Ukutusansamusha Kulenga Tulesansamushako Bambi

Apo tatwapwililika, bonse tulalwala, kabili limo tulalwala na malwele ayakalamba. Nga twakwata ubwafya bwa musango uyu, kuti twacita shani pa kuti tushipikishe?

Cimo icingatwafwa ukushipikisha, cisansamushi icifuma kuli balupwa, ifibusa, na Bena Kristu banensu.

Amashiwi ayasuma ayafuma kuli cibusa yalatusansamusha, yaba kwati mafuta ayatontolola no kuposha icilonda. (Amapi. 16:24; 18:24; 25:11) Lelo Abena Kristu ba cine tabamona ukuti e bafwile fye ukusansamushiwa. Balaitendekelako “ukusansamusha abali na macushi yalekanalekana ku cisansamushi ico Lesa [abasansamushishako].” (2 Kor. 1:4; Luka 6:31) Ba Antonio, bakangalila wa citungu ku Mex ico, balibasansamwishe kabili nabo balisansamwisheko bambi.

Ilyo ba Antonio babasangile no bulwele bwa kansa ya mu mulopa, bali sana no bulanda. Na lyo line, bale-esha na maka ukukanaba sana no bulanda. Finshi balecita? Baleibukisha inyimbo sha Bufumu no kwimba kabili baletontonkanya na pa mashiwi yali mu lwimbo. Cimbi icalebasansamusha ca kuti pa kupepa baleikatisha ishiwi kabili balebelenga na Baibolo.

Na lyo line, ba Antonio batile, icabasansamwishe sana Bena Kristu banabo. Batile: “Ine no mwina mwandi nga twasakamikwa sana, twaleita lupwa wesu uwali eluda pa kuti ese apepe na ifwe. Ukucita ifi kwaletusansamusha kabili kwalelenga twaumfwako bwino.” Ba Antonio balandile no kuti: “Na kuba, pa mulandu wa kuti balupwa wesu baletwafwa ukubikako fye na Bena Kristu banensu, calengele ukuti mu nshita fye iinono tuleke ukusakamana sana.” Ala balitashishe sana pa kukwata ifibusa ifyabatemenwe kabili ifyababikileko amano!

Cimbi icingatwafwa ilyo tuli na mafya, mupashi wa mushilo. Umutumwa Petro atile umupashi wa mushilo uwa kwa Lesa waba “bupe fye.” (Imil. 2:38) Ilyo abasambi bapokelele umupashi wa mushilo pa Pentekoste mu 33 C.E. calangile ukuti ifyo Petro alandile fya cine. Nangu ca kutila Petro alelanda pa Bena Kristu basubwa, ifwe bonse kuti twakwata umupashi wa mushilo. Umupashi wa mushilo uwa kwa Lesa taupwa, kanshi tufwile ukulamulomba ukuti aletupeela sana umupashi.—Esa. 40:28-31.

MULEBIKA AMANO KU BALECULA

Umutumwa Paulo alishipikishe amafya ayengi kabili limo alepusuka fye kwempe. (2 Kor. 1:8-10) Lelo Paulo talesakamikwa sana ukutila kuti afwa. Ukwishiba ukuti Lesa alemwafwa kwalemusansamusha. Atile: “Acindikwe Lesa kabili Wishi wa kwa Shikulwifwe Yesu Kristu, Shifwe wa nkumbu kabili Lesa wa cisansamushi conse, uutusansamusha mu macushi yesu yonse.” (2 Kor. 1:3, 4) Paulo taleililila ubulanda. Lelo amafya ashipikishe yalengele ukuti alelangulukilako bambi, ica kuti alishibe bwino ifya kusansamusha bambi abali na mafya.

Ilyo ba Antonio bapolele, balitwalilile mu mulimo wa kwenda. Ilyo tabalalwala, lyonse balelanga ukuti balitemwa Abena Kristu banabo, lelo nomba, ba Antonio na bena mwabo balesha na maka ukupempula abalwele no kubakoselesha. Ku ca kumwenako, ilyo ba Antonio baile mu kupempula Umwina Kristu uwalwele ubulwele ububi, basangile ukuti uyu munyinefwe talefwaya ukuya mu kulongana. Ba Antonio batile: “Icalengele ukuti alekaana ukuya mu kulongana te kutila tatemenwe Yehova na ba bwananyina, lelo ni co ubulwele bwalengele ukuti aleimona uwa cabe cabe.”

Pa kuti bakoseleshe uyu munyinefwe, ba Antonio bamwebele ukuti pa kwangala uko bakakwata na Bena Kristu bambi, e ukapepa. Nangu ca kutila uyu munyinefwe alemona kwati te kuti apepe, alisumine. Ba Antonio batile: “Uyu munyinefwe alipepele bwino sana, kabili pa numa alisansamwike ica kuti alilekele no kuimona uwa cabe cabe.”

Ca cine, ifwe bonse twalishipikishapo ubwafya, nampo nga bunono nelyo bukalamba. Lelo nga filya Paulo alandile, ukushipikisha ubwafya kuti kwalenga twaishiba bwino ifya kusansamusha bambi abali na mafya. E ico, natulebika amano ku mafya ya Bena Kristu banensu no kulabasansamusha. Nga tulecita ifi ninshi tulepashanya Lesa wesu Yehova.