?Wanem i Mekem Se Yumi Gat—Wan Risen Blong Laef?

BOE ya Jesse i gat 17 yia blong hem mo i stap go long haeskul. Samfala oli askem long hem blong talem tingting blong hem long kwestin ya: ?From wanem yumi stap laef? Hem i se: “Blong pleplei mo haremgud, gogo kasem we yumi ded.” Gel ya Suzie i gat wan narafala tingting. Hem i se: “Mi ting se risen blong laef hemia blong mekem samting we yumi wanwan i wantem.”

?Yu yu bin tingbaot risen blong laef? ?I gat wan risen blong laef we i stret long evri man blong wol? ?Tok blong Suzie i stret se yumi wanwan i givim wan risen long laef folem samting we yumi wantem? Nomata se save blong ol man i stap kam antap mo oli stap faenemaot plante niufala samting, be wanwan long yumi i gat wan filing insaed long yumi yet se yumi mas gat wan risen blong laef. Samtaem long laef blong yumi bambae yumi mas tingbaot se: ‘?From wanem mi mi laef?’

Ol sayentis oli bin traehad blong ansa long kwestin ya. ?Wanem ansa blong olgeta? Profesa David P. Barash we i stadi long ol anamol mo long tingting blong man tu, i talem se: “I no gat wan bigfala risen blong laef. Laef i no givhan long evolusen * blong man.” Ol sayentis we oli ting se ol laef samting oli kamaot from evolusen, oli talem se i gat wan risen nomo blong laef, hemia blong faet strong blong stap laef, mo blong karem pikinini. Taswe, Profesa Barash i talem tingting blong hem se: “I no gat risen blong bigfala yunivas * ya mo hem i no kea long ol man, taswe yumi nomo i mas mekem se yumi gat wan risen blong laef. Yumi mekem samting ya tru long ol jus we yumi fri blong mekem, mo we yumi tingting gud long olgeta, mo we yumi minim nomo blong mekem.”

Stamba Samting We i Mekem Se Laef i Impoten Mo i Gat Risen

?Hemia nomo risen blong laef, se yumi wanwan i mekem samting we yumi nomo i wantem? Baebol i no talem se yumi stap wokbaot krangke long wol ya we i no gat risen blong hem, nogat. Baebol i soemaot se i gat wan risen blong laef. Yumi no kamaot from wan aksiden we i hapen samples afsaed long wol blong yumi. Baebol i talem se God we i wokem yumi, i tekem plante yia blong rerem wol ya blong ol man. Hem i no letem ol samting oli kamaot olsem nomo. Hem i meksua se evri samting oli “gud we i gud tumas.” (Jenesis 2:1; Aesea 45:18) ?From wanem? From we God i gat wan risen blong mekem man i laef.

Nating se i olsem, God i no makemaot fiuja blong yumi wanwan. Hem i no mekem ol samting i kamaot folem wan plan blong laef blong yumi we hem i gat finis, mo i no mekem sam samting i hapen long bodi blong yumi folem wan plan olsem. I tru se yumi bon wetem sam fasin mo trabol we papa mama blong yumi i pasem i kam long yumi. Be bighaf blong ol fasin blong yumi mo ol samting we yumi mekem, yumi nomo i bos long olgeta. Yumi fri blong jusum wanem rod we yumi wantem folem long laef.

Nating se yumi fri blong jusum rod blong yumi, be i nogud blong gohed folem ol plan blong yumi we yumi no tingbaot God nating. Blong talem stret, plante man oli bin faenemaot se samting we i mekem laef i impoten mo i givim wan risen blong laef, hemia fasin fren blong olgeta wetem God. Samting  we i soem se yumi mas gat God long laef blong yumi blong gat wan risen blong laef, hemia prapa nem blong God, Jeova, we mining blong hem se, “Hem i Mekem i Kamaot.” (Eksodas 6:​3, NW; Ol Sam 83:​18, NW ) Hemia i min se, sloslo God i mekem ol promes blong hem i kamtru, mo oltaem ol samting we hem i tingting blong mekem, bambae i mas kamtru. (Eksodas 3:14, NW; Aesea 55:​10, 11) Traem tingbaot samting ya. Nem ya Jeova i olsem wan promes long yumi evriwan se oltaem, stat bifo olgeta gogo i no save finis, Jeova i stap olsem Stamba blong ol samting we oli mekem laef blong yumi i impoten mo i givim wan risen blong laef.

Sipos yumi bilif se God i stap, hemia nomo i naf blong jenisim tingting blong yumi long saed blong laef. Gel ya Linet we i gat 19 yia blong hem, i se: “Taem mi lukluk ol nambawan samting we Jeova i wokem mo risen blong olgeta, samting ya i soem long mi se hem i gat wan risen blong wokem mi tu.” Gel ya Amber i gohed moa i se: “Taem ol man oli talem se ‘yumi no save sipos i gat wan God no nogat,’ oltaem tok ya i mekem mi mi glad we mi save finis se i gat wan God. Ol samting we Jeova i wokem hemia nomo i naf blong pruvum se hem i stap.” (Rom 1:20) Oraet, maet i no strong tumas blong bilif se God we i wokem yumi hem i stap, be ating i hadwok moa blong frengud wetem hem.

Frengud Wetem God

Bakegen, Baebol i save givhan long yumi. Ol faswan japta blong Baebol oli soemaot klia se Jeova God i Papa blong yumi we i lavem yumi tumas. Wan samting we i soemaot lav blong hem, hemia se, taem hem i wokem Adam mo Iv, hem i no livim tufala we tufala i no gat save long saed blong hem. Oltaem hem i toktok wetem tufala. Taem hem i putum tufala long Iden, hem i no lego tufala blong faenem prapa rod blong tufala, ale hem i bisi long ol narafala wok blong hem. Nogat. Hem i talemaot klia long tufala wanem rod we i beswan blong folem. Hem i givim wok long tufala we tufala i save haremgud long hem, mo hem i gohed blong tijim tufala. (Jenesis 1:​26-30; 2:​7-9) Hemia ol samting we yumi save se wan gudfala papa we i lavem pikinini blong hem bambae i mas mekem. Nao tingbaot olsem wanem samting ya i save gat paoa long laef blong yumi. Gel ya Denielle i talem se: “Mi save se Jeova i wokem wol ya, mo se hem i mekem yumi we yumi naf blong haremgud long ol samting we hem i wokem. Long tingting blong mi, samting ya i pruvum se hem i wantem we yumi hapi.”

Antap long samting ya, Jeova i wantem se olgeta pikinini blong hem oli frengud wetem hem, olsem evri gudfala papa i wantem. Ol Wok 17:27 i mekem wan promes long saed ya se: ‘God i no stap longwe long yumi nating.’ ?Olsem wanem save ya i save gat paoa long laef blong yumi? Amber i talem se: “From we mi save Jeova, mi harem se neva mi stap mi wan nomo. Nomata wanem samting i hapen, oltaem hem i stap mo mi save lukluk i go long hem.” Mo tu, taem yu save Jeova moa, bambae yu luksave se hem i kaen, hem i mekem i stret oltaem, mo hem i gud tumas. Yu save trastem hem. Jeff i talem se: “Taem Jeova i kam gudfren blong mi, mi luksave se i no gat wan narafala man nating we i reregud olsem hem blong givhan long mi oltaem.”

Sore tumas, plante man oli talem ol nogud samting long saed blong Jeova. Oli talem se hem nao i mekem ol man oli safa, mo oli blemem God from ol rabis fasin we ol jos oli mekem. Sam samting we oli bin hapen long histri we oli moa nogud i bitim ol narafala samting, ol man oli talem se oli fol blong God. Be Dutronome 32:​4, 5 i talem se: “[God] i stret olwe nomo . . . Be olgeta ya, tingting blong olgeta bambae i no stap strong long hem. Olgeta bambae oli no stret blong karem nem ya se ol man blong Hae God, from we . . . oli man blong mekem sin.” Taswe, i stap long yumi wanwan blong skelemgud ol save long saed blong God mo jusum rod blong yumi.​—Dutronome 30:​19, 20.

Stamba Tingting Blong God Bambae i Kamtru

Nomata wanem rod we yumi jusum, i no gat wan samting nating we i save blokem God blong mekem stamba tingting blong hem i kamtru fulwan long wol ya mo long ol man. Yumi mas rimemba se hem i Man we i Wokem olgeta samting. ?Ale, wanem nao stamba tingting ya blong hem? Jisas Kraes i tokbaot tingting ya taem hem i givim bigfala tok blong hem antap long hil, i se: “Olgeta we oli kwaet man oli save glad, from we bambae wol ya i blong olgeta.” Biaen, aposol Jon i soem se God i gat strong tingting blong ‘spolem ol man we oli stap spolem wol.’ (Matiu 5:​5, NW; Revelesen 11:18) Jisas i stap wetem God long taem ya we Hem i wokem ol samting. Taswe hem i save se faswan tingting blong God i blong gat wan famle blong ol man we oli stretgud olgeta mo we bambae oli laef olwe long paradaes long wol. (Jenesis 1:​26, 27; Jon 1:​1-3, NW ) God i no save jenis samtaem. (Malakae 3:6) Hem i promes se: “Mi mi talem tru. !Plan blong mi bambae i mas kamtru! !Olgeta  samting we mi mi wantem mekem, bambae i mas hapen!”​—Aesea 14:24.

Long taem blong yumi, Jeova i stat finis blong hivimap wan kampani blong man we oli gat pis mo oli joengud. Olgeta ya oli no griri mo oli no tingbaot olgeta nomo, olsem bighaf blong ol man long wol tede. Be oli lavem God mo oli lavem ol man raonabaot long olgeta. (Jon 13:35; Efesas 4:​15, 16; Filipae 2:​1-4) Hemia wan grup blong man mo woman we bilif blong olgeta i mekem se oli wantem gohed nomo blong finisim wok blong olgeta bifo we God i spolem ol rabis man. Wok ya i blong talemaot gud nius blong Kingdom blong God we klosap nao bambae i gat paoa long wol ya. (Matiu 24:14; 28:​19, 20) Long bitim 230 kantri, moa long sikis milian Kristin oli stap wosip tugeta, olsem ol brata we oli lavlavem olgeta mo oli joengud.

Mekem Se Yu Yu Gat Wan Risen Blong Laef

Sipos yu yu harem se yu nidim wan risen blong laef, yu mas save se Jeova God i stap singaot yu naoia blong joen wetem ol man blong hem, we oli olsem ol man blong wan ‘kantri we i folem stret fasin.’ (Aesea 26:2) Be, maet yu stap tingbaot se, ‘?Laef i olsem wanem long kampani blong ol Kristin ya? ?Mi mi rili wantem joen long olgeta ya?’ Traem harem tok ya blong sam yangfala:

Quentin: “Kongregesen i olsem wan sefples we i protektem mi long wol ya. Mi luksave se Jeova i stap givhan long mi. From samting ya mi save se hem i stap mo se hem i wantem we mi mi hapi.”

Jeff: “Kongregesen i nambawan ples we mi save go long hem blong kasem ol tok blong leftemap tingting blong mi. Ol Kristin brata sista blong mi oli stap long ples ya, mo oltaem oli talem ol gudfala tok blong givhan long mi. Olgeta ya oli olsem famle blong mi nomo.”

Linet: “Glad we mi mi kasem taem wan man i bilif long trutok blong Baebol mo i tekem disisen blong mekem wok blong Jeova, i bitim ol narafala glad. Samting ya i mekem mi mi haremgud long laef blong mi.”

Cody: “Sipos Jeova i no stap long laef blong mi, bambae mi mi laef blong nating nomo. Bambae mi olsem plante narafala we laef blong olgeta i olbaot nomo, oli traem faenem glad long ol defdefren rod be oli no save faenem. Yes, Jeova i givim wan blesing long mi we i bigwan bitim mak, hemia blong frengud wetem hem, mo samting ya i mekem se mi mi gat wan risen blong laef.”

I gud we yu tu yu pruvum samting ya. Sipos yu kam klosap long Jeova God we i wokem yu, bambae yu harem se yu gat wan risen blong laef.

[Ol Futnot]

[Tok blong pija long pej 31]

Taem yumi frengud wetem God, yumi harem se yumi gat wan risen blong laef

[Foto Credit Line blong pija long pej 29]

NASA photo