?I Stret Blong Kasem Moa Save Long Ol Narafala Skul?

MIGUEL, we hem i wan Witnes blong Jeova long Saot Amerika, i talem se: “Blong klosap wan yia, mi stap go long ol Kristin miting, mo mi glad blong tokbaot Kingdom blong God long ol narafala. Be biaen, mi stat blong lesin long toktok blong ol narafala skul we i kamaot long radio mo long ol prija long televisin. Long tingting blong mi, ol program ya bambae oli halpem mi blong kasem moa save long ol man blong narafala skul. Mi save finis se tijing blong olgeta i no laenap wetem Baebol, be mi wantem save moa long olgeta.”

Long sem kantri ya, Jorge i wok strong long wok blong tijim ol narafala long saed blong trufala wosip. Be, wan dei, hem i stat blong lesin long ol program blong ol narafala skul long radio mo televisin. Long taem ya, hem i stap talem se: “Yumi mas kasem save long ol bilif blong narafala.” Taem oli askem hem sipos fasin blong lesin oltaem long ol giaman tijing i save spolem hem, hem i ansa se: “I no gat wan samting nating i save spolem bilif blong man we i savegud trutok blong Baebol.” Tufala stori ya oli mekem yumi tingbaot wan impoten kwestin se, ?I waes blong lesin long samting we ol narafala oli bilif long hem?

Luksave Trufala Kristin Skul

Afta long ded blong ol aposol, sloslou ol defren skul we oli giaman se oli Kristin oli kam antap. Samting ya nao i spolem trufala wosip. From we Jisas i gat save long samting ya finis, hem i soemaot rod blong makemaot trufala Kristin skul long ol skul we oli giaman. Fastaem, hem i givim woning se: “Yufala i mas lukaot long ol giaman profet, blong oli no kam spolem yufala. Olgeta ya oli save kam long yufala, we oli kwaet olsem sipsip nomo, be fasin blong olgeta, oli olsem wael dog stret.” Mo hem i gohed i se: “Bambae yufala i save makem olgeta long frut blong laef blong olgeta.” (Matiu 7:15-23) Ol trufala man blong Jisas oli mekem samting we hem i talem i wok long laef blong olgeta, mo i isi nomo blong luksave olgeta from gudfala frut long laef blong olgeta. Olsem Jisas, olgeta tu oli  go long ol man mo oli yusum Baebol blong tokbaot Kingdom blong God. Folem eksampol blong Jisas, oli no joen long ol politik mo ol rao blong wol. Oli agri se Baebol i Tok blong God mo oli bilif se hem i trutok. Oli talemaot nem blong God blong ol man oli save hem. Mo from we oli folem eksampol blong God blong lavem ol man, oli no joen long ol faet. Defren olgeta, oli mekem long ol narafala olsem we oli brata blong olgeta.—Luk 4:43; 10:1-9; Jon 13:34, 35; 17:16, 17, 26.

Folem tok we Baebol i talem, i gat rod blong makemaot “wanem nao i stap mekem stret man i defren long rabis man, mo wanem nao i stap mekem man we i mekem wok blong God i defren long man we i no bin mekem.” (Malakae 3:18, NW) Olsem ol Kristin long faswan handred yia, ol trufala man blong wosip tede oli joengud tugeta. Oli gat wan tingting nomo mo fasin blong olgeta i wan nomo. (Efesas 4:4-6) ?Taem yu luksave grup blong ol trufala Kristin ya, from wanem yu wantem faenemaot moa long bilif blong ol narafala bakegen?

Lukaot Long Ol Giaman Tija

Baebol i soemaot se nating we yu lanem trutok blong Baebol finis, ol giaman tijing oli save spolem yu long saed blong spirit. Aposol Pol i givim woning se: “Yufala i mas lukaot gud, blong bambae i no gat ol man oli kam fasem yufala long rabis tok ya we i folem waes blong man. Ol tok ya i blong giaman nomo, i stap kamaot long ol devel we oli stap olbaot long wol ya fastaem, i no kamaot long Kraes.” (Kolosi 2:8) !Tok ya i klia nomo! Ol giaman tija oli olsem ol wael anamol, we oli wantem fasem yu blong kakae yu. Yes, oli wantem spolem yu nomo.

I tru se, Pol i intres long bilif blong ol narafala. Wantaem hem i statem tok blong hem se: “Ol man Atens. Mi mi luk finis we yufala i strong blong mekem wosip long plante god. Taem mi stap wokbaot long ples ya blong yufala, mi stap lukluk ol ples blong wosip blong yufala. Nao mi faenem wan ples we yufala i raetem tok ya finis long wan ston se, ‘Hemia ples blong wosip long wan god we mifala i no save hem.’” (Ol Wok 17:22, 23) Be, samting ya i no minim se Pol i stap tekem ol waes tok blong ol man Gris i kam long tingting blong hem oltaem.

I stret blong faenemaot olsem wanem ol giaman skul mo ol tijing blong olgeta oli stat, be i defren olgeta taem yumi tekem ol tijing ya i kam long tingting blong yumi oltaem. * Jeova i stanemap “slef we i stret mo waes” blong givim ol tijing we oli stanap long Baebol long yumi. (Matiu 4:4; 24:45, NW) Pol i talem se: “Yufala i no save sidaon blong kakae long tebol blong Masta blong yumi, mo bakegen long tebol blong ol devel. Masta blong yumi i no save letem yumi i biaen long wan narafala masta, mo yumi no mas mekem hem i kros.”—1 Korin 10:20-22.

Maet sam giaman tija oli trufala Kristin fastaem, be oli lego trutok blong bilif long ol giaman tok. (Jud 4, 11) Yumi no sapraes long samting ya. Afta we Jisas i tokbaot grup blong ol tabu Kristin olsem “slef we i stret mo waes,” hem i tokbaot wan “rabis slef.” Hemia grup ya we oli komplen se, “masta blong hem i tektaem tumas,” mo i stat blong kilim ol narafala man blong wok. (Matiu 24:48, 49, NW) Plante taem olgeta ya wetem ol man we oli biaen long olgeta, oli no gat prapa tijing blong olgeta; oli wantem nomo blong spolem bilif blong ol narafala. Aposol Jon i tokbaot olgeta se: “Sipos wan man i kam long yufala, be hem i no tijim yufala long ol stret tok ya we Kraes i tijim yumi long hem, bambae yufala i no tekem hem i kam insaed long haos blong yufala. Sipos man olsem i kam, be bambae yufala i no talem halo long hem.”—2 Jon 10; 2 Korin 11:3, 4, 13-15.

Ol man we oli rili traem faenem trutok oli mas tingtinggud long wanem we oli harem long ol narafala skul. Biaen, bambae God i blesem olgeta man we hat blong olgeta i stret mo we oli traem faenem trutok. Baebol i tokbaot waes blong God, i talem se: “Oltaem yu mas traehad blong kasem waes ya, olsem we yu save traehad blong faenem silva, no wan narafala samting olsem, we man i bin berem. Sipos yu stap mekem olsem . . . bambae yu save fasin blong hem moa, blong yu savegud hem.” (Ol Proveb 2:4, 5) Ol trufala Kristin, oli faenem save blong God tru long Baebol mo Kristin kongregesen. Oli luk finis olsem wanem Jeova i blesem ol man we save ya i lidim olgeta. Taswe, ol trufala Kristin oli no gohed blong lesin long ol giaman tijing blong ol skul.—2 Timoti 3:14.

[Futnot]