Go long ol haf insaed long hem

Go long lis blong ol haf

Hemia Ples Blong Wosip Blong Yumi

Hemia Ples Blong Wosip Blong Yumi

“Mi mi wantem tumas we evri samting long haos blong yu oli mas stret gud. Oltaem tingting ya i stap wok insaed long mi, olsem faea we i stap laet.”JON 2:17.

SINGSING: 127, 118

1, 2. (1) ?Ol man blong Jehova bifo oli mekem wosip long weples? (2) ?Jisas i gat wanem filing long tempol blong Jehova long Jerusalem? (3) ?Long stadi ya, bambae yumi tokbaot wanem?

OL MAN blong God long taem bifo mo tede tu, oli gat ol ples we oli go long hem blong wosipim God. Eksampol, maet Ebel i wokem wan olta blong mekem wosip long Jehova. (Jenesis 4:3, 4) Mo tu, Noa, Ebraham, Aesak, Jekob, mo Moses, olgeta tu oli wokem ol olta blong mekem wosip. (Jenesis 8:20; 12:7; 26:25; 35:1; Eksodas 17:15) Jehova i talem long ol man Isrel blong oli wokem wan haos tapolen blong hem. (Eksodas 25:8) Biaen, hem i talem long olgeta blong oli wokem wan tempol. (1 King 8:27, 29) Taem ol man Isrel oli fri long Babilon, oltaem oli stap go long ol haos prea blong mekem wosip long Jehova. (Mak 6:2; Jon 18:20; Ol Wok 15:21) Ol fas Kristin, oli mekem miting long haos blong olgeta. (Ol Wok 12:12; 1 Korin 16:19) Tede, ol man blong Jehova oli mekem miting long plante taosen Haos Kingdom. Long ples ya, oli lanem ol fasin blong Jehova mo oli mekem wosip long hem.

2 Jisas i gat bigfala respek long haos tempol blong Jehova we i stap long Jerusalem. Lav we Jisas i gat from haos blong God, i mekem ol disaepol oli tingbaot bakegen, tok we man blong raetem Sam i talem, i se: “Mi mi wantem tumas se evri samting long haos blong yu oli mas stret gud. Oltaem tingting ya i stap wok insaed long mi, olsem faea  we i stap laet.” (Ol Sam 69:9; Jon 2:17) I no gat wan Haos Kingdom we i sem mak long “haos blong Jehova” long tempol blong Jerusalem bifo. (2 Kronikel 5:13; 33:4) Nating se i olsem, yumi mas gat bigfala respek long ol ples we yumi mekem wosip long hem. Long stadi ya, bambae yumi tokbaot ol rul blong Baebol we oli save tijim yumi long ol fasin we yumi mas gat, taem yumi stap long Haos Kingdom. Mo tu bambae yumi lanem olsem wanem blong lukaotgud long Haos Kingdom blong yumi, mo olsem wanem blong givhan blong pem ol samting blong Haos Kingdom. *

YUMI RESPEKTEM OL MITING BLONG YUMI

3-5. ?Wanem ya wan Haos Kingdom? ?Yumi mas tingbaot ol miting blong yumi olsem wanem?

3 Wan Haos Kingdom hem i stamba ples we ol man oli kam long hem blong wosipim Jehova. Ol miting oli olsem wan presen we Jehova i givim long yumi, blong givhan long yumi blong fren gud moa wetem hem. Long ol miting, ogenaesesen blong hem i leftemap tingting blong yumi, mo i tokbaot ol rod we yumi nidim blong folem long laef blong yumi. Hem i wan blesing we evri wik, Jehova mo Pikinini blong hem tufala i singaot yumi blong “kakae long tebol blong Masta blong yumi.” (1 Korin 10:21) Taswe, yumi no mas fogetem nambawan blesing ya.

4 Jehova i talemaot klia se, hem i wantem we yumi mas stap long olgeta miting blong wosipim hem mo blong lefleftemap tingting blong yumi. (Ridim Hibrus 10:24, 25.) Yumi gat respek long Jehova, taswe yumi no wantem se eni samting i blokem yumi blong yumi no go long miting. Taem yumi rerem gud ol miting blong yumi mo yumi ansa long taem blong miting, hemia i soemaot se yumi glad long miting blong yumi.—Ol Sam 22:22.

5 Fasin blong yumi long taem blong miting, mo olsem wanem yumi lukaotgud long Haos Kingdom, i soemaot sipos yumi respektem Jehova no nogat. Yumi wantem se fasin blong yumi i leftemap nem blong Jehova, olsem we i stap long saen blong Haos Kingdom.—Skelem wetem 1 King 8:17.

6. ?Ol man oli talem wanem from ol Haos Kingdom blong yumi mo olgeta we oli stap long miting? (Yu luk pija long stat blong stadi.)

6 Sipos yumi soem respek long Haos Kingdom blong yumi, bambae ol narafala oli luksave we yumi tinghae long ples blong wosip. Yu traem tingbaot. Wan man long kantri blong Teki i talem se: “Taem mi kam long Haos Kingdom, mi luk we ples i klingud mo ol samting oli stap long oda, samting ya i mekem mi glad tumas. Ol man, ol woman, mo ol pikinini oli werem ol klos we i stret mo i klin, oli smael long man, mo oli welkamem gud mi. Samting ya i tajem hat blong mi.” Man ya i stat blong kam long olgeta miting, mo biaen hem i baptaes. Long wan bigfala taon long Indonesia, ol brata oli askem ol man we oli stap raonabaot long olgeta, mo mea blong taon ya, mo sam narafala man bakegen, blong ol kam luk niufala Haos Kingdom we oli jes wokem. Mea blong taon ya i glad tumas, taem hem i luk naesfala haos ya, wetem plan blong hem mo ol naesfala flaoa we oli planem afsaed. Hem i talem se: “Haos ya i klingud mo i soemaot se bilif blong yufala i tru.”

Ol fasin blong yumi oli save soemaot we yumi no respektem God (Yu luk haf 7 mo 8)

7, 8. ?Olsem wanem yumi soemaot se yumi respektem Jehova taem yumi stap long Haos Kingdom?

7 Jehova nao i singaot yumi blong kam long ol miting. Long ples ya, hem i wantem se klos mo hea blong yumi oli mas klin mo stret, mo tu hem i wantem se yumi mas gat ol gudfala fasin. Be, yumi no mas bitim mak long ol samting ya. Mo tu, i no gat ol strong rul we oli talem wanem fasin yumi mas folem long taem blong miting, be hemia i no min se taem yumi kam long miting, yumi mekem olsem se yumi stap spel nomo. I tru, Jehova i wantem se yumi mo ol man we yumi singaot olgeta blong kam long Haos Kingdom, yumi evriwan i harem gud. Be yumi no mas mekem eni fasin we  i no soem respek long taem blong miting. Hemia nao risen from wanem yumi no mas werem ol klos we i olbaot, no i save pulum ae. Mo tu, yumi no mas teks long mobaelfon, toktok, mo yumi no kakae mo dring long taem blong ol miting. Mo ol papa mo mama, oli mas tijim ol pikinini blong olgeta blong oli no resis olbaot, mo oli no mas pleplei long Haos Kingdom.—Prija 3:1.

8 Taem Jisas i luk ol man oli stap mekem maket long haos tempol blong God, hem i kros long olgeta mo i ronemaot olgeta. (Jon 2:13-17) Yumi kam long Haos Kingdom, blong wosipim Jehova mo blong lanem ol fasin blong hem. Taswe, i no stret blong tokbaot ol prapa bisnes blong yumi, taem yumi stap long Haos Kingdom.—Skelem wetem Nehemaea 13:7, 8.

YUMI GIVHAN BLONG BILDIM OL HAOS KINGDOM

9, 10. (1) ?Ol man blong Jehova oli bildim ol Haos Kingdom olsem wanem? ?Wanem gudfala frut we i kamaot? (2) ?Olsem wanem ogenaesesen blong Jehova i givhan long ol kongregesen we oli no naf blong bildim Haos Kingdom blong olgeta?

9 Ol man blong Jehova long fulwol, oli wok had blong bildim ol Haos Kingdom. I gat ol brata mo sista we oli wok fri nomo olsem ol volontia, blong droem plan, bildim, mo riperem ol Haos Kingdom. From samting ya long ol 15 yia we oli pas, yumi bildim bitim 28,000 naesfala Haos Kingdom long fulwol. Hemia i olsem se evri dei, yumi stap bildim 5 Haos Kingdom.

10 Ogenaesesen blong Jehova i sanem ol volontia blong oli bildim ol Haos Kingdom long ples we i gat nid long hem. Mo oli yusum ol presen mane blong mekem wok ya. Yumi folem advaes blong Baebol we i talem se, olgeta we oli gat plante samting, oli save givhan long ol narafala we oli sot long sam samting. (Ridim 2 Korin 8:13-15.) Gudfala frut we i kamaot hemia se, yumi bildim plante Haos Kingdom blong ol kongregesen we oli no naf blong pem ol samting we oli nidim.

11. ?Ol brata oli talem wanem from niufala Haos Kingdom blong olgeta? ?Yu yu harem olsem wanem taem yu harem ol gudfala toktok olsem?

11 Ol brata blong wan kongregesen long Kosta Rika, oli talem se: “!Taem mifala i stanap long fored blong Haos Kingdom blong mifala, i olsem se mifala i stap drim nomo! !Mifala i no bilivim se naesfala Haos Kingdom ya, i finis long 8 dei nomo! Ol blesing we Jehova i stap givim mo ol plan we ogenaesesen blong hem i mekem, mo ol brata blong yumi, oli mekem se mifala i save gat naesfala Haos Kingdom ya. Hemia wan sas presen we Jehova i givim long mifala, blong mekem wosip long hem. Mifala i glad tumas long nambawan presen ya.” Yumi glad tumas taem yumi harem ol gudfala toktok we ol brata mo sista oli talem, from samting we Jehova i mekem long olgeta. Mo yumi glad se ol brata mo sista long fulwol oli save gat wan prapa Haos Kingdom blong olgeta. I klia nomo se Jehova i stap blesem wok blong bildim ol Haos Kingdom, from we taem wan Haos Kingdom i finis, i gat plante man oli stat blong kam long miting blong save Jehova.—Ol Sam 127:1.

12. ?Olsem wanem yu save givhan blong bildim ol Haos Kingdom?

 12 ?Olsem wanem yu save givhan blong bildim ol Haos Kingdom? Maet yu save wok olsem volontia. Mo tu, yumi evriwan i save givhan blong givim presen mane blong pem ol samting we oli yusum blong bildim ol Haos Kingdom. Bambae yumi glad bigwan taem yumi givim samting long gladhat blong yumi. Be samting we i moa impoten hemia se, yumi stap presem Jehova. Yumi mekem olsem ol man blong God bifo, we oli glad blong givim samting blong bildim ol ples blong wosip blong olgeta.—Eksodas 25:2; 2 Korin 9:7.

YUMI KLINIM HAOS KINGDOM BLONG YUMI

13, 14. ?Wanem advaes blong Baebol we i givhan long yumi blong klinim Haos Kingdom blong yumi, mo putumgud ol samting long stret ples?

13 Yumi mas klinim Haos Kingdom blong yumi, mo putumgud ol samting long stret ples blong olgeta, from we Jehova i wan God we i klin mo i tabu, mo hem i wok folem plan. (Ridim 1 Korin 14:33, 40.) Sipos yumi wantem stap klin mo tabu olsem Jehova, hemia i min se yumi mas klin long wosip, long tingting, long fasin, mo long bodi blong yumi tu.—Revelesen 19:8.

14 Taem Haos Kingdom blong yumi i klin, bambae yumi glad blong singaot ol man oli kam long miting. Mo ol man bambae oli luksave se yumi stap folemgud ol tok we yumi talemaot, long saed blong niufala wol we i klin. Bambae oli luksave se yumi wosipim wan God we i tabu mo i klin, mo bambae hem i mekem wol ya i kam wan naesfala paradaes.—Aesea 6:1-3; Revelesen 11:18.

15, 16. (1) ?From wanem oltaem i no isi blong mekem Haos Kingdom i klin? ?From wanem yumi mas mekem Haos Kingdom i klin? (2) ?Wanem plan we kongregesen blong yufala i mekem blong klinim Haos Kingdom? ?Wanem nambawan janis we yumi evriwan i gat?

15 Ol man oli gat ol defdefren tingting long fasin klin. ?From wanem i olsem? Hem i from ples we maet oli gruap long hem. Mo tu, samfala oli laef long ples we i gat plante das long hem, no rod blong olgeta i toti, mo i gat sofmad. Samfala oli no gat naf wota, no oli no gat ol sop blong klinim ples. Be, nomata weples yumi laef long hem, no ol man oli gat defren tingting long klin fasin, be yumi mas klinim Haos Kingdom blong yumi. From we hemia ples we yumi wosipim Jehova long hem.—Dutronome 23:14.

16 Yumi mas gat wan gudfala plan, blong  mekem se Haos Kingdom blong yumi i klingud. Ol elda oli mekem wan program blong kongregesen i folem blong klinim Haos Kingdom, mo oli mas jekem se i gat ol sop mo ol samting we yumi save yusum blong klinap. Mo tu, ol elda oli tokbaot plan blong klinap, mo oli meksua se oli folem plan ya. I gat sam samting we yumi mas klinim olgeta stret afta long miting, be samfala maet yumi save klinim olgeta long taem blong bigfala klinap. Yumi evriwan i gat nambawan janis ya blong givgivhan long yumi, blong klinim Haos Kingdom blong yumi.

YUMI LUKAOT GUD LONG HAOS KINGDOM BLONG YUMI

17, 18. (1) ?Yumi lanem wanem long fasin blong ol man blong Jehova long taem bifo, blong lukaotgud long haos tempol? (2) ?From wanem yumi mas lukaotgud long ol Haos Kingdom blong yumi?

17 Taem yumi fiksimap eni samting we i nogud long Haos Kingdom blong yumi, hemia i save mekem se Haos Kingdom i stap gud oltaem. Ol man blong Jehova long taem bifo, oli mekem i sem mak. Yu traem tingbaot, taem Joas i kam King blong Juda, ol man oli givim presen mane long haos tempol. Ale king i talem long ol pris blong oli yusum ol mane ya, blong fiksimap eni samting we oli luk se i brok long haos tempol. (2 King 12:4, 5) Mo tu, bitim 200 yia biaen, King Josaea i yusum ol presen mane we ol man oli givim long haos tempol, blong i pem ol samting we oli nidim blong fiksimap haos tempol.—Ridim 2 Kronikel 34:9-11.

18 Long sam kantri, ol Komiti blong Branj Ofis oli luksave se ol man long kantri ya, oli no save olsem wanem blong lukaotgud long ol haos, mo ol tul we oli yusum. Maet from we i gat sam man nomo we oli save olsem wanem blong lukaotgud long ol samting olsem. No maet oli no gat naf mane blong pem ol samting we oli nidim blong fiksimap. Be sipos yumi no fiksimap Haos Kingdom blong yumi long taem we i nidim, bambae sloslo Haos Kingdom i stat blong kam nogud, mo ol man bambae oli luksave samting ya. Hemia i no givim wan gudfala witnes long ol man. Be sipos yumi evriwan i givhan blong lukaotgud long Haos Kingdom blong yumi, hemia i olsem we yumi presem Jehova mo yumi yusumgud ol presen mane we ol brata mo sista blong yumi oli givim.

Yumi mas klinim Haos Kingdom blong yumi, mo lukaotgud long hem (Yu luk haf 16 mo 18)

19. ?Bambae yu mekem wanem blong soem respek long ples we yu wosipim Jehova long hem?

19 Haos Kingdom, hem i wan haos we oli givim finis long Jehova. Taswe, hem i no haos blong wan man, no wan kongregesen. Olsem we yumi tokbaot long stadi ya, ol rul blong Baebol bambae oli givhan long yumi blong gat stret tingting, long ples we yumi wosipim God long hem. Taem yumi soemaot respek long ol miting, mo long Haos Kingdom, hem i olsem se yumi gat respek long Jehova. Yumi glad blong givim mane blong givhan long wok blong bildim ol Haos Kingdom, mo yumi wok had blong lukaotgud long Haos Kingdom blong i stap klin oltaem. Olsem we Jisas i talem, yumi wantem se evri samting long haos blong Jehova oli stret gud, mo yumi respektem ples we yumi mekem wosip long hem.—Jon 2:17.

^ par. 2 Long stadi ya, bambae yumi tokbaot ol Haos Kingdom. Be ol save ya oli stret tu, long ol Haos Asembli mo ol narafala ples we yumi mekem wosip long hem.