Tinikeni pa kuti muye ku filimo

Tinikeni pa kuti mumone imitwe iilimo

IFYEBO NA FIMBI

Bushe Tulingile Ukusefya Amaholide?

Bushe Tulingile Ukusefya Amaholide?

TE BAIBOLO yalanda ukuti tulesefya amaholide ayo basefya mu fyalo ifingi. Nomba ninshi aya maholide yafuma kwi? Nga kuli uko mwingasanga ifitabo, mukomfwa ifyo ifi fitabo filanda pa maholide yaseeka uko mwikala. Moneni ifyo ifi fitabo filanda pa maholide yamo yamo.

Isita. Icitabo ca The Encyclopædia Britannica, citila: “Mu Cipingo Cipya, tamwaba apo balanda ukuti tulesefya Isita. Bushe Isita yatendeke shani? Abatendeke yene ni balya abashalepepa Lesa wa cine. Nangu ca kutila basosa ukuti pali ubu bushiku ico bebukisha kubuuka kwa kwa Yesu, ificitwa pa Isita te fya Bwina Kristu. Ku ca kumwenako, icitabo ca The Catholic Encyclopedia calandile pa kalulu babomfya pa kusefya Isita aciti: “Ku bashipepa Lesa wa cine, akalulu lyonse cishibilo ca bufyashi.”

Ukusefya Icaka. Ubushiku ne ficitwa pa kusefya Icaka filapusanapusana ukulingana ne fyalo. Icitabo ca The World Book Encyclopedia citila: “Kateka wa Roma Julius Caesar e wasalile ubushiku bwa January 1 ukuti bube Icaka, atemwa apo Umwaka Upya utendekela. Ici cali mu 46 B.C. Abena Roma bapeele ubu bushiku kuli Janus, lesa mwanakashi uwa mpongolo, ifiibi ne ntendekelo. Umweshi wa January, bawinikiile kuli Janus, uwakwete ifinso fibili, cimo caloseshe ku ntanshi, e lyo cimbi ku numa.” E ico, abatendeke ukusefya Icaka ni balya abashalepepa Lesa wa cine.

Halloween. Pali uku kusefya kwapalana ne mitebeto bacitila abafwa, ulupapulo lwa The Encyclopedia Americana lutila: “Ificitwa pa kusefya Halloween, fyafuma ku mitebeto ya bashimapepo ba mipepele ya ba Celt iyalebako kale sana ilyo kushilaba ubuKristu. Aba bantu baletebeta balesa wabo abakalamba babili. Na ba ni lesa kasuba, na lesa wa bafwa (uwaleitwa ati Samhain). Lesa wa bafwa ena balemutebeta pa November 1, ilyo Umwaka Upya waletendeka ku ba Celt ba pa kale. Ifyo balecita mu mitebeto balecitila abafwa e fyo batendeke ukucita mu kusefya kwa Bena Kristu.”

Amaholide Yambi. Te kuti tukumemo ukulanda pa maholide yonse ayo basefya pano calo. Lelo, amaholide ayacindika umuntu, nelyo utubungwe tayawama kuli Yehova. (Yeremia 17:5-7; Imilimo 10:25, 26) Muleibukisha no kuti ukwafuma holide iyo aba fya mapepo basefya na ko kulalenga twaishiba nga isuma kuli Lesa nelyo iyo. (Esaya 52:11; Ukusokolola 18:4) Ifyo Baibolo yatweba pali uyu mulandu muli cino citabo mu Cipandwa 16, fikamwafwa ukwishiba ifyo Lesa amona abasefya aya maholide.

← Moneni icipandwa