Tinikeni pa kuti muye ku filimo

Tinikeni pa kuti mumone imitwe iilimo

ICIPANDWA 15

Ukupepa Uko Lesa Afwaya

Ukupepa Uko Lesa Afwaya

Bushe ukupepa konse kulapokelelwa kuli Lesa?

Kuti twaishiba shani ukupepa kwa cine?

Bushe bakapepa ba kwa Lesa aba cine ni bani?

YEHOVA LESA alatusakamana sana kabili afwaya ukuti twaimwena ubusuma bwa kutungululwa na wena. Nga tulemupepa ukulingana ne fyo afwaya, tukaba ne nsansa kabili tukacingililwa ku macushi ayengi. Na kabili akatupaala no kutwafwa. (Esaya 48:17) Lelo, kwaba ifilonganino fya mapepo ifingi nga nshi ifisosa ukuti fisambilisha icine pali Lesa. Lelo ifi filonganino fisambilisha ifyapusanapusana pa fyo Lesa aba ne fyo afwaya ifwe ukuba.

2 Kuti twaishiba shani ukuti ifi e fyo Yehova afwaya ukumupepa? Tamufwile ukutendeka ukusambilila no kulalinganya ifyo ifilonganino fyonse ifya mapepo fisambilisha. Mufwile ukusambilila fye ifyo Baibolo isambilisha pa kupepa kwa cine. Natulangilile: Mu fyalo ifingi muli ubwafya bwa kupanga indalama sha bufi. Tutile bamupeela umulimo wa kwishiba indalama sha bufi, kuti mwacita shani? Bushe kuti mwasungila ku mutwe ifyo indalama shonse isha bufi shimoneka? Awe. Kuti cawama mwabomfya iyo nshita ku kwishiba ifimoneka indalama sha cine. Nga mwaishiba ifyaba indalama sha cine, kuti mwaishiba ne ndalama sha bufi. E fyo caba na kuli ifwe, nga twasambilila ifyo twingeshiba ukupepa kwa cine, kuti twaishiba no kupepa kwa bufi.

3 Calicindama ukupepa Yehova ukulingana ne fyo afwaya. Abantu abengi basumina ukuti ukupepa konse kulasekesha Lesa, lelo Baibolo te fyo isosa. Na kuba icifwaikwa te kusosa fye ukuti ndi Mwina Kristu. Yesu atile: “Te onse uutila kuli ine, ‘Shikulu, Shikulu’ akengila mu bufumu bwa mu muulu, kano uucita ukufwaya kwa kwa Tata uwaba mu muulu.” E ico, pa kuti Lesa apokelele ukupepa kwesu tufwile ukwishiba ifyo afwaya e lyo no kucita ifyo fine. Yesu asosele ukuti abashicita ukufwaya kwa kwa Lesa ni “bampulamafunde.” (Mateo 7:21-23) Imipepele ya bufi ya fye nga filya fine indalama sha bufi shaba. Ne cabipisha ca kuti imipepele ya bufi itwala ku boni.

4 Yehova alipeela umuntu onse pe sonde ishuko lya kukwata umweo wa muyayaya. Lelo, pa kukwata umweo wa muyayaya mu Paradaise, tufwile ukupepa Lesa ukulingana ne fyo afwaya no kucita ifyo asuminisha. Ku ca bulanda, abengi balakaana ukucite co. E mulandu wine Yesu asosele ukuti: “Ingileni pa mpongolo ya kamfyemfye, pantu umusebo uutwala ku bonaushi walisaalala kabili walipabuka, kabili bengi abendamo; lelo ya kamfyemfye impongolo, no musebo uutwala ku bumi walifyenenkana kabili banono abausanga.” (Mateo 7:13, 14) Ukupepa kwa cine kutwala ku mweo wa muyayaya. Ukupepa kwa bufi kutwala ku bonaushi. Yehova tafwaya umuntu nangu umo ukonaika, e mulandu wine alepeelela abantu mu calo conse ishuko lya kusambilila pali wena. (2 Petro 3:9) E ico, kanshi imipepele yesu kuti yalenga twakwata umweo nelyo twafwa.

IFYO MWINGESHIBA UKUPEPA KWA CINE

5 Bushe ‘umusebo wa ku bumi’ kuti mwausanga shani? Yesu asosele ukuti ababa mu kupepa kwa cine bakeshibikilwa ku micitile yabo. Asosele ukuti: “Ku fisabo fyabo e ko mukabeshibila…. Umuti onse uusuma utwala ifisabo fisuma.” (Mateo 7:16, 17) Aloseshe mu kuti, ababa mu kupepa kwa cine bakeshibikilwa ku fyo basuminamo na ku micitile yabo. Nangu ca kutila tabapwililika kabili balalufyanya, bakapepa ba cine, bonse capamo balapoosa amano ku kucita ukufwaya kwa kwa Lesa. Natulande pa fintu 6 ifyo twingeshibilako bakapepa ba cine.

ABAPEPA LESA WA CINE

  • basambilisha ifyaba mu Baibolo
  • bapepa Yehova eka fye kabili balalenga ishina lyakwe ukwishibikwa
  • balitemwana ukufuma pa nshi ya mutima
  • balisumina ukuti muli Yesu e mo Lesa atupusushisha
  • te ba pano calo
  • balabila ukuti Ubufumu bwa kwa Lesa e bo abantu balingile ukucetekela
Abantu abafuma mu fyalo fyalekanalekana abapepa Lesa

6Ababomfi ba kwa Lesa basambilisha ifyaba mu Baibolo. Baibolo iyine itila: “Amalembo yonse yantu yapuutwamo kuli Lesa kabili ya mulimo ku kusambilisha, ku kwebaula, ku kulungika ifintu, ku kusalapula kwa mu bulungami, ukuti umuntu wa kwa Lesa abe uwafikapo bwino bwino, uwaipangasha umupwilapo ku kubomba umulimo onse uusuma.” (2 Timote 3:16, 17) Paulo alembeele Abena Kristu banankwe ukuti: “Ilyo mwapokelele icebo ca kwa Lesa, ico mwaumfwile kuli ifwe, tamwacipokelele nge cebo ca bantu, lelo, ifyo caba icine cine, icebo ca kwa Lesa, icilebombela na muli imwe mwe basumina.” (1 Abena Tesalonika 2:13) E ico, ifyo bakapepa ba cine basambilisha ne fyo bacita tafifuma ku mano ya bantunse nelyo ku ntambi. Fifuma mu Cebo ca kwa Lesa, Baibolo.

7 Tufwile ukupashanya Yesu Kristu, pantu fyonse ifyo alesambilisha fyalefuma mu Cebo ca kwa Lesa. Ilyo alepepa kuli Wishi wa mu muulu, atile: “Icebo cenu e cine.” (Yohane 17:17) Yesu alicetekele Icebo ca kwa Lesa, kabili fyonse ifyo asambilishe fyalefuma mu Malembo. Ilingi line Yesu alesosa ukuti: “Calembwa aciti.” (Mateo 4:4, 7, 10) Lyene Yesu alelanda amashiwi yasangwa mwi lembo. Na bantu ba kwa Lesa pali lelo, tabasambilisha amano yabo. Balishiba ukuti Baibolo Cebo ca kwa Lesa, kabili basambilisha filya fine fye Baibolo ilanda.

8Ababa mu kupepa kwa cine bapepa Yehova fye kabili balenga ishina lyakwe ukwishibikwa. Yesu atile: “Yehova Lesa obe e o ulepepa, kabili wene eka e o ulebombela umulimo washila.” (Mateo 4:10) E ico, ababomfi ba kwa Lesa ni Yehova fye bapepa. Mu kupepa kwabo mwaba no kulenga abantu ukwishiba ishina lya kwa Lesa wa cine e lyo ne fyo aba. Pa Amalumbo 83:18 patila: “Ku kuleka beshibe ukuti imwe mweka, ishina lyenu Yehova, mwapulamo pano isonde ponse.” Yesu alitulangile ukuti tufwile ukwafwa bambi ukwishiba Lesa, ilyo asosele mwi pepo ati: “Nalange shina lyenu ku bantu abo mwampeele aba pano calo.” (Yohane 17:6) Na bakapepa ba cine pali lelo, balasambilisha bantu ishina lya kwa Lesa, ifyo afwaya, e lyo ne mibele akwata.

9Abantu ba kwa Lesa balitemwana ukufuma pa nshi ya mutima. Yesu atile: “Muli ici e mo bonse bakeshibilo kuti muli basambi bandi, nga mwaba no kutemwana.” (Yohane 13:35) Abena Kristu ba kubalilapo balitemwanene. Ukutemwa uko Lesa atweba ukuba na ko kulapwisha akapaatulula kabili kulenga abantu ukwikatana sana mu bwananyina bwa cine cine. (Abena Kolose 3:14) Ababa mu mipepele ya bufi tabakwata uko kutemwa. Twaishiba shani ico? Balepayana pa mulandu fye wa kuba mu fyalo fyapusana e lyo no kupusana imitundu. Abena Kristu ba cine tababomfya ifyanso no kwipaya bamunyinabo Abena Kristu nelyo fye abantu bambi. Baibolo isosa ukuti: “Abana ba kwa Lesa na bana ba kwa Kaseebanya bamonekela kuli ici cine: Onse uushitwalilila ukucita ubulungami te wa kwa Lesa, nangu uushatemwa munyina…. Tuletemwana; twiba nga Kaini, uwali wa mubifi kabili aipeye munyina.”—1 Yohane 3:10-12; 4:20, 21.

10 Kwena, ukutemwa abanensu ukufuma pa nshi ya mutima, te kukanabepaya fye. Abena Kristu ba cine balabomfya inshita yabo, amaka, ne fikwatwa ku kwafwana no kukoseleshanya. (AbaHebere 10:24, 25) Balafwana ilyo kuli ubwafya, kabili ba cishinka. Na kuba, balakonka filya Baibolo ifunda ukuti “tubombe icisuma kuli bonse.”—Abena Galatia 6:10.

11Abena Kristu ba cine balisumina ukuti muli Yesu Kristu e mo Lesa abapusushisha. Baibolo isosa ukuti: “Tamwaba ipusukilo mu muntu umbi iyo, pantu takwaba ishina limbi mwi samba lya muulu ilyapeelwa mu bantu, umo tufwile ukupusukila.” (Imilimo 4:12) Nga filya twamwene mu Cipandwa 5, Yesu apeele ubumi bwakwe icilubula ku kupusha abantunse ba cumfwila. (Mateo 20:28) Kabili, Yesu e Mfumu Lesa asonta iya Bufumu bwa mu muulu ubukateka isonde lyonse. Kabili Lesa afwaya ukuti tuleumfwila Yesu no kukonka ifyo asambilisha nga tulefwaya ukuba no bumi bwa muyayaya. E mulandu wine Baibolo isoselo kuti: “Uutetekelo Mwana aba no bumi bwa muyayaya; uushumfwila Mwana takamone ubumi.”—Yohane 3:36.

12Bakapepa ba cine te ba pano calo. Ilyo Yesu balemulubulwisha kuli Pilato, kateka wa Roma, atile: “Ubufumu bwandi te bwa pano calo.” (Yohane 18:36) Abakonshi ba kwa Yesu aba cine, te mulandu ne calo bekalamo, batekwa ba Bufumu bwakwe ubwa ku muulu. E ico tabaitumpa nangu panono mu milandu ya calo nelyo mu fikansa fya ciko. Lelo, bakapepa ba kwa Yehova tabakaanya bambi nga balefwaya ukuba mu cilonganino ca fikansa fya calo, nangu nga balefwaya ukuba intungulushi nelyo ukusala intungulushi mu buteko. Kabili nangu line bakapepa ba cine aba kwa Lesa tabaipoosa mu fikansa fya calo, balakonka amafunde. Mulandu nshi? Pantu Icebo ca kwa Lesa cibeba ‘ukunakila bakateeka abacilamo’ aba mu buteko. (Abena Roma 13:1) Nga ca kutila ifyo ubuteko bulefwaya bena ukucita fyapusana ne fyo Icebo ca kwa Lesa cifwaya, bakapepa ba cine bacita ifyacitile abatumwa, abatile: “Tufwile ukunakila Lesa nga kateeka ukucila ukunakila abantu.”—Imilimo 5:29; Marko 12:17.

13Abakonshi ba kwa Yesu aba cine babila ukuti Ubufumu bwa kwa Lesa e bo fye abantu balingile ukusubila. Yesu asobele ati: “Ne mbila nsuma iyi ya bufumu ikashimikilwa pano isonde ponse ku kubo bunte ku nko shonse; e lyo ne mpela ikesa.” (Mateo 24:14) Abakonshi ba kwa Yesu Kristu aba cine babila ukuti Ubufumu bwa kwa Lesa ubwa mu muulu e bukapwisha ukucula kwa bantunse. Tabakoselesha abantu ukucetekela bakateka ba pano calo ukupwisha amacushi yabo. (Amalumbo 146:3) Yesu atusambilishe ukupepela ubo buteko bwapwililika ilyo atile: “Ubufumu bwenu bwise. Ukufwaya kwenu kucitwe pano isonde nga mu muulu.” (Mateo 6:10) Icebo ca kwa Lesa casobele ukuti ubu Bufumu bwa mu muulu “bukashonaula no kupesha aya mabufumu yonse [ayabapo nomba], kabili bukeminina umuyayaya.”—Daniele 2:44.

14 Ukulingana ne fyo twalanda, ipusheni mwe bene amuti: ‘Cilonganino nshi ica mapepo icisambilisha ififuma mu Baibolo no kulenga ishina lya kwa Yehova ukwishibikwa? Ni bani baba no kutemwa ukulingana ne fifwaya Lesa, abakwata icitetekelo muli Yesu, abashiipoosa mu fikansa fya calo, kabili abashimikila ukuti Ubufumu bwa kwa Lesa e bo abantunse balingile ukucetekela fye? Pa filonganino fya mapepo ifyaba muno calo, ni bani bakonka ifi fyonse? Calimoneka apabuuta tuutu ukuti ni Nte sha kwa Yehova.—Esaya 43:10-12.

Nga mulebombela Yehova capamo na bantu bakwe, mukakwata ifingi ukucila ifyo mwasha

Abantu abafuma mu fyalo fyalekanalekana balipanga bucibusa

CINSHI MUKACITA?

15 Ukucetekela Lesa te kufwaikwa fye pa kuti tulenge wena ukusekelela. Na kabushe, Baibolo itila nangu fibanda na fyo fyalicetekela ukuti Lesa e ko aba. (Yakobo 2:19) Na lyo line calimoneka apabuuta ukuti taficita ifyo Lesa afwaya kabili Lesa taafitemwa. Pa kuti Lesa atusenamine, tatufwile fye ukusumina ukuti e ko aba, lelo tufwile no kucita ukufwaya kwakwe. Kabili tufwile no kufuma mu kupepa kwa bufi no kuba mu kupepa kwa cine.

16 Umutumwa Paulo atile tatufwile ukucitako ificita ababa mu kupepa kwa bufi. Alembele ukuti: “‘Fumenimo muli bene, no kuipaatulako,’ e fyo asosa Yehova, ‘kabili mwi-ikatako ku cishasanguluka’; ‘na ine nkamupokelela.’” (2 Abena Korinti 6:17; Esaya 52:11) E ico, Abena Kristu ba cine balataluka conse icakuma ukupepa kwa bufi.

17 Baibolo ilanga ukuti “Babiloni Mukalamba” kupepa konse ukwa bufi.* (Ukusokolola 17:5) Ili shina lyafuma ku musumba wa kale uwa Babiloni, uko ukupepa kwa bufi kwatendekele ilyo Ilyeshi lya kwa Noa lyapwile. Ifingi ifyo basambilisha mu kupepa kwa bufi fyatendekele ku Babiloni kale sana. Ku ca kumwenako, abena Babiloni balepepa Lesa uwabamo balesa batatu. Pali lelo, icisambilisho cikalamba ico ifilonganino fya mapepo ifingi fisambilisha ca kuti muli Lesa umo mwaba abene batatu. Lelo Baibolo ilanga bwino bwino ukuti kwaba fye Lesa wa cine umo, Yehova, no kuti Yesu Kristu Mwana wakwe. (Yohane 17:3) Abena Babiloni basumine no kuti abantunse baaba no mweo uushifwa, uufuma mu muntu nga afwa no kuya ku cifulo cimbi ku kulunguluka. Pali lelo, mu filonganino fya mapepo ifingi basambilisha abati umweo uushifwa nelyo umupashi kuti wacula mu mulilo wa pe.

18 Apo ukupepa kwa bena Babiloni ba ku kale kwali fye mpanga yonse, kanshi Babiloni Mukalamba uwa muno nshiku kupepa kwa bufi konse ukwaba pano calo. Kabili Lesa asobele ukuti uku kupepa konse ukwa bufi kukonaulwa ilyo abantu bashileenekela. (Ukusokolola 18:8) Bushe mwamona ico mufwile ukuipatwilako kuli Babiloni Mukalamba? Yehova Lesa alefwaya imwe ‘ukufuma muli ena’ bwangu bwangu.—Ukusokolola 18:4.

19 Nga mwafuma mu kupepa kwa bufi, bamo kuti baleka no kumfwana nenu. Lelo, nga mulebombela Yehova capamo na bantu bakwe, mukakwata ifingi ukucila ifyo mwasha. Nga filya cali ku basambi ba kwa Yesu aba kubalilapo, abashile fyonse no kumukonka, na imwe mukakwata bamunyinenwe abengi Abena Kristu. Mukaba mu lupwa lukalamba ulwa mwi sonde lyonse umwaba amamilioni ya Bena Kristu ba cine, abakamutemwa ukufuma pa nshi ya mutima. Kabili mukaipakisha ubumi bwa muyayaya ubusuma sana “mu bwikashi buleisa.” (Marko 10:28-30) Napamo mu kupita kwa nshita, abalekele ukumfwana nenu pa mulandu wa fyo mwasumina bakeshiba ico Baibolo isambilisha no kusanguka bakapepa ba kwa Yehova.

20 Baibolo isambilisha ukuti Lesa nomba line akafumyapo buno bwikashi bwabipa no kuleta icalo cipya icikatekwa no Bufumu bwakwe. (2 Petro 3:9, 13) Mwandini ico calo cikawama! Kabili muli ci calo, mukaba fye ukupepa kumo, no ku, kupepa kwa cine. Bushe teti ciwame imwe ukucitapo fimo pa kuti muleba pamo na bakapepa ba cine pali ino ine inshita?

IFYO BAIBOLO ISAMBILISHA

  • Kwaba ukupepa kwa cine kumo fye.—Mateo 7:13, 14.
  • Ukupepa kwa cine kwishibikilwa ku fyo kusambilisha ne fyo abantu babamo bacita.—Mateo 7:16, 17.
  • Inte sha kwa Yehova e bakapepa ba cine.—Esaya 43:10.

*  Pa kuti mwishibilepo na fimbi pa co Babiloni mukalamba eminininako ukupepa konse ukwa bufi pano calo, moneni Ifyebo na Fimbi.


Amepusho

1. Busuma nshi twingasanga nga tulepepa Lesa ukulingana ne fyo afwaya?

2. Kuti twaishiba shani ifya kupepa Yehova, kabili cilangililo nshi ciletwafwa ukumfwikisha ici?

3. Yesu atile finshi tufwile ukucita nga tulefwaya Lesa apokelele ukupepa kwesu?

4. Bushe ifyo Yesu asosele pa misebo ibili fyalola mwi, kabili ni kwi iyi misebo itwala?

5. Cinshi twingeshibilako bakapepa ba cine?

6, 7. Finshi ababomfi ba kwa Lesa baishiba pali Baibolo kabili mulandu nshi tufwile ukupashanishisha Yesu mu fyo tumona Baibolo?

8. Bushe mu kupepa Yehova mwaba na cinshi?

9, 10. Bushe Abena Kristu ba cine balanga shani ukuti balitemwana?

11. Cinshi tufwile ukusuminina ukuti muli Yesu Kristu e mo Lesa atupusushisha?

12. Bushe ukukanaba aba pano calo calola mwi?

13. Bushe abakonshi ba cine aba kwa Yesu basuubila cinshi pa Bufumu bwa kwa Lesa, kabili cinshi bacita?

14. Ni bani bacita ifyo bakapepa ba cine bafwile ukucita?

15. Ilyo twasumina ukuti Lesa e ko aba, finshi fimbi ifyo Lesa afwaya twacita?

16. Ukukuma ukupepa kwa bufi, cinshi tufwile ukucita?

17, 18. Bushe “Babiloni Mukalamba” cinshi, kabili cinshi mulingile ukwangufyanishisha ‘ukufuma muli ena’?

19. Busuma nshi mukasanga mu kubombela Yehova?

20. Finshi fili ku ntanshi ifyo bakapepa ba cine balelolela?