Isonde Lyabulamo Utupata

NANI engapwisha ubwafya bwa tupata? Nga fintu tumwene, amatukuto ya bantunse te kuti yafumyepo ulupato, ubukakashi, no bufunushi. Nangu cibe fyo, abasambi ba Baibolo baishiba ukuti ni Kabumba e wingapwishishisha fye ubu bwafya. Nga akabupwisha shani?

Ukuletako Ubwikashi bwa Mutende

Abalwa inkondo bantu, te fyanso iyo. Nga tulefwaya ukumona umutende, kanshi, ulupato ulupaatulula abantunse mu mishobo, mu mikowa, na mu nko lufwile ukupwa. Ici e co Lesa alaya ukucita ukupitila mu Bufumu bwakwe, ubo abantu abengi mwi sonde fye lyonse basambilishiwa ukupepela.—Mateo 6:9, 10.

Baibolo isosa ukuti Yehova ni “Lesa wa mutende.” (Abena Roma 15:33) Umutende wa kwa Lesa tawashimpwa pa fibindo ne fipangano, nangu pa mwenso wa kulwa ne calo caipangasha bwino mu fyanso. Mu cifulo ca ico umutende wa kwa Lesa usanshamo ukwaluka mu nshila abantu batontonkanishamo na mu fyo bamona abantu banabo.

Yehova Lesa akasambilisha abafuuka mu nshila shakwe isha mutende. (Amalumbo 25:9) Icebo cakwe, Baibolo, cilaya inshita lintu bonse aba mweo “bakaba abasambilishiwa kuli Yehova, kabili umutende wa bana bobe abaume ukafula.” (Esaya 54:13) Ukufika ku cipimo cimo, kale kale ici e cilecitwa. Mwi sonde lyonse, Inte sha kwa Yehova shaishibikilwa mu kutwala pa ntanshi umutende pa kati ka bantu ba fikulilo fyapusanapusana. Abasambilishiwa ifishinte fyasumbuka ifya mu Baibolo balatukuta ukwikala muli buumo ukwabula ukusakamana imilandu iyo ingabapaatukanya. Amasomo ya Baibolo yalaalula imimwene yabo yonse ukufuma ku ya lupato ukuya ku ya kutemwa.—Yohane 13:34, 35; 1 Abena Korinti 13:4-8.

Ukusansha pa masomo, ukukabila kwa cumfwano  ca mwi sonde lyonse ni kale kwamonwa ukuti e nshila ya kupwishishamo ifyanso. Ku ca kumwenako, Komiti wa pa Kati ka Fyalo uwa kabungwe ka Red Cross atasha ukuti umushi fye umo uwa mwi sonde lyonse ulatungilila mu kwikatana inshila sha kucilikila ukupanga utupata ne sha kulesha twene.

Yehova alaya ukucita icacila na pali co. Kasesema Daniele asobele ukuti: “Lesa wa mu muulu akemyo bufumu ubushakonaulwe. . . . Bukashonaula no kupesha aya mabufumu yonse [ayalipo], kabili bukeminina umuyayaya.”—Daniele 2:44.

Ubufumu bwa kwa Lesa bukapwishishisha ico umuntu ashingacita. Ku ca kumwenako, mu mashiwi ya kusesema Amalumbo 46:9 yatila: “[Yehova] aputulo bulwi ukufika ku mpela ya calo; ubuta abufuna, afuna ne fumo, amaceleta ayoca mu mulilo.” Ubufumu bwa kwa Lesa bukaleta imikalile isuma umo umuntu akaipakisha umutende wa cine cine na Kabumba wakwe na bantu banankwe.—Esaya 2:4; Sefania 3:9; Ukusokolola 21:3, 4; 22:2.

Augusto, uulumbwilwe pa kutendeka fye kwa cipande ca kubalilapo, asanga icisansamushi muli ubu bukombe bwa mu Baibolo. Abafyashi bakwe abali ni Nte sha kwa Yehova, balemwafwilisha ukuba ne citetekelo mu malayo yashaiwamina aya mu Baibolo. (Marko 3:1-5) Ca cine, pali ino nshita alingile ukushipikisha ubukali bwa kulemanikwa ku kapata. Te mulandu ne co, Augusto alolela sana ubushiku lintu ubulayo bwa kwa Lesa ubwe sonde lya paradise bukafikilishiwa. Kasesema Esaya asobele ukuti, “E lyo yakashibulwa amenso ya mpofu, . . . e lyo uwalemana amolu akacilauka nge nsebula.”—Esaya 35:5, 6.

Muli ulya Paradise aleisa, utupata tatwakatale atwipayapo abantu nangu ukubalemanika. Mu cifulo ca ico, abantu abakekala mu fifutu fyonse ifye sonde bakekala mu mutelelwe. Kasesema Mika acilondolwele muli iyi nshila: “Bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya; pantu akanwa ka kwa Yehova nakasosa.”—Mika 4:4.

Bushe kuti mwatemwa ukusambililapo na fimbi pa lwa malayo ya kwa Lesa ayalembwa mu Cebo cakwe, Baibolo? Monaneni ne Nte sha kwa Yehova ishabela uko kwine mwikala, nelyo lembeleni ku Watch Tower ukubomfya adresi ya mu calo cenu uuli pe bula 5 ilya uno wine magazini.

[Icikope pe bula 8, 9]

Mu Bufumu bwa kwa Lesa, utupata tatwakatale atutiinya abantunse