4 | Ifyo Baibolo Ilanda Kuti Fyatwafwa
IFYO BAIBOLO ILANDA: “Amalembo yonse . . . ya mulimo.”—2 TIMOTE 3:16.
Umo Aya Amashiwi Yalola
Nangu ca kuti Baibolo te citabo icilanda pa fya bumi, ifyabamo kuti fyatwafwa kabili kuti fyaafwa no muntu uulwele amalwele ya matontonkanyo. Natulande pa fyakumwenako.
Ifyo Ifi Fingamwafwa
“Abatuntulu tabakabila kondapa, kano abalwele.”—MATEO 9:12.
Baibolo ilanda fye ukwabula ukupita na mu mbali ukuti tulakabila ukutundapa. Abengi balomfwako bwino nga ca kuti baya ku cipatala kabili babeba ifyo balwele pantu baleshiba ifya kucitapo pa bulwele balwele.
‘Ukutukusha umubili kulafwa.’—1 TIMOTE 4:8.
Ukutukusha umubili kuti kwalenga muleumfwako bwino nga ca kuti mwalilwala amalwele ya matontonkanyo. Kuti muleumfwako bwino nga ca kuti muletukusha umubili lyonse, mulelya ifya kulya ifisuma kabili mulelaala sana.
“Umutima wa nsansa muti uusuma, lelo umutima uwa bulanda umya ifupa.”—AMAPINDA 17:22.
Mwakulaba ne nsansa nga ca kuti mulebelenga Baibolo lyonse kabili mulepanga ukucita ifyo mwingakumanisha ukucita. Nga mwabika amano ku fintu ifisuma ifilemucitikila kabili mwaba ne subilo lya kuti ifintu fikawama ku ntanshi mwakulashipikisha nga ca kuti mwalilwala amalwele ya matontonkanyo.
“Abafuuka e ba mano.” —AMAPINDA 11:2.
Inshita shimo kuti mwasanga ukuti tamulekumanisha ukucita fimo ifyo mulefwaya, kanshi muleleka abantu balemwafwa. Balupwa ne fibusa kuti batemwa ukumwafwa lelo te kuti beshibe ifyo bengamwafwa. Mulebeba ifyo mulefwaya pa kuti bamwafwe. Mwilaenekela ukumucitila ifintu ifikalamba lelo muletasha pali ifyo fine bamucitila.
Ifyo Baibolo Ileafwa Abalwala Amatontonkanyo
“Nshaleumfwa bwino e ico naliile ku cipatala. Balinjebele ubwafwa nakwete. Ici calengele naishiba ifya kucita e lyo no kufwaya imyundapilwe iyali no kulenga ndeumfwako bwino.”—E fyalandile ba Nicole, a abalwala ubulwele bwa bipolar.
“Nalisanga ukuti nga ndebelengela Baibolo pamo no mwina mwandi cila bushiku, ndatontonkanya pa fintu ifisuma ubo bushiku. E lyo inshiku shimo nga nshileumfwa bwino kulaba amalembo yamo ayansansamusha.”—E fyalandile ba Peter, abalwala amasakamika.
“Nalefilwa ukwebako abantu bambi pa fyo nalwele pantu naleumfwa insoni. Lelo nalyebeleko umunandi uwantekanishishe kabili uwale-esha ukumfwikisha ifyo nalepitamo. Alilengele nalaumfwako bwino kabili nalilekele ukutalalilwa.”—E fyalandile ba Ji-yoo, abalwala ubulwele bwa miliile.
“Baibolo yalilenga naishiba inshita ilyo ningile ukubomba nelyo ningile ukutuusha. Ifyo ilanda fyalilenga ndeshipikisha nga nindwala amalwele ya matontonkanyo.”—E fyalandile ba Timothy, abalwala amasakamika.
a Amashina yamo nayalulwa.
Nalimo Kuti Mwatemwako ne fi
LOLENI!
Ifya Kucita pa Kuba ne Nsansa—Ukuba no Bumi Ubusuma
Bushe ukukanaba no bumi ubusuma kulalenga umuntu ukukanaba ne nsansa?
ABACAICE BEPUSHA UKUTI
Finshi Ningacita pa Kuti Ntemwe Ukutukusha Umubili?
Ukulunda pa kuba no bumi ubusuma, bushe kwaliba na fimbi ifyo winganonkelamo nga ca kuti lyonse uletukusha umubili?
AMASUKO KU MEPUSHO YA MU BAIBOLO
Bushe Baibolo Kuti Yalenga Naba ne Nsansa mu Cupo?
Ukufunda ukusuma ukwaba mu Baibolo kwalilenga abaume na banakashi abengi ukuba ne nsansa mu cupo.
AMASAMBILISHO YA MU BAIBOLO
Tendekeni ukusambilila Baibolo ne Nte sha kwa Yehova
Tendekeni ukusambilila baibolo ne Nte sha kwa Yehova ukwabula ukulipila.
