blong hem, from we tufala tu i tingbaot fas taem we tufala i lavem Jehova. Mi glad tu long tufala naesfala woman blong tufala boe blong mi, hemia Stephanie mo Racquel. Mi tingbaot tufala olsem ol stret gel blong mi. Mi glad se tufala boe blong mi, tufala i maredem ol woman we oli lavem Jehova wetem fulhat blong olgeta, mo oli laekem blong mekem wok blong Jehova long laef blong olgeta.—Efesas 6:6.

Mi mi prij blong 16 yia long Rhode Island, mo long ples ya mi gat plante fren. Mi tingbaot gud ol elda we mi wok wetem olgeta. Mi talem bigfala tangkiu long ol eria elda we oli givhan bigwan long mi. I wan nambawan blesing blong mekem wok blong Jehova wetem ol man we oli lavem Jehova fastaem. Long 1987,  mifala i muv i go long wan ples we i gat bigfala nid long hem, hemia long North Carolina. Mo long ples ya tu, mifala i gat plante gudfala fren. *

Long Ogis 2002, mi mo Susan i kasem wan leta blong mitufala i go wok long Betel blong Yunaeted Stet, long Patterson. Mi wok long Seves Dipatmen, mo Susan i wok long ples blong wasem klos. Wan wok we hem i laekem blong mekem. Long Ogis 2005, mi glad blong kasem blesing ya blong kam wan memba blong Hed Kampani. Mi mi harem se mi no naf blong mekem niufala wok ya. Susan i sek long ol wok we oli joen wetem niufala wok ya, mo blong go long ol defdefren ples. Hem i no laekem blong go long narafala ples, long plen.Nating se i olsem, plante taem mitufala i go long ol narafala ples long plen. Ol woman blong ol brata we oli memba blong Hed Kampani, oli givim ol gudfala advaes long hem. Hemia i mekem se hem i gat strong tingting blong givhan long mi. !Mo mi lavem hem tumas from samting ya!

Long ofis blong mi, i gat ol naesfala foto, we oli mekem mi tingbaot bakegen ol nambawan taem we mi harem gud long hem long laef blong mi. !Mi kasem plante blesing, taem mi traehad blong tingbaot faswan taem we mi lavem Jehova!