Cikaba Shani ku Bulwele bwa AIDS Mu Afrika mu Myaka ya ba 2000?

KU ULEMBA LOLENI! MU ZAMBIA

MU SEPTEMBER umwaka wapwile, abeminishi ukufuma mu fyalo fyalekanalekana ifya mu Afrika balongene mu Lusaka, muno Zambia, ku kulanshanya kwa fyalo fyalekanalekana ukwalenga 11 pa lwa bulwele bwa AIDS na malwele yambukila ukupitila mu kulaalana, mu Afrika. Umulandu umo bakumanine wali kukoselesha ukubombela pamo mu kusanga inshila sha kucilikilamo ukwanana kwa bulwele bwa AIDS mu Afrika.

Profesa Nkandu Luo, uwali cilolo wa ciputulwa ca bumi pali ilya nshita atile, imibele mu Afrika na mu fyalo fimbi ifipiina “naibipisha nga nshi,” kabili “ilebwesesha na ku numa ubuyantanshi mu fya bumi no bwikashi e lyo no bunonshi bwa calo.”

Ilyashi lyalandilwe na bakalanda abengi pa lwa kusanguluka kwa mulopa lyatile abantu balyambula ubulwele bwa AIDS ukupitila mu kubikwamo umulopa. Dokota umo, uwa mu kabungwe ka World Health Organization’s Blood Safety Unit, atile nelyo cingati te lyonse umo engambula ubulwele bwa AIDS nga alaala no walwala, onse uwabikwamo umulopa wa muntu walwala AIDS ali no kwambula ubu bulwele! Uyu dokota alikwete umulandu uusuma uwa kusosela ukuti: “icawamisha kukanabikwamo umulopa.”

Pali uku kukumana balikomailepo ukuti, indalama shikabilwa pa kuti umo ondapwe ubulwele bwa AIDS shingi sana ica kuti te kuti akumanishe. Ku ca kumwenako, mu Uganda, abengi abekala mu tauni bafola badola mupepi na 200 pa mweshi. Lelo indalama shifwaikwa pa kuti umo ondapwe no muti ucingilila akashishi ka AIDS ukusanduluka mu mubili shifika kuli badola 1,000 pa mweshi.

Ukukumana kwali mu Lusaka kwalangilile ukuti ukutendeka kwa imyaka ya ba 2000 takwingaleta icingafwa ukucingilila ukwanana kwa bulwele bwa AIDS. Nangu cibe fyo, abasambi ba Baibolo balishiba ukuti uwingafumyapo fye ukulwala konse ni Kabumba, Yehova Lesa, uwalaya ukuti mu calo cakwe icipya “umwikashi wa mu calo takasose, ati, Nindwala.”—Esaya 33:24.

[Mapu ne Fikope pe bula 31]

Profesa Nkandu Luo

[Abatusuminishe]

Abasuminishe ukukope cikope ci ni ba E. Mwanaleza aba ku Times of Zambia