MONA amaceni kuli Paulo, kabili mona umushilika umwina Roma uulemulonda. Paulo balimukakile ku Roma. Alelolela ukumfwa ifyo Kaisare wa ku Roma akeba abantu ukumucita. Ilyo bamukakile, abantu balibasuminishe ukulaya mu kumumona.

Ilyo papitile inshiku shitatu ukutula apo Paulo ailiile ku Roma, atumine abantu ukweba intungulushi sha baYuda ukuyamumona. E ico, abaYuda abengi aba mu Roma baliile. Paulo alibashimikile pali Yesu na pa bufumu bwa kwa Lesa. Bamo balicetekele, baba na Bena Kristu, lelo bambi tabacetekele.

Paulo aleshimikila na ku bashilika balekanalekana abapeelwe umulimo wa kumulonda. Pa myaka ibili iyo bamukakile ku Roma, Paulo alishimikile kuli bonse abaleya mu cifungo. E calengele no kuti aba mu ng’anda ya kwa Kaisare bomfwe imbila nsuma iya Bufumu, kabili bamo pali bena balipilibwike ukuba Abena Kristu.

Lelo bushe uyu umweni uulelemba fimo nani? Bushe naumwishiba? Ni Timote. Timote na o balimukakile pa mulandu wa kushimikila pa Bufumu, lelo balimukakwile. Kabili aile ku Roma ku kwafwa Paulo. Bushe nawishiba ifyo Timote alelemba? Natumone.

Bushe ulewibukisha umusumba wa Filipi no wa Efese uo twalandilepo mu Lyashi 110? Paulo alibombeshe pa kuti muli iyi misumba mube ifilonganino. Lelo ilyo ali mu cifungo, Paulo alembeele Abena Kristu amakalata. Aya makalata yalilembwa na mu Baibolo, kabili yetwa ati Abena Efese na Abena Filipi. Paulo apa ale-eba Timote ifya kulembela Abena Kristu abali mu Filipi.

Abena Filipi balecitila Paulo ifintu ifisuma. Balitumiine Paulo ubupe ilyo ali mu cifungo. E ico Paulo alefwaya ukubatasha. Epafroditi e wamutwalile ubu bupe. Lelo alilwele ica kuti afwaya no kufwa. Iyi nshita ninshi alipola kabili ali mu kuya ku ng’anda ku mwakwe. E wali no kutwala kalata yafumine kuli Paulo na Timote pa kubwelelamo ku Filipi.

Ilyo Paulo ali mu cifungo, alilembele amakalata na yambi yabili ayaba mu Baibolo. Imo kalata aitumine ku Bena Kristu bali mu musumba wa Kolose. Bushe walishiba ifyo iyi kalata itwa? Itwa ati Abena Kolose. Imo kalata alembeele Filemone, cibusa wakwe. Filemone na o aleikala mu Kolose. Muli iyi kalata alandile pali Onesimu, umubomfi wa kwa Filemone.

Onesimu alibutwike ukufuma kuli Filemone no kuya ku Roma. Onesimu alyumfwile ukuti Paulo ali mu cifungo mu Roma mwine. Paulo alishimikile Onesimu icebo ilyo aile mu kumutandalila. Tapakokwele, Onesimu aishileba Umwina Kristu. Onesimu alimwene ukuti alilufyenye ukubutuka Filemone. Bushe walishiba ifyo Paulo alembele muli kalata iyo atumiine Filemone?

Paulo alombele Filemone ukubelela Onesimu uluse. Paulo alembele ati: ‘Natuma Onesimu ukuti abwelele kuli iwe. Nomba te musha fye obe, lelo Mwina Kristu munobe umusuma sana.’ Ilyo Onesimu abwelele ku Kolose alisendele yalya amakalata. Imo atwele ku bena Kolose e lyo imbi kuli Filemone. Elenganya ifyo Filemone atemenwe ilyo aumfwile ukuti umubomfi wakwe nomba Mwina Kristu.

Ilyo Paulo alembeele abena Filipi e lyo na Filemone, alibebele ifintu ifisuma. Aebele abena Filipi ati: ‘Natuma Timote ukwisa kuli imwe. Lelo na ine wine ndi no kwisa.’ E lyo kuli Filemone alembele ati: ‘Umpekanishishe ukwa kuti nkese mu kwikala.’

Ilyo Paulo bamukakwile, alitandalile Abena Kristu banankwe mu fifulo ifingi. Lelo Paulo balimukakile mu Roma na kabili. Alishibe ukuti ili lyena balamwipaya. E ico alembeele Timote kalata no kumweba ukuti ese bwangu. Paulo alembele ati: ‘Naliba uwa cishinka kuli Lesa, kabili Lesa akanambula.’ Pa numa ya myaka iinono ukutula apo Paulo bamwipaile, umusumba wa Yerusalemu walyonawilwe na kabili. Uyu muku abena Roma e baonawile uyu musumba.

Lelo Baibolo yalilanda pa fintu na fimbi. Yehova Lesa aebele umutumwa Yohane ukulemba amabuuku ya kulekelesha aya mu Baibolo pamo ne buuku lya Ukusokolola. Ili ibuuku litweba pa fya ku ntanshi. Nomba natulande pa fikacitika ku ntanshi.