BUSHE ulebebukisha aba abaume batatu? Ee, banankwe ba kwa Daniele abakeene ukulya ifyo tabalingile ukulya. Abena Babiloni baleita aba abalumendo ati Shadraki, Meshaki na Abednego. Mona ifyo bacitile pa cikope. Cinshi bakaanine ukufukama no kupepa icimpashanya icikalamba nge fyo bonse balecita? Natumone ico bakaanine.

Bushe uleyebukisha amafunde ayo Yehova alembele ayetwa ati Amafunde Ikumi? Ifunde lya kubalilapo litila: ‘Taulingile ukupepa tulesa tumbi, ulepepa fye ine.’ Aba abalumendo balikonkele ili ifunde nangu ca kuti calyafishe.

Nebukadnesari, imfumu ya bena Babiloni yaitile abakankaala ukuti bese mu kupepa icimpashanya ico aimike. Aebele abantu bonse ati: ‘Nga mwaumfwa iciunda ca ntandala, ne ca nsango ne ca filimba fimbi, muwe pa nshi no kupepa icimpashanya ca golde. Uushawe pa nshi no kucipepa alapooswa mu kati ke lungu lya mulilo uulebilima.’

Ilyo Nebukadnesari aumfwile ukuti Shadraki, Meshaki na Abednego tabawileko pa nshi, alifulilwe sana. Aebele abaume bamo ukutwala aba abalumendo kuli ena. Abebele ukutila nga balefwaya kuti bafukamina icimpashanya pa kuti bebapoosa mu mulilo. Lelo aba abalumendo balicetekele Yehova. Baebele Nebukadnesari abati: ‘Lesa wesu uo tubombela ali na amaka ya kutupususha. Lelo nangu tatupusushe, tatwapepeko icimpashanya cenu ica golde.’

Ilyo Nebukadnesari aumfwile ifi, alicililemo ukufulwa. Kwali ilungu lya mulilo lwa mupepi kabili Nebukadnesari aebele abaume bamo ati: ‘Kafyeni ilungu imiku 7 ukucila ifyo likaba lyonse!’ Ilungu lya mulilo lyalikabile sana ica kuti abaume aba maka balifwile ku lubingu lwa mulilo. Cali shani kuli Shadraki, Meshaki na Abednego ilyo babapooselemo?

Ilyo imfumu yaloleshe mwi lungu lya mulilo, yalitiinine sana. Yaipwishe ababomfi ati: ‘Bushe tatwacikaka abalumendo batatu no kubapoosa mwi lungu lya mulilo?’

Ababomfi bayaswike ati: ‘Ee, e fyo twacicita.’

Imfumu yatile: ‘Ndemona abaume 4 bale-enda mwi lungu lya mulilo. Tabakakilwe, kabili umulilo tauleboca. No muntu uwalenga 4 alemoneka kwati mwana wa balesa.’ Imfumu yaile mupepi ne lungu no kubilikisha ati: ‘Shadraki! Meshaki! na Abednego! Mwe babomfi ba kwa Lesa Uwakulisha, fumeni mu mulilo!’

Ilyo bafumine mu mulilo, abantu bonse balimwene ukuti tabapiile. Lyena imfumu yatile: ‘Lesa wa kwa Shadraki, Meshaki, na Abednego alumbanishiwe! Natuma malaika wakwe ukwisabapususha, pantu tabacikontama no kupepa lesa umbi kano fye Lesa wabo.’

Bushe ili ilyashi taliletusambilisha ukuti tufwile ukuba aba cishinka kuli Yehova?