INYUNSHIPEPALA yonse iyo mwabelenga, na lintu mwatamba TV nelyo mwakutika ku cilimba, mukomfwa amalyashi ayengi ayalelanda pa kusansa kwa tupondo, pa nkondo na pa lukakaala! Tontonkanyeni na pa mafya mwakwata. Limbi ukulwala nelyo ukufwilwa kwalenga mwaba no bulanda sana. Nakalimo kuti mwaumfwa ifyo umuntu musuma Yobo aumfwile uwatile, ‘ubulanda bwalimukolele.’—Yobo 10:15, Diocese of Mbala.

Ipusheni mwe bene amuti:

• Bushe Lesa afwaile ukuti ifi fintu filencitikila no kucitikila abantunse bonse?
• Nani engangafwa ukupwisha amafya yandi?
• Bushe kuti twacetekela ukuti pano isonde pakaba umutende?

Baibolo ilasuka ifi fipusho bwino bwino.

BAIBOLO ISAMBILISHA AITI LESA AKALENGA ISONDE UKUBE FI.

“Akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo.”—Ukusokolola 21:4

“Uwalemana amolu akacilauka nge nsebula.”—Esaya 35:6

“Yakashibulwa amenso ya mpofu.”—Esaya 35:5

“Bonse ababa mu nshiishi bakebukishiwa…no kufumamo.”—Yohane 5:28, 29

“Umwikashi wa mu calo takasose, ati, ‘Nindwala.’”—Esaya 33:24

‘Mukaba ukupaka kwa ngano mu calo.’—Amalumbo 72:16

UBUSUMA BWABA MU FYO BAIBOLO ISAMBILISHA

Mwimona kwati ifyo twalanda fya kwelenganya fye kabili te kuti ficitike. Lesa alaya ukucite fi fintu kabili Baibolo ilondolola ne fyo akacite fi fintu.

Lelo, Baibolo ilacita ne fyacilapo. Ilatweba ifyo twingaipakisha ubumi na pali nomba. Taleni tontonkanyeni pa masakamika na mafya mwakwata. Kuti yaba kukanakwata indalama, amafya mu lupwa, ukulwalilila, nelyo ukufwilwa umutemwikwa. Baibolo kuti yamwafwa ukushipikisha aya mafya pali lelo, kabili kuti yapwisha aya masakamika pa kwasuka amepusho nga ya:

• Mulandu nshi tuculila?
• Kuti twacita shani nga twasakamikwa mu bumi?
• Cinshi twingacita pa kuti mu lupwa lwesu mube sana insansa?
• Cinshi cicitika nga twafwa?
• Bushe tukabala atumona abatemwikwa besu abafwa na kabili?
• Kuti twacetekela shani ukuti Lesa akacita fyonse ifyo alaya ukucita ku ntanshi?

Ifi mulebelenga ici citabo, cailanga fye apabuuta ukutila kuti mwatemwa ukwishiba ifyo Baibolo isambilisha. Ici citabo cikamwafwa. Moneni ukuti amaparagrafu nayakwata ifipusho pe samba lye bula. Abantu abengi nga nshi baliipakisha ukubomfya ifipusho ne fyasuko pa kusambilila Baibolo ne Nte sha kwa Yehova. Tulesubila na imwe mukaipakisha. Shi ipaalo lya kwa Yehova libe na imwe nomba ilyo muleipakisha no kumwenamo mu kusambilila ifyo Baibolo isambilisha!

ISHIBENI BAIBOLO WENU

Baibolo yakwata amabuuku pamo na bakalata 66. Yayakanishiwa mu fipandwa ne fikomo pa kuti apa kubelenga palesangwa bwangu. Nga ca kuti mwamona amalembo muli cino citabo, inambala ya kubalilapo, iikonkele pe shina, cipandwa ce buuku nelyo kalata, e lyo iya bubili e cikomo. Natulangilile. Umulolele ilembo lya “2 Timote 3:16” ni umu: Kalata wa bubili kuli Timote, icipandwa 3, icikomo 16.

Mukeshiba bwangu Baibolo nga mulebelenga amalembo yali muli cino citabo. Cimbi icikamwafwa, kutendeka ukubelenga Baibolo cila bushiku. Nga mulebelenga ifipandwa fitatu, atemwa fine nelyo fisano cila bushiku, mukapwa ukubelenga Baibolo yonse mu mwaka umo.