Tinikeni pa kuti muye ku filimo

Tinikeni pa kuti mumone imitwe iilimo

IFYEBO NA FIMBI

Bushe Sheol na Hades Finshi?

Bushe Sheol na Hades Finshi?

MU NDIMI balembelemo Baibolo pa kubalilapo fye, babomfeshe ishiwi lya she’ohl′ mu ciHebere na hai′des mu ciGriki ukucila pa miku 70. Amashiwi yonse yabili yalanda pa mfwa. AmaBaibolo yamo yayalula aya mashiwi ati “inshiishi,” “ku mbo,” nelyo “inindi.” Na lyo line, indimi ishingi tashakwata amashiwi yalondolola bwino bwino umwalola ili shiwi lya ciHebere ne lya ciGriki. Bushe aya mashiwi yalola mwi? Natumone ifyo yabomfiwa mu fyalembwa mu Baibolo.

Pali Lukala Milandu 9:10 patila: “Takuli ica kucita nangu ca kwelenganya nangu kwishiba nangu mano ku Mbo [Sheol] uko uleya.” Bushe ifi fyebo fyalola mu kuti Sheol cifulo, nelyo ni nshiishi uko twashiika umutemwikwa wesu? Iyo. Baibolo nga yalanda pa nshiishi, nelyo inindi ibomfya amashiwi yambi aya ciHebere ne ciGriki, te she’ohl′ na hai′des iyo. (Ukutendeka 23:7-9; Mateo 28:1) Kabili, Baibolo nga ilelanda pa nshiishi uko abantu abengi bashiikwa pamo, taibomfya ishiwi lya kuti Sheol, tutile nga ilelanda pa nshiishi ya lupwa nelyo icilindi umwashiikwa abantu abengi.—Ukutendeka 49:30, 31.

Nomba, bushe Sheol cinshi? Icebo ca kwa Lesa catulanga ukutila Sheol, nelyo Hades, te nshiishi fye iyi yine nelyo icilindi umwashiikwa abantu abengi pamo. Cimo ico Esaya 5:14 yalanda ca kutila Imbo [Sheol] ‘yalitanunuka…no kwasamwina akanwa ka kuko ukwabulo mulingo.’ Nangu Sheol alimina iminshipendwa ya bantu, ukwikuta kwena tekuta nangu panono. (Amapinda 30:15, 16) Ukupusana ne nshiishi ishi shine twaishiba, ukwa kuti abantu nga bafula sana abo bashiikako ninshi kwaisula, “ku Mbo [Sheol] na ku Bulobe takwikuta” iyo. (Amapinda 27:20) Ku Sheol kwena takwisula. Takwaba mpela. E ico Sheol nelyo Hades, te cifulo cabela ku ncende imo ifi. Lelo ni uko abantu bonse baya nga bafwa, cifulo ca mampalanya ukwaba abafwa.

Ifyo Baibolo isambilisha pa kubuushiwa filatwafwa ukwishibilako na fimbi pa fyo amashiwi ya kuti Sheol na Hades yapilibula. Icebo ca kwa Lesa calanda pa bakabuuka ukuti baba mu Sheol na Hades.* (Yobo 14:13; Imilimo 2:31; Ukusokolola 20:13) Kabili Icebo ca kwa Lesa cisambilisha ukutila ababa mu Sheol, nelyo Hades, bantu abalebombela Yehova ilyo tabalafwa e lyo na bashalemubombela. (Ukutendeka 37:35; Amalumbo 55:15) E cilya Baibolo ilandila ukutila “kukaba ukubuushiwa kwa balungama na bashalungama.”—Imilimo 24:15.


*  Abafwa abashakabuushiwe bena tababa mu Sheol nelyo Hades, lelo baba “mu Gehena.” (Mateo 5:30; 10:28; 23:33) Nga filya fine Sheol na Hades fishaba fifulo fya cine cine, na Gehena na yo cifulo ca mampalanya.

← Moneni icipandwa