Finshi Filenga Abantu Ukutwalilila Ukucita Amafisakanwa?

“Umuntu atekela umuntu munankwe ku kumucusha.”—LUKALA MILANDU 8:9.

AYA mashiwi yalalondolola bwino sana ifyo imitekele ya bantu yaba. Iyi mitekele e yalenga abantu ukulacula. Ukutula fye na kale, abantu abafwaisha ukuba no mulinganya mu mitekele yabo balafilwa pa mulandu wa bufunushi na mafisakanwa. Mulandu nshi cabela ifi? Cinshi cilenga abantu ukutwalilila ukucita amafisakanwa? Icilenga sana ni fi fintu fitatu ifyabipa.

1. Ulubembu.

Baibolo itila abantu “bonse babembu.” (Abena Roma 3:9) Ulubembu “lwaikala” muli ifwe kabili lwaba kwati bulwele ubushipola ubo twapyana ku bafyashi besu. Pa myaka iingi nga nshi, ulubembu ‘lulateka’ abantunse. Tutungululwa ne “funde” lya lubembu. Ulubembu e lulenga abengi ukulacita fye ifingabawamina nelyo ukuliila abantu amasuku pa mutwe pa kunonka ifyuma nelyo pa kuba ne fifulo ifikalamba.—Abena Roma 5:21; 7:17, 20, 23, 25.

  2. Icalo cabipa twikalamo.

Abengi muli cino calo twikalamo bafunushi kabili bali-itemwa. Ici cilenga abantu bamo cilebafya ukupusanako na ba muli cino calo. Abantu balafwaisha ukuba ne fifulo ifikalamba pa kuti ifintu filebawamina. Kabili balafwaisha ukuba ne fyuma no kukwata ifintu ifingi, ukucila na pa fyo bakabila. Ku ca bulanda, abengi balacita ifyabipa pa kuti bakwate ifi fintu. Mu nshita ya kukaana amatunko ya muli cino calo, aba bantu ‘bakonkelesha fye icinabwingi ku fibi.’—Ukufuma 23:2.

3. Satana Kaseebanya.

Satana, malaika umubifi, ‘alalufya aba pano isonde bonse.’ (Ukusokolola 12:9) Alomfwa bwino ukutunka abantu. Apo abantu bonse balafwaya ukwikala bwino, mu bucenjeshi Satana alalenga abantu ukubomfya ubufufuntungu pa kuba ne fyuma.

Bushe ici cilolele mu kuti Satana alikwata amaka pali ifwe ica kuti tufwile ukulacita fye fyonse ifyo alefwaya? Twalasanga icasuko mu cipande cikonkelepo.